“Mi A Duna Boso un Ehempel”

“Pa e tempo aki ya boso mester tawata maestronan caba.”—HEBREONAN 5:12.

1. Dicon ta natural pa e palabranan na Hebreonan 5:12 pone un cristian precupa un tiki?

BO TA precupa un tiki tocante bo mes ora bo lesa e palabranan inspira di e texto principal di nos les? Si ta asina, bo no ta bo so. Como siguido di Cristo, nos sa cu nos mester ta maestro. (Mateo 28:19, 20) Nos sa cu e tempo cu nos ta biba aden ta pone cu ta urgente pa nos siña hende lo miho cu nos por. Y nos sa cu loke nos siña nan por asta nifica bida of morto! (1 Timoteo 4:16) Pesei, ta natural pa nos puntra nos mes: ‘Mi ta un maestro manera lo mi mester ta? Con mi por bira un miho maestro?’

2, 3. (a) Con un maestro a splica kico ta necesario pa instrui hende bon? (b) Ki ehempel Hesus a laga atras pa nos relaciona cu siñamento?

² Pero e precupacion ei no tin nodi desanima nos. Si nos ta pensa cu nos habilidad di instrui hende ta depende di cierto tecnicanan cu nos mester siña, kisas en berdad nos lo por desanima ora nos pensa cu nos tin cu bira miho maestro. Pero pa nos siña hende bon, nos tin mester di algo mucho mas importante cu tecnica. Wak kico un maestro cu experencia a skirbi den un buki riba e tema aki: “Cu bo ta instrui hende bon of no, no ta depende di e tecnica ni e estilo cu bo uza, ni di bo plannan ni di loke bo haci. . . . Siña hende tin di aber na prome luga cu amor.” Claro cu e maestro aki no a papia for di un punto di bista religioso. Sinembargo, loke e ta bisa por conta asta mas tanto pa e tipo di siñamento cu nos como cristiannan ta duna. Dicon?

³ Nos Ehempel di un maestro ta nada menos cu Hesucristo, kende a bisa su siguidonan: “Mi a duna boso un ehempel.” (Huan 13:15) Ei e tawata papiando di e ehempel di humildad cu el a duna. Pero definitivamente, e trabou principal cu el a haci como hende riba tera, esta, e trabou di siña hende e bon nobo di e Reino di Dios, tambe a forma parti di e ehempel cu Hesus a laga atras pa nos. (Lucas 4:43) Awor, si bo mester scohe un solo palabra pa describi e ministerio di Hesus, casi sigur lo bo scohe e palabra “amor”, no ta asina? (Colosensenan 1:15; 1 Huan 4:8) E amor cu Hesus tawatin pa su Tata celestial Yehova tawata na prome luga. (Huan 14:31) Pero como maestro, Hesus a mustra amor den dos otro manera mas. El a stima e berdadnan cu e tawata siña, y el a stima e hendenan cu e tawata siña. Laga nos concentra un tiki mas riba e dos aspectonan aki di e ehempel cu el a laga pa nos.

Un Amor for di Hopi Tempo pa e Berdadnan di Dios

4. Con Hesus a desaroya amor pa e siñansanan di Yehova?

⁴ E actitud cu un maestro tin tocante e tema cu e ta siña por tin hopi influencia riba e calidad di su siñamento. Si e ta indeferente, asta djis un tiki so, casi sigur su alumnonan lo nota esei, y nan tambe lo bira indeferente. Hesus no a sinti ningun tiki indeferencia pa e berdadnan precioso cu el a siña hende tocante Yehova y Su Reino. Hesus a sinti un amor profundo pa e tema cu e tawata siña hende. E amor ei a desaroya for di tempo cu e mes a siña e berdadnan ei como alumno. Durante tur e miles di añanan cu e Yiu unigenito a existi prome cu el a bira un ser humano, semper e tawata ansioso pa siña. Isaias 50:4 y 5 ta contene e palabranan apropiado aki: “Señor DIOS a duna mi un lenga cu a wordo siña, pa mi sa con pa sostene cu palabra esun cu ta cansa. E ta spierta mi mainta tras mainta; e ta spierta mi horea pa tende manera un cu ta wordo siña. Señor DIOS a habri mi horea; mi no tawata desobedecido, ni mi no a hala atras.”

5, 6. (a) Aparentemente, kico Hesus a experimenta ora el a batisa, y ki efecto esei tawatin riba dje? (b) Ki diferencia skerpi tin den e manera cu Hesus a uza e Palabra di Dios, y e manera cu Satanas a uz’e?

⁵ Tempo cu e tawata crece como ser humano riba tera, Hesus a sigui stima e sabiduria di Dios. (Lucas 2:52) Despues, na su bautismo, el a experimenta algo unico. Segun Lucas 3:21, “shelo a habri.” Parce cu ta na e momento ei Hesus a recupera memoria di su existencia prome cu el a bini na tera como hende. Despues el a pasa 40 dia ta yuna den desierto. Lo e mester a disfruta masha di medita riba tur e biahanan cu Yehova a instru’e den shelo. Pero djis despues di esei su amor pa e berdadnan di Dios a ser poni na prueba.

⁶ Ora Hesus tawata cansa y hambra, Satanas a busca moda di hinc’e den tentacion. Wak ki un diferencia grandi tawatin entre e dos yiunan di Dios ei! Tur dos a cita e Scritura Hebreo, pero cada un cu un actitud completamente diferente. Satanas a troce e Palabra di Dios. Sin ningun tiki respet, el a uz’e pa su propio metanan egoista. Tur loke e rebelde ei a sinti pa e berdadnan di Dios ta desprecio. Di otro banda, ora Hesus a cita e Scritura, su amor p’e a keda bisto. El a uza e Palabra di Dios cuidadosamente cada bes cu el a duna contesta. Hesus a existi hopi prome cu e palabranan inspira ei a ser skirbi pa di prome bes, y sinembargo el a respeta nan profundamente. Nan tawata berdadnan precioso di su Tata celestial! El a bisa Satanas cu Yehova su palabranan tawata asta mas importante cu cuminda. (Mateo 4:1-11) Si, Hesus a stima tur e berdadnan cu Yehova a siñ’e. Pero con el a mustra e amor ei den su trabou como maestro?

Amor pa e Berdadnan Cu El A Siña Hende

7. Dicon Hesus no a inventa su propio siñansanan?

⁷ Semper e amor cu Hesus tawatin pa loke el a siña hende tawata bisto. Nos tin cu corda cu, con cu bai bin, lo e por a bini cu algun idea propio. E tawatin masha hopi conocemento y sabiduria. (Colosensenan 2:3) Sinembargo, el a keda corda su scuchadonan cada bes cu loke e tawata siña nan no a bini di dje mes, sino di su Tata celestial. (Huan 7:16; 8:28; 12:49; 14:10) E tawata stima Dios su berdadnan mucho hopi pa e pone su propio ideanan na nan luga.

8. Con Hesus a duna un ehempel for di comienso di su ministerio pa nos depende riba e Palabra di Dios?

⁸ For di ora cu Hesus a cuminsa cu su ministerio publico el a pone un ehempel. Nota con el a declara na e pueblo di Dios pa di prome bes cu e ta e Mesias priminti. Kico el a haci? El a djis sali dilanti un multitud, proclama cu e ta Cristo, anto haci milager espectacular pa proba nan loke el a bisa? No. El a bai sinagoga, caminda e pueblo di Dios tawatin custumber di lesa e Scritura. Ei el a lesa e profecia na Isaias 61:1 y 2 na bos halto, y a splica nan cu e berdadnan profetico aki a cumpli riba dje. (Lucas 4:16-22) E cantidad di milager cu el a efectua a yuda proba cu e tawatin Yehova su apoyo. Pero semper ta riba e Palabra di Dios el a depende den su siñamento.

9. Con Hesus a mustra amor leal pa e Palabra di Dios den e manera cu el a trata cu e farizeonan?

⁹ Ora opositornan religioso a reta Hesus, e no a bai pusta cu nan pa wak ken ta mas sabi, maske lo e mester por a gana nan facilmente den un competencia asina. En bes di esei el a laga e Palabra di Dios mustra cu nan tawata robes. Corda por ehempel loke a sosode ora e farizeonan a acusa e siguidonan di Hesus di viola e lei di sabat door cu nan a piki un par di tapushi di grano y come nan na caminda. Hesus a contesta nan: “Boso no a lesa kico David a haci ora cu e cu esnan cu tawata hunto cu ne a haya hamber?” (Mateo 12:1-5) Claro cu e hombernan ei, husto den nan mes bista, lo mester a lesa e relato inspira ei na 1 Samuel 21:1-6. Pero maske nan a les’e, nan a keda sin capta un les importante cu e relato a contene. Hesus si no a djis lesa e relato. El a medita riba dje y a tuma su mensahe na pecho. El a stima e principionan cu Yehova a duna den e parti ei di e Scritura. Pues, el a uza e relato ei y tambe un ehempel for di e Lei di Moises pa revela cu e spirito di e Lei ta rasonabel. Y Hesus su amor leal a motiv’e tambe pa defende e Palabra di Dios contra tur esfuerso di lidernan religioso pa troc’e y uz’e pa nan propio metanan, of pa tap’e bou di un sero di tradicion humano.

10. Con Hesus a cumpli cu e profecianan tocante e manera excelente cu e Mesias lo a siña?

¹⁰ Door di e amor cu Hesus tawatin pa e tema di su siñansa, nunca e no a siña hende na un manera laf ni stijf. Profecianan inspira a duna di comprende cu lo tin ‘gracia riba lip’ di e Mesias, y cu lo e papia “palabranan bunita.” (Salmo 45:2; Genesis 49:21) Hesus a cumpli cu e profecianan ei door di presenta su mensahe na un manera interesante y bibo, uzando “palabranan agradabel” pa siña e berdadnan cu el a stima asina tanto. (Lucas 4:22) Sin duda, bo por a mira su entusiasmo den su cara, y su wowonan lo a briya cu interes bibo den loke e tawata siñando. Lo mester tawata masha dushi pa scuch’e, y esei ta un excelente ehempel pa nos imita ora di papia cu otro hende tocante loke nos a siña!

11. Dicon nunca Hesus su habilidad como maestro no a pon’e bira arogante?

¹¹ Hesus a bira arogante door di e comprendemento inmenso cu e tawatin di berdadnan di Dios, y e bon habilidad cu e tawatin di papia? Esei ta loke ta sosode hopi bes cu maestronan humano. Pero tene na mente cu Hesus tawatin un sabiduria cu a refleha temor di Dios. E tipo di sabiduria ei no ta duna bo chens di bira orguyoso, pasobra “sabiduria ta serca e humildenan.” (Proverbionan 11:2) Y tawatin algo mas cu no a laga Hesus bira ni orguyoso ni arogante.

Hesus A Stima e Hendenan Cu El A Siña

12. Con Hesus a mustra cu e no tawata kier pa su siguidonan tin miedo di dje?

¹² Semper e amor profundo cu Hesus tawatin pa hende a keda bisto ora el a siña nan. Nunca Hesus su manera di siña no a laga hende sinti nan inferior, manera sa ta e caso cu hende orguyoso. (Eclesiastes 8:9) Despues cu Pedro a mira un di e milagernan di Hesus, el a keda asina pasma cu el a tira su curpa abou na pia di Hesus. Pero Hesus no tawata kier pa su siguidonan tin miedo di dje. Bondadosamente el a bisa Pedro: “No tene miedo”, y despues el a cont’e tocante e trabou emocionante di haci disipel cu Pedro tawata bai tuma parti den dje. (Lucas 5:8-10) Hesus tawata kier pa su disipelnan ser motiva door di nan propio amor pa e berdadnan precioso tocante Dios, y no door cu nan tin miedo di nan instructor.

13, 14. Den ki maneranan Hesus a demostra empatia pa hende?

¹³ E amor cu Hesus tawatin pa e pueblo cu el a siña a keda bisto tambe door cu e tawatin empatia, esta, cu el a sinti pa nan. “Ora cu el a mira e multitudnan, el a sinti compasion pa nan, pasobra nan tawata cansa y plama, manera carne sin wardado.” (Mateo 9:36) El a sinti duele di e situacion tristo cu nan tawata aden, y a sintie motiva pa yuda nan.

¹⁴ Ripara con Hesus a mustra empatia na un otro ocasion. Ora un hende mohe cu un fluho di sanger a bai serca dje den un multitud y mishi cu rand di su paña, el a cura milagrosamente. Hesus a sinti poder sali for di dje, pero e no a mira ta ken a cura. El a insisti pa sa ta ken e mohe ta. Pakico? No pa critic’e pasobra el a kibra e Lei of e reglanan di e escribanan y e farizeonan, manera kisas e señora tawata teme. Mas bien, el a bis’e: “Mi yiu, bo fe a salba bo; bai na pas y sea cura di bo afliccion.” (Marco 5:25-34) Wak cuanto empatia el a mustra den su palabranan. E no a djis bis’e: “Sea cura.” El a bis’e: “Sea cura di bo afliccion.” E palabra cu Marco a uza aki pa “afliccion” por nifica literalmente “sota”, un sistema di zwiep hende cu nan tawata uza como tortura. Asina Hesus a reconoce cu e señora su enfermedad a pon’e sufri hopi, kisas asta di dolo fisico y emocional fuerte. Hesus a sinti p’e.

15, 16. Ki incidentenan den Hesus su ministerio ta mustra cu el a enfoca riba hende su bon cualidadnan?

¹⁵ Un otro manera cu Hesus a mustra cu el a stima hende ta door di concentra riba nan bon cualidadnan. Wak kico a pasa ora el a topa Natanael, cu despues a bira apostel. “Hesus a mira Natanael ta bin serca dje y a bisa di dje: ‘Ata un berdadero Israelita, den kende no tin mentira!’” Hesus a wak milagrosamente den Natanael su curason, y a haya sa hopi cos tocante dje. Claro cu Natanael no tawata perfecto. E tawatin su faltanan mescos cu nos tur. De echo, ora nan a papi’e di Hesus el a haci un comentario basta bruto: “Por sali algo bon for di Nazaret?” (Huan 1:45-51) Sinembargo, di tur e cosnan cu Hesus por a bisa tocante Natanael, el a scohe pa enfoca riba algo positivo: cu e tawata un homber honesto.

¹⁶ Mescos, ora un oficial di ehersito, cu kisas tawata un Romano pagano, a yega serca y pidi Hesus pa cura su esclabo enfermo, Hesus tawata sa cu e solda ei tawatin su faltanan. Un oficial di ehersito di e tempo ei mester tawatin yen di acto violento, dramamento di sanger y adoracion falso den su pasado. Toch Hesus a enfoca riba algo bon: e homber su fe tawata remarcabel. (Mateo 8:5-13) Despues, ora Hesus a papia cu e malechor colga riba e staca di tormento banda di dje, na luga di zundra e homber pa su pasado como criminal, Hesus a anim’e cu un speransa pa futuro. (Lucas 23:43) Hesus tawata sa bon bon cu si bo adopta un actitud negativo y critico tocante hende, ta desanima so bo por desanima nan. Sin duda, su esfuerso pa mira bon cualidad den hende a anima hopi hende pa bira asta miho persona.

Dispuesto pa Sirbi Hende

17, 18. Con e echo cu Hesus a acepta e encargo pa bini na tera a mustra cu e tawata dispuesto pa sirbi hende?

¹⁷ Otro evidencia fuerte di e amor cu Hesus tawatin pa e hendenan cu el a siña ta cu e tawata dispuesto pa sirbi nan. Prome cu e Yiu di Dios a bini na tera como hende, semper el a sinti cariño pa humanidad. (Proverbionan 8:30, 31) Como Yehova su “Palabra” of bosero, kisas el a yega di atende cu hende na varios ocasion. (Huan 1:1) Pero el a “bandona su mes gloria, tumando forma di un sirbido” entre otro cu e meta di por instrui humanidad na un manera mas directo. Si, el a bai laga su puesto den shelo. (Filipensenan 2:7; 2 Corintionan 8:9) Tempo Hesus tawata riba tera e no a spera pa hende cana su tras pa sirbie. Al contrario, el a bisa: “E Yiu di hende no a bin pa wordo sirbi, ma pa sirbi, y pa duna su bida como prijs di rescate pa hopi.” (Mateo 20:28) Hesus a cumpli cu e palabranan ei den tur sentido.

¹⁸ Humildemente Hesus a traha pa satisface necesidad di esnan cu el a instrui, y a gasta su mes gustosamente na nan fabor. El a biaha na pia bai bin door di e Tera Priminti, canando cientos di kilometer den su giranan di predicacion, den un esfuerso pa alcansa mas tanto hende posibel. Hesus a keda humilde y acercabel, no manera e farizeonan y escribanan orguyoso. Tur sorto di hende, dignatario, solda, abogado, hende mohe, mucha, hende pober, hende malo y asta hende cu sosiedad a rechasa, tawata acerc’e cu entusiasmo y sin miedo. Maske Hesus tawata perfecto, ta hende e tawata, y e tawata cansa y sinti hamber. Pero asta ora e tawata cansa, of tawatin mester di sosiego of un rato keto pa haci oracion, e tawata pone necesidad di otronan prome cu di su mes.—Marco 1:35-39.

19. Con Hesus tawata un ehempel den trata su disipelnan cu humildad, pasenshi y bondad?

¹⁹ Hesus tawata mes dispuesto pa sirbi su propio disipelnan tambe. El a haci esei door di instrui nan cu bondad y cu pasenshi. Maske nan a tarda pa capta sentido di algun les hopi importante, e no a entrega, ni perde pasenshi, ni papia malo cu nan. El a keda busca mas manera pa laga nan comprende loke e kier a bisa nan. Por ehempel, djis pensa cuanto biaha e disipelnan a pleita tocante cua di nan tawata esun mas grandi. Bes tras bes, y asta riba e anochi prome cu su ehecucion, Hesus a keda busca maneranan nobo pa siña nan trata otro cu humildad. Den e asunto di humildad, mescos cu den tur otro cos, Hesus tawatin tur bon motibo pa bisa nan: “Mi a duna boso un ehempel.”—Huan 13:5-15; Mateo 20:25; Marco 9:34-37.

20. Den ki sentido Hesus su metodo di siña hende tawata diferente for di e farizeonan, y dicon e metodo ei tawata eficas?

²⁰ Paga tino cu Hesus no a djis bisa e disipelnan e ehempel; el a ‘duna nan un ehempel.’ El a siña nan door di ser un ehempel pa nan. E no a asumi un actitud di superioridad y papia cu nan como hende inferior, como si fuera e si no tawatin nodi haci e cosnan cu e tawata manda nan haci. Esei ta loke e farizeonan tawata haci. Hesus a bisa cu “nan ta papia, ma nan no ta haci.” (Mateo 23:3) Humildemente Hesus a mustra su alumnonan exactamente ta kico su siñansanan kiermen door di haci nan, door di pone nan na practica. Pesei, ora el a bisa su siguidonan pa nan hiba un bida simpel sin mucho complicacion materialista, nan no tawatin nodi specula ta kico e tawata kiermen. Nan por a mira su palabranan como un realidad: “Zoro tin cueba y parha di shelo tin neishi, ma e Yiu di hende no tin ningun luga pa pone su cabes.” (Mateo 8:20) Hesus a sirbi su disipelnan humildemente door di pone un ehempel pa nan.

21. Kico nos lo trata den nos siguiente articulo?

²¹ Definitivamente, Hesus tawata e Maestro di mas grandi cu mundo a yega di conoce! E amor cu e tawatin pa e cosnan cu el a siña y e amor cu e tawatin pa e hendenan cu el a siña tawata bisto pa tur hende sinsero cu a mir’e y tend’e. Y nos awendia cu ta studia e ehempel cu el a laga atras tambe ta mira e amor ei bon cla. Pero con nos por imita e ehempel perfecto di Cristo? E siguiente articulo lo trata e pregunta ei.

Con Lo Bo Contesta?

• Kico ta e cos di mas importante pa nos por siña hende bon? Y ken tawata un ehempel di esei?

• Den ki maneranan Hesus a mustra cu el a stima e berdadnan cu e tawata siña hende?

• Con Hesus a mustra cu el a stima e hendenan cu e tawata siña?

• Cua ta algun ehempel cu ta mustra nos cu Hesus tawata humildemente dispuesto pa sirbi esnan cu el a siña?

[Plachi na pagina 12]

Con Hesus a mustra cu el a stima e principionan den e Palabra di Dios?