Un Mucha Cu A Pega Soño

AYAYAI, mira! Kico a sosode ei? Algo grave a pasa e mucha drumi na suela? Mira! Un di e hombernan cu ta sali for di e cas ta Pablo! Bo ta mira Timoteo tambe einan? Ta for di bentana e mucha a cai?

Si, esei ta loke a caba di sosode. Pablo tabata duna un discurso na e discipelnan ei na Troas. E tabata sa cu lo e no mira nan atrobe pa hopi tempo pasobra e tabatin cu subi barco e siguiente dia. P’esei el a sigui papia te meianochi.

Wel, e mucha homber aki yama Eutico. E tabata sinta na bentana y el a pega soño. El a perde balansa y a cai dor di e bentana for di e di tres piso te na suela! Pues, bo mes por compronde pakico e hendenan ta mustra asina precupa. Ora e hombernan a hisa e mucha, ta net manera nan a pensa. E tabata morto!

Ora Pablo a mira cu e mucha ta morto, el a drumi riba dje y bras’e. Despues el a bisa: ‘No precupa, e ta bon!’ Y di berdad e ta bon! Esei ta un milager! Pablo a restaura su bida! Un goso a yena e multitud.

Nan tur a bai ariba atrobe y a come. Pablo a sigui papia te cu di dia a habri. Pero bo por tin sigur cu Eutico no a pega soño atrobe! Anto Pablo, Timoteo y esnan biahando cu nan ta subi barco. Bo sa unda nan ta bai?

Pablo ta na final di su di tres biahe di predicacion, y e ta bayendo cas. Durante e biahe ei el a pasa tres aña den e stad di Efeso so. P’esei, e biahe ei ta mas largo cu esun di dos.

Despues di a sali for di Troas, e barco a pasa un temporada na Mileto. Siendo cu Efeso ta djis un par di kilometer for di ei, Pablo a manda yama e ancianonan di e congregacion pa bini na Mileto pa e papia cu nan pa ultimo bes. Despues, ora a yega e momento pa e subi barco, nan a keda masha tristo pa mira Pablo bai!

Porfin e barco a yega Cesarea bek. Mientras cu Pablo tabata kedando na cas di e discipel Felipe, profeta Agabo a duna Pablo spiertamento cu nan lo encarsel’e ora e yega Jerusalem. Y berdad, asina a sosode. Anto despues di a keda den prizon pa dos aña na Cesarea, nan a manda Pablo Roma pa Cesar e Emperador Romano husg’e. Laga nos mira kico a sosode durante e biahe pa Roma.