E Gran Maestro A Sirbi Hende

BO NO ta gusta ora un hende haci un cos bon pa bo?— Wel, otro hende tambe ta gusta ora un hende haci cos bon pa nan. Nos tur ta gusta esei. E Gran Maestro tawata sa esei, y tur ora e tawata haci cos pa hende. El a bisa: ‘Mi a bini, no pa hende sirbi mi, ma pa ami sirbi hende.’—Mateo 20:28.

Pesei, si nos kier ta manera e Gran Maestro, kico nos mester haci?— Nos mester sirbi hende. Nos tin cu haci cos bon pa nan. Ta berdad cu hopi hende no ta hacie. Mayoria hende asta kier pa otro hende sirbi nan tur ora bai. Un tempo, asta e siguidonan di Hesus tawata pensa asina. Nan tur tawata kier ta esun mas importante.

Un dia Hesus tawata cana cu su disipelnan, esta, su siguidonan. Ora nan a yega den e stad di Capernaum, banda di Lama di Galilea, nan tur a drenta un cas. Ora nan tawata paden Hesus a puntra nan: “Ta kico boso tawata discuti na caminda?” Nan a keda keto, pasobra loke nan tawata pleita ariba ta tocante cua di nan ta esun di mas importante.—Marco 9:33, 34.

Hesus tawata sa cu no ta bon pa ningun di su disipelnan sinti su mes mas importante cu e otronan. Pesei, manera nos a siña den e prome capitulo di e buki aki, el a pone un mucha chikito para meimei di nan, y a bisa cu nan mester ta humilde manera e chikitin ei. Pero asina mes nan no a siña. Pesei, poco prome cu Hesus a muri el a siña nan un les cu nan lo no a lubida nunca mas. Ta kico el a haci?—

Wel, ora nan tawata come hunto, Hesus a lanta for di mesa y a kita su paña djariba, esta, un cos manera un mantel. El a coi un serbete anto lor’e rond di su custia. Despues el a coi un ponchera y yen’e cu awa. Su siguidonan lo mester a puntra nan mes ta kico e ta bai haci. Hesus a pasa serca nan un pa un, sak abou, laba nan pia, anto caba, seca nan pia cu e serbete tanten cu nan a sinta wak. Imagina bo! Con abo lo a sinti bo si bo tawat’ei hunto cu nan?—

Su siguidonan no a haya cu ta bon pa e Gran Maestro sirbi nan asina. Nan a sinti berguensa. Pedro no tawata kier mes pa Hesus haci e cos humilde aki p’e. Pero Hesus a bisa cu ta importante pa e laba Pedro su pia.

Awendia no ta normal pa nos laba pia di otro. Pero tempo Hesus tawata riba tera si hende tawata hacie. Bo sa dicon?— Wel, na e tera caminda Hesus cu su siguidonan tawata biba, hende tawata bisti sandalia, y nan no tawata bisti meya. Ora nan tawata cana riba caminda di tera, nan pia tawata yena cu stof. Pesei, tawata lief di bo parti si bo a laba pia di hende pa kita stof ora nan bin bo cas.

Pero e biaha aki ningun di Hesus su disipelnan no a ofrece pa laba pia di e otronan. Pesei Hesus mes a hacie. Door di haci esei, Hesus a siña su siguidonan un les importante. E tawata un les cu nan mester a siña. Y nos cu ta biba awendia tambe mester siñ’e.

Bo sa kico e les ta?— Despues cu Hesus a bisti su paña djariba bek y a bai sinta bek na mesa, el a splica nan: “Boso sa kico mi a haci cu boso? Boso ta yama mi Maestro y Señor; y boso tin rason, pasobra esei mi ta. Si ami anto, e Señor y Maestro, a laba boso pia, boso tambe mester laba pia di otro.”—Huan 13:2-14.

E Gran Maestro a mustra aki cu e tawata kier pa su siguidonan sirbi otro. E no tawata kier pa nan pensa riba nan mes so. E no tawata kier pa nan kere cu nan ta asina importante cu semper ta otro hende mester sirbi nan. E tawata kier pa nan ta dispuesto pa sirbi hende.

Bo no ta haya cu e cos ei ta un bon les?— Abo ta bai haci mescos cu e Gran Maestro? Bo ta bai sirbi hende?— Nos tur por haci cos pa hende. Si nos haci asina, nan lo keda contento. Pero e cos di mas importante ta cu Hesus y su Tata lo keda contento.

Sirbi hende no ta un cos dificil. Si bo paga tino lo bo ripara cu tin hopi cos cu bo por haci pa hende. Awor, pensa un rato: Kico bo por haci pa yuda bo mama? Manera bo sa, e ta haci hopi cos pa bo y bo famia. Bo ta kere cu bo por yud’e?— Kisas bo por puntr’e si bo tin mag di yud’e.

Kisas bo por drecha mesa prome cu boso bai come. Of kisas bo por kita e tayonan sushi for di mesa ora boso caba di come. Tin mucha ta hiba saco di sushi pafo tur dia. Djis haci loke bo por, y lo bo ta sirbiendo hende mescos cu Hesus a haci.

Bo tin ruman chikito cu bo por haci cos p’e? Corda cu Hesus e Gran Maestro a sirbi asta su siguidonan. Si bo sirbi bo rumannan chikito, lo bo ta haciendo mescos cu Hesus. Kico bo por haci pa nan?— Por ta bo por yuda nan warda nan co’i hunganan ora nan caba di hunga. Of bo por yuda nan bisti paña. Of bo por yuda nan drecha nan cama. Bo por pensa mas cos cu bo por haci pa nan?— Nan lo stima bo si bo haci e cosnan aki, mescos cu Hesus su siguidonan a stima Hesus.

Na scol tambe bo por haci cos pa hende. Bo por haci cos pa e muchanan den bo klas of pa bo maestro. Si un hende laga su bukinan cai, lo ta lief di bo parti si bo yud’e hisa nan. Lo bo por ofrece bo maestro pa bo veeg borchi p’e of pa bo haci otro cos. Djis tene porta habri pa hende pasa tambe ta un bon manera pa sirbi hende.

Tin bes nos lo nota cu hende no ta bisa nos danki ora nos sirbi nan. Bo ta kere cu e cos ei mester pone nos stop di haci cos bon?— No! Hopi hende no a bisa Hesus danki pa e cosnan bon cu el a haci. Pero esei no a stop e di haci bon.

Pesei, nunca nos no mester stop di sirbi hende. Laga nos corda riba Hesus, e Gran Maestro, y purba sigui su ehempel semper.