Yudansa for di “e Dios Cu Ta Duna Perseverancia y Consuelo”

UN 2.000 aña pasa, e escritor biblico Pablo a describi Jehova como “e Dios cu ta duna perseverancia y consuelo.” (Romanonan 15:5, NW) Siendo cu Bijbel ta sigura nos cu Jehova no ta cambia cu pasamento di tempo, nos por tin e confiansa cu te awe Dios ta duna consuelo na hende cu ta sirbie. (Santiago 1:17) De echo, Bijbel ta revela cu Jehova ta duna consuelo den varios manera na hende cu tin mester di esei. Cua ta algun di e maneranan aki? Dios ta duna fortalesa na esnan cu acudi na dje den oracion y pidie yudansa. Ademas, e ta motiva cristiannan berdadero pa duna consuelo na nan rumannan den fe. Y den su Palabra, Bijbel, el a percura relatonan alentador cu ta fortalece specialmente hende cu ta desconsola debi cu nan a perde un yiu. Laga nos considera e tres formanan aki di consuelo un pa un.

Jehova “A Tend’e”

Rei David a skirbi tocante nos Creador, Jehova: “Confia den dje na tur tempo, o pueblo; drama boso curason su dilanti; Dios ta un refugio pa nos.” (Salmo 62:8) Pakico David tabatin asina tanto confiansa den Jehova? Papiando tocante su mes, David a skirbi: “E pober hende aki a sclama y [Jehova] a tend’e, y a salb’e for di tur su angustianan.” (Salmo 34:6) Den tur e situacionnan angustioso cu David a pasa, semper el a haci oracion pa pidi Dios yudansa, y semper Jehova a yud’e. David tabata sa di experencia cu Dios lo sosten’e y yud’e persevera.

Mayornan desconsola mester sa cu Jehova lo sostene nan durante di tristesa intenso, mescos cu el a sostene David. Nan por acerca e gran ‘Scuchador di oracion’ cu e confiansa cu lo e yuda nan. (Salmo 65:2) Willliam, cita den e articulo anterior, a remarca: “Hopi biaha mi a sinti cu mi no por a sigui biba mas sin mi yiu homber, y mi a pidi Jehova duna mi alivio. Semper el a duna mi e fortalesa y curashi pa sigui biba.” Si bo tambe haci oracion na Jehova cu fe, e gran Dios di shelo lo sostene bo. No lubida cu Jehova Dios ta priminti esnan cu ta haci esfuerso pa sirbie: “Ami ta [Jehova] bo Dios, kende ta sostene bo man drechi, kende ta bisa bo: ‘No tene miedo, lo mi yuda bo.’”—Isaias 41:13.

Sosten di Amigonan Berdadero

Hopi biaha mayornan cu a perde un yiu tin mester di tempo pa yora morto di nan yiu den priva y pa compronde nan mes sintimentonan. Sinembargo, lo no ta sabi pa nan evita compania di otro hende pa un periodo largo. Segun Proverbionan 18:1, “esun cu isola su mes” lo por perhudica su mes. P’esei, hende desconsola mester tene cuidou pa nan no cai den e trampa di isola nan mes.

Amigonan temeroso di Dios por ta un gran yudansa pa esnan cu ta sufriendo. Proverbionan 17:17 ta declara: “Un amigo ta stima tur ora bai, y un ruman ta naci pa tempo di adversidad.” Lucy, menciona tambe den e articulo anterior, a experencia e consuelo cu amigonan berdadero a dun’e despues di morto di su yiu. Comentando riba su amigonan den congregacion, el a bisa: “Nan bishitanan a yuda hopi, aunke tin biaha casi nan no tabata papia. Un amiga tabata bishita mi riba e dianan cu mi tabata mi so. E tabata sa cu lo mi ta na cas ta yora, y hopi biaha e tabata pasa y sinta yora hunto cu mi. Un otro tabata yama mi tur dia pa anima mi. Anto tabatin otronan cu a invita nos bin come cerca nan, y nan a sigui haci esei.”

Aunke e dolor profundo cu mayornan ta sinti ora nan perde un yiu no ta bai facilmente, oracion na Dios y asociacion cu berdadero amigonan cristian lo duna berdadero consuelo na esnan desconsola. Masha hopi mayor cristian cu a perde un yiu ta ripara cu Jehova ta cu nan. Si, Jehova “ta cura esnan di curason kibra, y ta mara nan heridanan.”—Salmo 147:3.

Relatonan di Bijbel Cu Ta Duna Consuelo

Banda di oracion y asociacion edificante, e Palabra skirbi di Dios tambe ta un fuente di consuelo pa hende cu a perde un ser keri. Relatonan di Bijbel ta revela cu Hesus tabatin e deseo profundo y e capasidad pa elimina e dolor di mayornan dor di resusita nan mortonan. E relatonan ei ta duna berdadero consuelo na hende desconsola. Laga nos considera dos di e relatonan ei.

Lucas capitulo 7 ta describi kico a sosode ora Hesus a topa un procesion di entiero den e stad di Nain. E hendenan tabata bai dera e unico yiu homber di un viuda. Versiculo 13 ta declara: “Ora Señor a mir’e [e viuda], el a sinti compasion p’e, y a bis’e: ‘No yora.’”

Ta masha poco hende lo tribi bisa un mama na entiero di su yiu homber pa e stop di yora. Dicon Hesus a bisa esei? Pasobra e tabata sa cu e tristesa di e mama tabata a punto di disparce. E relato ta sigui bisa: “[Hesus] a yega cerca y a mishi cu e caha di morto; y e cargadonan di morto a keda para. Y el a bisa: ‘Hoben, mi ta bisa bo: Lanta!’ Y e morto a lanta sinta y a cuminsa papia. Y Hesus a entreg’e bek na su mama.” (Lucas 7:14, 15) Na e momento ei, e mama lo mester a cuminsa yora atrobe, pero e biaha aki di goso!

Na un otro ocasion, un homber cu yama Jairo a acerca Hesus y a pidie yuda su yiu muher di 12 aña cu tabata gravemente malo. Poco despues, nan a bin bisa Jairo cu e mucha a muri. E noticia aki a kibra Jairo su curason, pero Hesus a bis’e: “No tene miedo, kere solamente.” Na cas di e famia, Hesus a bai cerca e curpa sin bida y a cohe e mucha na su man y a bisa: “Mucha, mi ta bisa bo, lanta!” Kico a pasa? “Mesora e mucha muher a lanta y a cuminsa cana.” Con su mayornan a reacciona? “Nan tabata for di nan mes di gran excitacion.” [NW] Ora Jairo cu su casa a brasa nan yiu muher, nan a sinti un felicidad profundo. Ta como si fuera nan tabata soña.—Marco 5:22-24, 35-43.

E relatonan biblico detaya aki tocante e resureccion di mucha ta mustra mayornan desconsola awe kico nan por spera den futuro. Hesus a bisa: “E ora lo yega den cual tur cu ta den graf lo tende su bos, y lo sali.” (Juan 5:28, 29) Jehova su proposito ta pa su Yiu duna bida na esnan cu a muri. Miles di miyones di mucha cu a muri lo “tende su bos” ora e declara na nan: “Mi ta bisa bo, lanta!” E muchanan ei lo bolbe cuminsa cana y papia. Anto mescos cu Jairo cu su casa, e mayornan di e muchanan ei lo ta “for di nan mes di gran excitacion.”

Si abo a perde un yiu homber of un yiu muher, corda cu pa medio di e resureccion Jehova por cambia bo tristesa den goso. Pa beneficia di e speransa glorioso aki, obedece e apelacion di e salmista: “Busca [Jehova] y su fortalesa; busca su cara continuamente. Corda su echonan maraviyoso cu el a haci, su milagernan.” (Salmo 105:4, 5) Si, sirbi e Dios berdadero, Jehova, y ador’e manera cu e ta acepta.

Kico lo bo haya mesora si bo ‘busca Jehova’? Lo bo haya fortalesa mediante oracion na Dios, e interes amoroso di berdadero compañeronan cristian lo ta un consuelo pa bo y un estudio di e Palabra di Dios lo anima bo. Es mas, den futuro cercano, lo bo experencia e ‘echonan maraviyoso y milagernan’ cu Jehova lo efectua pa bo beneficio eterno y pa beneficio di e yiu cu bo a perde.

[Cuadro na pagina 5]

“Trece e Señora Cu A Perde Dos Yiu”

Kehinde cu Bintu, un pareha Nigeriano cu ta Testigo di Jehova, a perde dos di nan yiunan den un accidente di auto. For di e dia ei nan ta sufri debi na e perdida teribel aki. Pero asina mes, nan confiansa den Jehova ta sostene nan, y nan ta sigui comparti Bijbel su mensahe di speransa cu nan prohimo.

Otro hende a tuma nota di e serenidad y fortalesa cu Kehinde y Bintu a demostra. Un dia un tal Sra. Ukoli a bisa un di e amiganan di Bintu: “Bin cu e señora kende su dos yiunan a muri pareu y cu te ainda ta predica e mensahe di Bijbel. Mi kier sa ta kico ta dun’e forsa pa persevera.” Ora Bintu a yega na cas di Sra. Ukoli, esaki a bis’e: “Mi kier sa dicon bo ta predica keto bai tocante e Dios cu a mata bo yiunan. Dios a tuma mi unico yiu muher. For di e dia ei, mi no tin nada mas di haci cu Dios.” Bintu a uza Bijbel pa splic’e pakico hende ta muri y pakico nos por tin e speransa sigur cu nos sernan keri cu a muri lo ser resusita.—Echonan 24:15; Romanonan 5:12.

Despues, Sra. Ukoli a bisa: “Mi tabata pensa cu ta Dios ta tuma hende ora nan muri. Awor mi sa e berdad.” El a dicidi di studia Bijbel cu Testigonan di Jehova pa e por siña mas tocante e promesanan di Dios.

[Cuadro na pagina 6]

‘Mi Kier Yuda, Pero Mi No Sa Con’

Mientras cu mayor- y rumannan di un mucha cu a muri ta sinti gran tristesa, nan amistadnan kisas ta sinti miedo. Nan kier sostene e famia pero nan tin miedo di bisa of haci algo robes cu lo haci e situacion mas doloroso di loke e ta caba. Aki ta sigui algun sugerencia pa e hendenan cu kisas ta pensa: ‘Mi kier yuda, pero mi no sa con.’

❖ No evita di bai cerca un famia cu a perde un ser keri djis pasobra bo no sa sigur kico pa bisa of pa haci. Bo presencia so caba ta duna nan fortalesa. Bo no sa kico pa bisa? Un abraso, acompaña pa e palabranan sincero “ta duel mi masha hopi”, ta laga nan sa cu bo ta interesa den nan. Bo tin miedo cu si bo cuminsa yora, lo bo haci nan mas tristo? Bijbel ta bisa: “Yora cu esnan cu ta yora.” (Romanonan 12:15) Bo lagrimanan ta mustra cu bo ta comparti nan tristesa, y esei ta un consuelo.

❖ Tuma iniciativa. Bo por prepara un cuminda simpel pa e famia? Bo por laba e tayonan cu a para bira hopi? Bo por haci algun rospondi pa nan? No bisa nan: “Laga mi sa si boso mester di cualkier cos.” Asta ora bo bisa esei sinceramente, e palabranan ei ta laga hopi mayor cu ta den tristesa compronde cu bo ta mucho ocupa pa yuda nan. En bes di esei, puntra: “Kico mi por haci pa yuda bo aworaki?” Anto cumpli cu nan peticion. Pero evita di bai sin nan permit den e areanan priva di cas of di entremete den nan bida.

❖ Evita di bisa: “Mi sa con bo ta sinti.” Cada hende ta reacciona otro riba e morto di un ser keri. Maske bo tambe kisas a yega di perde un yiu, bo no sa precies con nan ta sinti.

❖ Ta despues di hopi tempo e famia lo cuminsa sinti cu nan tin un bida normal atrobe. Sigui yuda nan te caminda bo por. Na principio, e famia cu a sufri e perdida ta haya masha hopi atencion, pero nan tin mester di mas cu esei so. Sigui presta atencion na nan necesidadnan den e simannan y lunanan cu ta sigui.a

[Nota]

[Plachi na pagina 7]

Relatonan di Bijbel ta mustra cu Hesus tin e poder y e deseo di resusita mucha