Hesus A Lanta Hende Morto

E MUCHA muher cu bo ta mira ei tin 12 aña di edad. Hesus ta tene su man, y su mama cu su tata ta para cerca dje. Bo sa pakico nan ta asina felis? Laga nos mira.

E tata di e mucha muher ta un homber importante yama Jairo. Un dia su yiu a bira malo, y nan a pon’e drumi. Pero e no a mehora. El a sigui bira mas y mas malo. Jairo cu su esposa a bira hopi precupa, pasobra a parce cu nan yiu lo muri. Nan tabatin un yiu so. P’esei Jairo a bai busca Hesus. El a tende di e milagernan cu Hesus tabata haci.

Ora Jairo a haya Hesus, tabatin un multitud grandi rond di dje. Pero Jairo a pasa dor di e multitud y a cai na pia di Hesus. El a bisa: ‘Mi yiu ta hopi, hopi malo.’ El a roga: ‘Por fabor, bin cur’e.’ Hesus a bis’e cu e lo bini.

Mientras cu nan tabata cana e multitud a sigui pusha pa yega mas cerca. Diripiente Hesus a para. El a puntra: ‘Ken a mishi cu mi?’ Hesus a sinti poder sali for di dje, y p’esei el a sa cu un hende a mishi cu ne. Pero ken? Esei ta un señora cu tabata hopi malo pa 12 aña caba. El a yega y a mishi cu paña di Hesus, y a ser cura!

Esei a haci Jairo sintie mihor pasobra el a mira con facil tabata pa Hesus cura hende. Anto un mensahero a yega. El a bisa Jairo: ‘No molestia Hesus mas. Bo yiu a muri.’ Hesus a tende esei y a bisa Jairo: ‘No precupa bo, lo e bira bon.’

Ora cu finalmente nan a yega na e cas di Jairo, e hendenan tabata yora di gran tristesa. Pero Hesus a bisa: ‘No yora. E yiu no a muri. Ta drumi e ta drumi.’ Pero nan a hari y a tene mofa di Hesus, pasobra nan tabata sa cu el a muri.

Anto Hesus a bai cu e tata y mama di e mucha y tres apostel den e camber caminda e mucha tabata drumi. El a tuma su man y a bisa: ‘Lanta!’ Y el a bolbe na bida, manera bo ta mira ei. Anto el a lanta y a cana! P’esei su mama cu su tata ta asina felis.

Esei no ta e prome hende cu Hesus a lanta for di morto. Esun prome cu Bijbel ta menciona ta e yiu homber di un viuda cu a biba den e stad Nain. Despues, Hesus a lanta Lazaro, ruman homber di Maria y Marta, tambe for di morto. Ora Hesus ta reina como e rei di Dios, lo e trece bek na bida masha hopi hende cu a muri. Nos por ta contento cu e lo haci esei, no ta berdad?