Hesus Ta Alimenta Hopi Hende

ALGO teribel a sosode. Nan a caba di mata Juan Bautista. Herodias, esposa di e rei, no tabata gusta Juan. Y el a pone e rei duna ordo pa kap su cabes afo.

Ora Hesus a tende esei, el a bira masha tristo. El a bai su so na un luga solitario. Pero hende a siguie. Ora Hesus a mira e multitud, el a sinti duele di nan. P’esei el a papia cu nan tocante e reino di Dios, y el a cura e hendenan enfermo.

E atardi ei su discipelnan a bini cerca dje y a bisa: ‘Ta lat caba, y esaki ta un luga solitario. Manda e hendenan bai pa nan por cumpra cuminda pa nan mes den e pueblonan eicerca.’

Hesus a contesta: ‘Nan no tin cu bai. Duna nan algo pa come.’ Hesus a puntra Felipe: ‘Unda nos por cumpra suficiente cuminda pa tur e hendenan aki?’

Felipe a contesta: ‘Ta costa mucho placa pa cumpra suficiente cuminda pa tur hende por haya djis un tiki so.’ Andres a bisa: ‘E mucha homber cu ta carga nos cuminda tin cinco pan y dos pisca. Pero esei no ta basta pa tur e hendenan ei.’

Hesus a bisa: ‘Pidi tur hende pa sinta riba yerba’, anto el a gradici Dios pa e cuminda y a cuminsa kibr’e na pida pida. Despues e discipelnan a parti e pan- y piscanan pa tur hende. Tabatin 5.000 homber, y hopi miles mas di hende muher y mucha. Nan tur a come te cu nan a keda bariga yen. Y ora e discipelnan a recohe loke a sobra, tabatin 12 macutu yen!

Awor Hesus a bisa su discipelnan drenta den un boto pa nan crusa lama di Galilea. Durante anochi tabatin un tempestad y ola a tira e boto p’aki y p’aya. E discipelnan a haya masha miedo mes. Anto meianochi nan a mira un hende ta cana riba awa biniendo cerca nan. Nan a grita di miedo, pasobra nan no tabata sa kico nan ta mira.

Hesus di: ‘No tene miedo, ta ami!’ Toch nan no por a kere. P’esei Pedro a bisa: ‘Si ta abo, Señor, bisa mi cana riba awa y bin cerca bo.’ Hesus a bisa: ‘Bin!’ Y Pedro a sali for di e boto y a cana riba awa! Pero despues el a haya miedo y a cuminsa sink, ma Hesus a salb’e.

Un otro dia Hesus a alimenta miles di hende atrobe. El a haci esei cu shete pan y un par di pisca chikito. Y atrobe tabatin na abundancia pa tur hende. No ta maraviyoso con Hesus por percura pa hende? Ora e ta reina como rei di Dios, nos lo no tin cu precupa nos mes cu nada nunca.