Pakico Nos No Mester Gaña

LAGA nos bisa cu un mucha mohe ta bisa su mama: “Si, mi ta bin cas asina scol caba.” Ma e no ta bai cas. E ta keda scol pa hunga cu su amiganan, anto despues e ta bisa su mama: “Mi juffrouw a pone mi keda scol.” Ta bon pa bisa un cos asina?—

Of, laga nos bisa cu un mucha homber ta bisa su tata: “No, mi no a scop bala den cas.” Pero kico awor si el a hacie toch? Ta malo si e bisa cu e no a hacie?—

E Gran Maestro a mustra nos kico ta bon pa haci. El a bisa: ‘Laga bo si nifica si, y bo no, no; pasobra cualkier otro cos ta bin di e malbado.’ (Mateo 5:37) Kico Hesus tawata kiermen?— E tawata kiermen cu nos mester haci loke nos bisa.

Tin un historia den Bijbel cu ta mustra con importante ta pa nos papia berdad. E ta tocante dos hende cu a bisa cu nan ta disipel di Hesus. Laga nos ban wak kico a pasa.

Menos cu dos luna despues cu Hesus a muri, hopi hende di luganan leu a bin Herusalem pa un fiesta importante di e Hudiunan. E fiesta aki yama Pentecoste. Riba e dia ei apostel Pedro a duna un discurso masha bon mes pa siña e hendenan tocante Hesus, kende Yehova a lanta for di morto. Esei tawata e prome bes cu hopi di e hendenan cu a bin Herusalem a tende di Hesus. Awor nan tawata kier sa mas. Kico nan a haci?

Nan a keda mas tanto cu nan a plania. Pero despues di un par di dia, placa a caba cu algun di nan, y nan tawatin mester di yudansa pa nan por a cumpra cuminda. E disipelnan di Herusalem kier a yuda e bishitantenan aki. Pesei, hopi di nan a bende cos cu nan tawatin, anto trece e placa serca e apostelnan di Hesus. E ora ei e apostelnan tawata parti e placa pa e hendenan cu tawatin mester di yudansa.

Ananias cu su casa Safira tawata di e congregacion cristian di Herusalem, y nan a bende un tereno cu nan tawatin. Ningun hende no a bisa nan bend’e. Ta nan mes a dicidi di hacie. Pero nan no a hacie pasobra nan stima e disipelnan nobo di Hesus. No, Ananias cu Safira kier a pone hende kere cu nan ta mas bon hende cu loke nan ta. Pesei, nan a dicidi pa bisa cu ta tur e placa cu nan a haya nan a duna pa yuda hende. Pero ta un parti di e cen so nan a duna. Con bo ta haya e cos ei?—

Awel, manera nan a dicidi, Ananias a bai serca e apostelnan anto a duna nan e cen. Pero, di mes, Dios si tawata sa cu e no a duna nan tur e cen. Pesei Dios a laga apostel Pedro sa cu Ananias no a papia berdad.

E ora ei Pedro a bis’e: ‘Ananias, pakico bo a laga Satanas pone bo haci e cos aki? Ta di bo e tereno tawata. Bo no tawatin nodi bend’e. Y asta ora bo a caba di bende e tereno, ta abo mes por a dicidi kico pa haci cu e cen. Pero pakico bo ta haci manera cos cu bo ta duna tur e cen, si ta un parti di dje so bo ta duna? No ta nos so bo a gaña. Bo a gaña Dios tambe.’

Bo a mira con grave e asunto ta? Ananias a gaña! E no a haci loke el a bisa. El a djis gaña hacie. Bijbel ta conta nos kico a pasa despues. E ta bisa: ‘Ora Ananias a tende loke Pedro a bisa, el a kita cai muri.’ Dios a pone Ananias cai muri! Despues nan a carga su curpa hiba pafo, anto nan a der’e.

Un tres ora despues, Safira a yega. E no tawata sa loke a pasa cu su casa. Pesei, Pedro a puntr’e: ‘Ta e cen cu boso dos a duna nos ta loke boso a haya pa e tereno ora boso a bend’e?’

Safira a contesta: ‘Si, ta pa precis e prijs ei nos a bende e tereno.’ Pero ta gaña el a gaña! Nan a keda cu un parti di e cen cu nan a haya pa e tereno. Pesei, Dios a pone Safira tambe cai muri.—Echonan 5:1-11.

Kico nos mester siña for di loke a pasa cu Ananias y Safira?— Nos ta siña cu Dios no gusta hende gañado. E kier pa semper nos papia berdad. Pero hopi hende ta bisa cu no ta nada si bo gaña. Bo ta kere cu e hendenan ei tin rason?— Bo tawata sa cu ta door di un mentira tur malesa, dolor y morto na mundo a cuminsa?—

Corda cu Diabel a gaña Eva, e prome hende mohe. El a bisa Eva cu lo e no muri si e desobedece Dios y come e fruta cu Dios a bis’e pa no come. Eva a kere Diabel y el a come e fruta. El a pone cu Adam tambe a com’e. E ora ei nan a bira pecado, y tur nan yiunan tambe a nace pecado. Y door cu tur Adam su yiunan tawata pecado, nan tur a sufri y muri. Con tur e problemanan aki a cuminsa?— Nan a cuminsa cu un mentira.

No ta nada straño cu Hesus a yama Diabel “un gañado y e tata di mentira”! E tawata e prome persona cu a gaña. Ora un hende gaña, e ta haci un cos cu Diabel a haci prome. Nos mester corda e cos ei ki ora cu nos sinti nos tenta pa gaña.—Huan 8:44.

Ki ora bo sa sinti bo tenta pa gaña?— No ta ora bo a haci malo?— Kisas bo a kibra un cos sin cu bo por a yuda. Si nan puntra bo ta ken a hacie, kico bo mester bisa? Bo mester bisa cu ta un di bo rumannan a hacie? Bo mester haci manera cos cu bo no sa ta kico a pasa?—

I si bo tawatin huiswerk pa haci anto bo no a cab’e, bo mester bisa cu bo a cab’e maske no ta asina?— Nos mester corda e historia di Ananias cu Safira. Nan no a papia berdad, pasobra nan no a bisa tur cos. Y Dios a mustra cu loke nan a haci ta hopi malo, pasobra el a pone nan cai muri.

Pesei, ni maske kico nos haci, si nos gaña, ta piyo so cos ta bira. Y nos no mester ni sikiera papia mita berdad so. Bijbel ta bisa: “Papia berdad.” Tambe e ta bisa: “No gaña otro.” Yehova ta papia berdad semper, y e kier pa nos haci mescos.—Efesionan 4:25; Colosensenan 3:9.