Con Yehova A Proteha Hesus

TIN bes Yehova ta haci cos grandi y straño pa proteha chikitinnan cu no por proteha nan mes. Ora bo ta cana den mondi lo bo por mira un di e maneranan cu Yehova ta haci e cos ei. Pero tin chens cu ora bo mir’e sosode lo bo no compronde mesora ta kico ta pasando.

Kisas lo bo mira un cos asin’aki. Un parha ta baha na suela banda di bo. Ta parce manera cos cu algo a pas’e. E ta lastra un di su halanan, anto ora bo purba yega serca dje e ta hala bai. Mas bo purba yega serca dje, mas e ta keda hala, pero djis un tiki so, net pa bo no por coh’e. E ora ei, diripiente e parha ta bula bai. Nada no tawata falta su hala! Bo sa ta kico e parha tawata haci?—

Wel, e parha a baha banda di bo door cu su puyitonan tawata scondi eibanda mes den mata. E mama tawatin miedo pa bo haya nan anto haci nan algo. Pesei el a haci manera cos cu ta malo e ta, pa e kita bo for di eibanda. Bo sa ken por proteha nos manera un mama parha ta proteha su puyitonan?— Den Bijbel tin skirbi cu Yehova ta manera un parha cu ta cuida su puyitonan; un parha cu yama aguila.—Deuteronomio 32:11, 12.

Hesus ta Yehova su Yiu mas stima. Tempo cu Hesus tawata den shelo, e tawata un spirito poderoso manera su Tata. E mes por a cuida su curpa. Pero ora Hesus a nace na tera como baby, e no por a yuda su curpa. E tawatin mester di proteccion.

Pa Hesus por a cumpli cu loke Dios tawata kier pa e haci na tera, e tawatin cu crece bira hende grandi: un homber perfecto. Pero Satanas a purba mata Hesus prome cu e bira grandi. Ta hopi emocionante pa nos tende con Yehova a proteha Hesus ora Satanas a purba mat’e tempo cu e tawata baby. Bo kier tende e historia?—

Poco despues cu Hesus a nace, Satanas a pone algo manera un streya briya den shelo den Oriente. Un grupo di astrologo, hombernan cu ta studia streya, a sigui e streya. Nan mester a cana masha hopi mes, centenares di kilometer, pa nan yega Herusalem. Ora nan a yega, nan a puntra ta na unda esun cu tin cu bira rei di Hudiunan mester a nace. Herodes a laga puntra e hendenan cu tawata sa kico Bijbel ta bisa di e asunto ei, anto nan a contesta: “Na Betlehem.”—Mateo 2:1-6.

Ora Herodes e Rei malbado na Herusalem a tende cu un rei nobo a nace na Betlehem, un pueblo eibanda, el a bisa e astrologonan: ‘Bai busca e mucha te ora boso hay’e, anto bin bek bin conta mi.’ Bo sa dicon Herodes kier a sa unda e por haya Hesus?— Door cu Herodes tawata yalurs; e kier a mata Hesus!

Con Dios a proteha su Yiu?— Wel, ora e astrologonan a haya Hesus, nan a dun’e regalo. Despues Dios a spierta e astrologonan den un soño pa nan no bai bek serca Herodes. Pesei nan a bai cas bek via un otro ruta, sin bai Herusalem. Ora Herodes a haya sa cu e astrologonan a bai, el a rabia masha. E ora ei el a purba mata Hesus door di laga mata tur mucha homber na Betlehem cu tin menos cu dos aña! Pero ora e cos ei a pasa, ya Hesus no tawata na Betlehem mas.

Bo sa con Hesus por a scapa?— Despues cu e astrologonan a bai nan cas, Yehova a spierta Hose, casa di Maria. El a bis’e pa nan lanta y hui bai leu, te na Egipto. Einan Herodes e malbado no por a haci Hesus nada. Un par di aña despues, ora Maria cu Hose a bolbe cu Hesus for di Egipto, Dios a bolbe spierta Hose. El a bis’e den un soño pa nan bai biba na Nazaret, caminda nada lo no pasa Hesus.—Mateo 2:7-23.

B’a mira con Yehova a proteha su Yiu?— Segun bo, ken ta manera e puyitonan cu nan mama a sconde den mata, of manera Hesus tempo cu e tawata mucha chikito? Abo no ta manera nan?— Tin persona cu kier haci abo tambe daño. Bo sa ken?—

Bijbel ta bisa cu Satanas ta manera un leon cu ta gruña, y cu e kier come nos. Anto mescos cu leon gusta busca bestia chikito pa come, Satanas cu su demoñonan tambe gusta haci malo contra mucha chikito. (1 Pedro 5:8) Pero Yehova tin mas forsa cu Satanas. Yehova por proteha su muchanan y drecha cualkier cos malo cu Satanas haci nan.

Bo ta corda kico Capitulo 10 di e buki aki a bisa cu Diabel y su demoñonan ta purba pone nos haci?— Si, nan ta purba pone nos tene e tipo di relacion sexual cu Dios a bisa cu ta malo. Pero, ta ken so tin mag di tene relacion sexual?— Si, un hende homber y un hende mohe cu ta casa cu otro.

Ta tristo pa bisa, pero tin hende grandi cu gusta tene relacion sexual cu mucha. Ora esei pasa, e mucha por cuminsa haci cos malo cu el a siña serca e hende grandi ei. E tambe por cuminsa uza e parti sexual, of priva, di su curpa pa haci cos cu no tin mag. Ta esei a pasa hopi tempo pasa den e stad cu yama Sodoma. Bijbel ta bisa cu e hendenan den e stad ei, “tanto hoben como bieu”, a purba tene relacion sexual cu dos homber cu a bin bishita Lot.—Genesis 19:4, 5.

Pesei, mescos cu Hesus tawatin mester pa nan proteha e, abo tambe tin mester pa nan proteha bo di hende grandi y asta di otro mucha cu por purba tene relacion sexual cu bo. Hopi bes e hendenan ei ta purba haci manera cos cu nan ta bo amigo. Tin biaha nan ta asta ofrece bo un cos si bo priminti nan cu bo no ta bisa ningun hende kico nan kier haci cu bo. Pero e hendenan ei ta egoista mescos cu Satanas y su demoñonan, y e unico cos cu nan kier ta haya placer pa nan mes. Anto nan ta purba haya placer door di tene relacion sexual cu mucha. E cos ei ta masha malo mes!

Bo sa kico nan por purba haci pa nan haya placer?— Wel, nan por purba frega bo parti priva di curpa. Of nan por asta purba frega nan parti priva di curpa contra esun di bo. Pero nunca bo no mester laga ningun hende hunga cu bo penis of cu bo vagina; ni bo ruman homber, ni bo ruman mohe, ni bo mama ni bo tata. Corda cu e partinan ei di bo curpa ta priva.

Con bo por proteha bo curpa contra hende cu ta haci cos malo asina?— Pa di prome, no laga ningun hende hunga cu e parti priva di bo curpa. Si un hende purba hacie, bis’e sin miedo y cu un stem duro: “Stop! Mi ta bai bisa riba bo!” Anto si e hende bisa cu e cos cu a pasa ta bo falta, no ker’e. No ta berdad. Djis bai bisa riba dje numa. No worry ta ken e ta! Bo mester bai bisa riba dje asta si e bisa bo cu e cos cu boso ta haci hunto ta un secreto di boso dos so. Asta si e priminti bo un nechi regalo, of bisa bo cos pa spanta bo, toch bo tin cu hui for di dje y bai conta un hende kico el a haci.

Bo no mester tin miedo, pero bo mester tene cuidou si. Ora bo mama cu bo tata spierta bo pa no bai serca cierto hende of no bai cierto luganan pasobra nan por ta peligroso pa bo, bo tin cu tende di nan. Si bo tende di nan, bo no ta duna mal hende chens di haci bo daño.