Timoteo—Ayudante di Pablo

E HOBEN cu bo ta mira ei hunto cu apostel Pablo ta Timoteo. Timoteo ta biba cu su famia na Listra. Su mama yama Eunice y su wela Loida.

Esaki ta e di tres biaha cu Pablo a bishita Listra. Rond di un aña prome cu esei, Pablo y Barnabas a yega ei pa prome bes pa predica. Y awor Pablo a bolbe atrobe cu su amigo Silas.

Bo sa kico Pablo ta bisando Timoteo? E ta puntr’e: ‘Bo kier compaña ami cu Silas? Bo por yuda nos predica na hende na luganan leu.’

Timoteo a contesta: ‘Si, mi tin gana di bai.’ Pronto despues Timoteo a bandona su famia y a bai cu Pablo y Silas. Prome cu nos lesa tocante nan biahe, laga nos mira kico Pablo a pasa aden. Rond di 17 aña a pasa desde cu Hesus a aparece na dje riba caminda pa Damasco.

Corda cu Pablo a bai Damasco pa persigui discipel di Hesus, pero awor e mes ta un discipel! Despues algun enemigo a plania pa mata Pablo pasobra nan no tabata gusta pa e siña tocante Hesus. Pero e discipelnan a yuda Pablo hui. Nan a pon’e den un macutu y a bah’e pafo di muraya di e stad.

Despues Pablo a bai na Antiokia pa predica. Aki ta caminda nan a yama siguidonan di Hesus cristian pa prome bes. Anto Pablo y Barnabas a ser manda for di Antiokia pa bai predica den paisnan mas leu. Un di e stadnan cu nan a bishita ta Listra, caminda Timoteo tabata biba.

Awor, rond di un aña despues, Pablo a bolbe na Listra durante su segundo biahe. Ora cu Timoteo a bai cu Pablo y Silas, bo sa unda nan a bai? Wak e mapa y laga nos siña e nomber di algun di e luganan.

Prome, nan a bai Iconio eicerca, y despues nan a bai un otro stad, yama Antiokia. Despues nan a bai Troas, y despues na Filipos, Tesalonica y Berea. Bo ta mira Atenas riba e mapa? Pablo a predica ei. Despues nan a pasa un aña y mei predicando na Corinto. Na final nan a haci un bishita cortico na Efeso. Despues nan a bolbe bai Cesarea cu barco, y a sigui biaha te na Antiokia, y Pablo a keda ei.

Asina Timoteo a biaha cientos y cientos di kilometer yudando Pablo predica e “bon nobo” y establece hopi congregacion cristian. Ora bo bira mas grandi, lo bo bira un fiel sirbidor di Dios mescos cu Timoteo?