Barco A Kibra Riba un Isla

MIRA! E barco ta den problema! El a kibra na pida pida! Bo ta mira e hendenan cu a bula na awa? Algun a yega tera caba. Ta Pablo esei? Laga nos mira kico a pas’e.

Corda cu nan a tene Pablo den prizon na Cesarea pa dos aña. Despues nan a barca e y otro prizoneronan pa Roma. Ora nan a pasa banda di e isla di Creta, un mal tempo fuerte a suta nan. Tabatin asina tanto biento cu nan no por a stuur e barco. Y nan no por a mira solo den dia ni streya durante anochi. Finalmente, despues di hopi dia, esnan na bordo a perde speransa di ser salba.

Anto Pablo a lanta para y a bisa: ‘Ningun di boso lo no perde boso bida; e barco so lo bai perdi. Pasobra ayeranochi un angel di Dios a bin cerca mi y a bisa mi: “No tene miedo, Pablo! Bo tin cu para dilanti di Cesar e gobernante Romano. Y Dios lo salba tur hende cu ta nabegando hunto cu bo.”’

Rond di meianochi, diescuater dia despues cu e mal tempo a cuminsa, e matroosnan a tuma nota cu e awa no tabata hopi hundo mas! Teniendo miedo cu e barco lo kibra riba baranca den scuridad, nan a tira anker. Su manece nan a mira un boca. Nan a dicidi di nabega e barco te na canto.

Wel, ora nan a yega mas cerca di e costa e barco a dal den un cai y a keda pega. Anto lama a cuminsa sut’e y e barco a cuminsa kibra. E oficial militar a bisa: ‘Tur hende cu sa landa, bula prome den lama y landa bai tera. Tur otro hende por bula despues di nan, y tene duro na e pidanan di e barco.’ Y esei ta loke nan a haci. Asina tur 276 hende na bordo a yega tera sano y salvo manera e angel a priminti.

E isla yama Malta. E habitantenan di e isla tabata masha bondadoso, y nan a cuida e hendenan di e barco. Ora tempo a mehora, nan a pone Pablo riba un otro barco y a hib’e Roma.