Nos Por Lanta for di Morto!

SI NOS muri, bo ta kere cu Dios lo kier resusita nos, esta, pone nos biba bek?— Un bon hende cu yama Job tawata kere cu si. Pesei, ora Job a kere cu e ta bai muri, el a bisa Dios: “Abo lo yama, y ami lo contesta bo.” Job a bisa cu Yehova Dios lo anhela di resusit’e, esta, cu Dios lo sinti masha hopi gana di resusit’e.—Job 14:14, 15.

Hesus ta sinti mescos cu su Tata Yehova Dios. Hesus tambe kier yuda nos. Un homber cu lepra a bis’e: “Si bo kier, bo por haci mi bira limpi.” Anto Hesus a contest’e: “Mi kier”, y el a cura e homber di su lepra.—Marco 1:40-42.

Hesus ta stima mucha, y ta for di su Tata el a siña esei. Na dos ocasion, hopi tempo pasa, Yehova a yega di uza su sirbidonan pa resusita mucha. Un di nan tawata Elias. El a roga Yehova pa resusita yiu homber di un hende mohe cu a trat’e bon. Anto Yehova a resusit’e, manera Elias a pidi. Y Yehova a uza su sirbido Eliseo tambe pa resusita un mucha homber chikito.—1 Reinan 17:17-24; 2 Reinan 4:32-37.

No ta dushi pa sa cu Yehova ta stima nos asina tanto?— No ta ora nos ta na bida so e ta pensa riba nos. Asta si nos muri e ta corda riba nos. Hesus a bisa cu pa su Tata, hende morto cu e ta stima ta como si fuera bibo! (Lucas 20:38) Bijbel ta bisa cu ‘ni morto, ni bida, ni cos cu tin aworaki, ni cos cu tin cu bin ainda no por separa nos for di e amor di Dios.’—Romanonan 8:38, 39.

Tempo cu Hesus tawata na tera, el a mustra cu Yehova tin interes den mucha chikito. Manera bo por ta corda, Hesus a tuma tempo pa papia cu mucha tocante Dios. Pero bo tawata sa cu Dios a duna Hesus poder pa lanta mucha for di morto?— Ban papia di un biaha cu Hesus a resusita e yiu mohe di 12 aña di un homber cu yama Jairo.

Jairo tawata biba banda di Lama di Galilea cu su casa y cu nan unico yiu. Un dia e mucha mohe a bira hopi malo, y Jairo por a mira cu e ta bai muri. E ora ei Jairo a cuminsa pensa riba Hesus. El a tende cu Hesus ta un homber masha special, y cu e por cura hende. Awel, Jairo a sali bai busc’e. El a haya Hesus canto di Lama di Galilea, siñando yen di hende.

Jairo a pusha pasa meimei di e hendenan, anto a cai na rudia dilanti di Hesus. El a bisa Hesus: ‘Mi yiu mohe chikito ta serca di muri. Bo por bin yud’e, por fabor? Mi ta roga bo.’ Hesus a bai mesora hunto cu Jairo. E grupo di hende cu a bin mira e Gran Maestro tambe a bai nan tras. Ma un rato so despues cu nan a cuminsa cana bai, un par di homber a bin for di cas di Jairo y bis’e: “Bo yiu mohe a muri; pakico sigui molestia e maestro?”

Hesus a tende loke e hombernan a bisa Jairo. E tawata sa con tristo Jairo mester a sinti awor cu el a perde su unico yiu. Pesei Hesus a bis’e: ‘No tene miedo. Djis tene fe den Dios, y bo yiu mohe lo bira bon.’ Nan a sigui bai te ora nan a yega cas di Jairo. Tawatin amigo di e famia na e cas, y nan tawata yora. Nan tawata tristo pasobra nan amiguita a muri. Pero Hesus a bisa nan: ‘Stop di yora. E mucha no a muri. Ta na soño e ta.’

Ora e hendenan a tende kico Hesus a bisa, nan a cuminsa hari, pasobra nan tawata sa cu ta muri e mucha a muri. Ma dicon anto bo ta kere cu Hesus a bisa nan cu ta drumi e ta?— Ki les bo ta kere cu e kier a siña nan?— E tawata kier pa nan sa cu morto por ta mescos cu un soño profundo. E tawata kier siña nan cu e poder di Dios por a yud’e pone un hende morto biba bek, mes facil cu nos por lanta un hende for di soño.

Hesus a pidi tur hende sali for di e cas. E unico hendenan cu a keda ta su apostelnan Pedro, Santiago y Huan, y e tata cu e mama di e mucha mohe. E ora ei el a bai caminda e mucha ta. El a tene su man y bis’e: ‘Hobensita, lant’ariba!’ Mesora e mucha a lanta para y cuminsa cana! Su tata cu su mama a bira loco di contento.—Marco 5:21-24, 35-43; Lucas 8:40-42, 49-56.

Awor, pensa un ratu. Si Hesus por a lanta e mucha mohe for di morto, e por haci mescos pa otro hende tambe?— Bo ta kere cu e ta bai hacie di berdad?— Si, e ta bai hacie. Hesus mes a bisa: “E ora lo yega den cual tur cu ta den graf lo tende [mi] bos, y lo sali.”—Huan 5:28, 29.

Bo ta kere cu Hesus kier resusita hende?— Un otro ehempel den Bijbel ta yuda contesta e pregunta ei. Un cos cu a pasa un dia, serca di e stad Nain, ta mustra nos con Hesus ta sinti pa hende cu ta tristo ora di entiero.

Un señora tawata saliendo for di Nain hunto cu un grupo di hende pa bai dera su yiu. Prome su casa a muri, anto awor su unico yiu tambe a muri. Esta tristo e señora tawata! Hopi hende di Nain tawata cana nan tras segun cu nan tawata hiba curpa di su yiu homber pafo di e stad. E señora tawata yora, y no tawatin nada cu e hendenan por a haci pa consol’e.

E dia ei, net Hesus cu su disipelnan tawata yegando Nain. Serca di e porta di stad nan a topa e grupo di hende cu tawata bai pa dera e señora su yiu. Ora Hesus a mira e señora ta yora, el a sinti duele di dje. E gran tristesa di e señora a toca Hesus su curason, y e kier a yud’e.

Pesei, el a papia cu ne na un manera suave, pero toch suficiente firme pa e tende. El a bis’e: “No yora.” Loke el a bisa, y e manera cu el a bis’e, a pone tur hende cuminsa wak e cu atencion. Hesus a cana bai caminda e curpa ta. Nan tur lo a puntra nan mes ta kico e ta bai haci. Hesus a bisa: “Hoben, mi ta bisa bo: Lanta!” Mesora el a lanta sinta! Anto el a cuminsa papia tambe.—Lucas 7:11-17.

Imagina bo con e señora a sinti! Con abo lo sinti si un hende cu bo ta stima lanta bek for di morto?— E cos ei no ta mustra nos cu Hesus ta stima hende di berdad, y cu e kier yuda nos?— Djis imagina bo con dushi lo ta den Dios su mundo nobo ora hende lanta for di morto anto nos duna nan bonbini!—2 Pedro 3:13; Revelacion 21:3, 4.

E tempo ei, algun di e hendenan cu resusita lo ta hende cu nos conoce, y lo tin mucha tambe den nan. Nos lo reconoce nan mescos cu Jairo a reconoce su yiu mohe ora Hesus a resusit’e. Anto lo tin hende cu a muri hopi shen aña pasa tambe, of asta miles di aña pasa. Pero Dios no ta lubida riba nan djis pasobra ta hopi tempo pasa nan a biba.

No ta dushi pa sa cu Yehova Dios y su Yiu Hesus ta stima nos asina tanto?— Nan kier pa nos biba, anto no pa un par di aña so, sino pa semper!