Hesus Por Proteha Nos

ORA Hesus a bira grandi anto a haya sa con Dios a proteh’e dia cu e tawata chikito, bo ta kere cu el a resa na Yehova pa bis’e danki?— Y ora Hesus a haya sa cu Maria y Hose a hib’e Egipto pa scapa su bida, kico bo ta kere cu e por a bisa nan?—

Claro cu awor Hesus no ta baby mas. E no ta biba na tera mes mas manera antes. Pero bo a nota cu awendia ora hende corda riba Hesus, tin bes cu tur loke nan ta corda ariba ta tempo cu e tawata baby, drumi den un pesebre?— Den tempo di Pasco di Nacemento bo por mira e cos ei, pasobra tur caminda tin figura di Hesus tempo cu e tawata baby.

Pero, abo ta kere cu Hesus ta na bida maske e no ta biba na tera mas?— Si, Dios a lant’e for di morto, y awor e ta un Rei poderoso den shelo. Kico bo ta kere cu e por haci pa proteha hende cu ta sirbie?— Wel, tempo cu Hesus tawata na tera el a mustra con e por a proteha hende cu ta stim’e. Laga nos wak con el a proteha su disipelnan un dia cu el a bai den boto cu nan.

Tawata atardi laat. Hesus a pasa henter dia ta siña hende canto di Lama di Galilea, un lago di mas o menos 20 kilometer largo y 12 kilometer hancho. E ora ei el a bisa su disipelnan: “Laga nos crusa bai na e otro banda di e lago.” Awel, nan a subi un boto y cuminsa crusa e lago. Hesus tawata hopi cansa, y el a bai drumi riba un cusinchi na e parti patras di e boto. Den un rato di ora e tawata morto na soño.

E disipelnan a keda lanta pa nan tene e boto riba rumbo. Prome, tur cos a bai bon. Pero diripiente un biento duro a lanta. E biento a cuminsa supla mas y mas duro, y e olanan tawata bira mas y mas grandi. Ola a cuminsa drenta e boto, y e boto a cuminsa yena cu awa.

E disipelnan tawatin miedo. Nan a kere cu e boto tawata bai sink cu nan. Pero Hesus si no tawatin miedo. Ainda e tawata morto na soño patras den e boto. Porfin e disipelnan a lant’e. Nan a bis’e: ‘Maestro, Maestro, scapa nos; nos ta bai muri den e mal tempo aki.’ E ora ei Hesus a lanta, anto el a papia cu e biento y e olanan. El a bisa nan: “Keda keto!”

Mesora biento a stop di supla. A bira keto keto den e lago. E disipelnan a keda boca habri. Nunca nan no a yega di mira un cos asina. Nan a cuminsa bisa otro: “Ta ken esaki ta anto, cu e ta asta ordena e bientonan y e awa, y nan ta obedec’e?”—Lucas 8:22-25; Marco 4:35-41.

Bo sa ta ken Hesus ta?— Bo sa ta di unda e ta haya tanto poder?— E disipelnan no tawatin nodi spanta, pasobra Hesus tawata hunto cu nan. Y Hesus no tawata un hende manera tur otro hende. E por a haci cos masha grandi mes, cos cu ningun otro hende no por a haci. Laga mi conta bo un otro cos cu el a yega di haci riba lama ora tawatin mal tempo.

Un otro dia Hesus a bisa su disipelnan pa nan subi boto y bai su dilanti na e otro banda di e lago. Tawata birando anochi, anto Hesus a subi un sero pa e bai haci oracion su so. Ayariba tawata keto, un bon luga pa e papia cu su Tata Yehova Dios.

E disipelnan a subi boto y a crusa bai na e otro banda di e lago. Pero un poco despues, biento a cuminsa supla. Cada bes e tawata supla mas duro. A bira anochi caba. E hombernan a baha e bela y cuminsa rema, pero e boto no kier a bai dilanti, pasobra tawatin biento duro ta supla contra nan. Lama tawata benta e boto p’aki p’aya meimei di e olanan halto, y awa tawata drent’e. E hombernan a lucha pa yega canto, pero nan no tawata por.

Ainda Hesus tawata su so riba sero. El a pasa hopi rato caba ayariba. Pero awor e por a mira cu su disipelnan tawata den peliger meimei di e olanan halto. Pesei, el a baha e sero y bai canto di e lago. Door cu Hesus kier a yuda su disipelnan, el a cuminsa cana riba e lama bruto pa bai serca nan!

Kico ta pasa si abo purba cana riba awa?— Bo ta sink y bo por hoga. Pero Hesus no. E tin poder special. Hesus a cana basta rato pa el a yega banda di e boto. Pesei, ora cu e disipelnan a mir’e ta bin serca nan riba awa, ya casi a bira mainta. Pero nan no por a kere nan bista. Nan a haya hopi miedo. Nan a grita di spanto. E ora ei Hesus a bisa nan: “Tene curashi, ta ami; No tene miedo.”

Asina cu Hesus a drenta e boto, e mal tempo a para. E disipelnan a bolbe keda boca habri. Nan a cai na rudia dilanti Hesus y bis’e: “Di berdad bo ta e Yiu di Dios.”—Mateo 14:22-33; Huan 6:16-21.

Lo no ta dushi si nos por a biba den e tempo ei pa mira Hesus haci cos asina?— Bo sa pakico Hesus a haci e milagernan ei?— El a haci nan pasobra el a stima su disipelnan y e kier a yuda nan. Pero tambe el a haci nan pasobra e kier a mustra cuanto poder e tin, pasobra e ta bai uza e poder ei den futuro como Gobernante di e Reino di Dios.

Te awe ainda Hesus ta uza su poder hopi biaha pa proteha su siguidonan ora Satanas ta purba haci cos pa stroba nan di conta otro hende di e Reino di Dios. Pero Hesus no ta uza su poder pa su disipelnan no bira malo, ni pa e cura nan ora nan ta malo. Cu tempo, tur e apostelnan di Hesus mes a muri. Hende a mata Santiago ruman di Huan, y nan a tira Huan mes den prizon.—Echonan 12:2; Revelacion 1:9.

Awendia ta mescos. Sea cu hende sirbi Yehova of no, nan tur por bira malo y muri. Pero djis aki, ora Hesus ta reina como Rei di Dios su gobierno, e cos ei ta bai cambia. E ora ei, nunca ningun hende lo no mester tin miedo mas, pasobra Hesus ta bai uza su poder pa trece bendicion pa tur hende cu ta obedec’e.—Isaias 9:6, 7.