Hesus Ta Stima Mucha

MIRA con Hesus ta tene e mucha homber den su brasa. Bo por mira cu Hesus en berdad ta stima mucha. E hombernan cu ta wak ta su apostelnan. Kico Hesus ta bisando nan? Ban mira.

Hesus y su apostelnan a caba di bolbe di un biahe largo. Riba caminda e apostelnan a pleita cu otro. P’esei, despues cu nan a yega, Hesus a puntra nan: ‘Tocante kico boso tabata pleita na caminda?’ Pero Hesus tabata sa caba tocante kico nan tabata pleita. El a puntra nan pa mira si e apostelnan lo a bis’e.

E apostelnan no a contesta, pasobra na caminda nan tabata pleita tocante cua di nan ta esun di mas grandi. Algun apostel tabata desea di ta mas importante cu e otronan. Con Hesus a bisa nan cu no ta bon pa desea di ta esun di mas grandi?

El a yama e mucha homber y a pon’e dilanti nan tur. Anto el a bisa su discipelnan: ‘Mi kier pa boso compronde esaki bon: A menos cu boso cambia y bira manera mucha chikito, boso nunca por drenta den e reino di Dios. E persona mas grandi den e reino ta esun cu ta bira manera e mucha aki.’ Bo sa pakico Hesus a bisa esei?

Wel, muchanan chikito no ta precupa pa ta mas grandi of mas importante cu otro. P’esei e apostelnan tabatin cu siña ta manera mucha chikito den e sentido ei, y no pleita tocante ken ta mas grandi of importante.

Tabatin otro ocasionnan tambe ora Hesus a mustra cuanto e ta stima mucha. Un par di luna despues algun hende a trece nan yiunan pa mira Hesus. E apostelnan a purba stroba nan. Pero Hesus a bisa su apostelnan: ‘Laga e muchanan bini cerca mi y no stroba nan.’ Anto Hesus a brasa e muchanan y a bendiciona nan. No ta bon pa nos sa cu Hesus ta stima mucha?