“Sigui Mi Continuamente”
“Boso a wordo yama pa e proposito aki, como cu Cristo tambe a sufri pa boso, lagando un ehempel pa boso, pa boso sigui den su pasonan.”—1 PEDRO 2:21.
1, 2. Dicon Hesus su ehempel perfecto como maestro no ta mucho eleva pa nos imita?
HESUCRISTO tawata sin duda e Maestro di mas grandi cu mundo a yega di conoce. Ademas e tawata perfecto. Nunca el a peca den henter su bida como hende. (1 Pedro 2:22) Pero acaso esei ta nifica cu su ehempel como maestro ta mucho eleva pa nos como hende imperfecto imita? Di ningun manera.
2 Manera e articulo anterior a mustra, Hesus a siña hende a base di amor. Y amor ta algo cu nos tur por desaroya. E Palabra di Dios ta anima nos hopi bes pa laga nos amor crece, y pa e bira mas completo. (Filipensenan 1:9; Colosensenan 3:14) Nunca Yehova no ta spera algo di su criaturanan cu nan no por logra. De echo, ya cu “Dios ta amor” y el a traha nos segun su imagen, nos por asta bisa cu nos ta traha pa mustra amor. (1 Huan 4:8; Genesis 1:27) Pesei, ora nos lesa e palabranan di apostel Pedro den nos texto principal, nos por tin e confiansa cu nos por cumpli cu loke e ta bisa. Nos por sigui den Cristo su pasonan. De echo, nos por obedece e mandamento aki cu Hesus mes a duna: “Sigui mi [“continuamente”, NW].” (Lucas 9:23) Laga nos wak con nos por imita e amor cu Cristo a mustra. Prome nos lo wak con pa imita e amor cu el a mustra pa e berdadnan cu el a siña hende, y despues su amor pa e hendenan cu el a siña.
Desaroya Amor pa e Berdadnan Cu Nos Siña
3. Dicon algun hende tin dificultad pa studia, pero kico Proverbionan 2:1-5 ta anima nos pa haci?
3 Pa nos por stima e berdadnan cu nos ta siña hende, prome nos mes mester gusta siña tocante e berdadnan ei. Den e mundo djawe, no ta semper facil pa nos desaroya amor pa siñamento. Sistema di enseñansa deficiente, mal custumber forma durante hubentud y otro factornan ta pone cu hopi hende no gusta siña of studia. Pero ta esencial pa nos siña for di Yehova. Proverbionan 2:1-5 ta bisa: “Mi yiu, si bo kier ricibi mi palabranan y warda mi mandamentonan den bo, haci bo horea atento na sabiduria, y inclina bo curason na comprendemento; pasobra si bo sclama pa discernimento, halsa bo bos pa comprendemento, si bo busc’e manera plata, y rondi’e manera tesoro scondi, e ora ei lo bo discerni e temor di SEÑOR, y descubri e conocemento di Dios.”
4. Kico kiermen cu nos mester “inclina” nos curason, y ki manera di mira cosnan lo yuda nos den esaki?
4 Paga tino cu versiculo 1 pa 4 ta anima nos bes tras bes pa no solamente “ricibi” y “warda” sino tambe ‘busca’ y ‘rondia.’ Pero cu ki motivacion nos lo mester haci tur esaki? Wel, wak caminda e ta bisa: “Inclina bo curason na comprendemento.” Un obra di referencia ta bisa cu e animacion aki “no ta djis un yamada pa presta atencion; e ta mustra cu nos mester tin un cierto actitud: nos mester ta ansioso pa ricibi e siñansanan.” Y kico por haci nos receptivo y ansioso pa siña loke Yehova ta siña nos? Nos manera di mira cosnan. Nos mester mira “e conocemento di Dios” manera “plata” y “tesoro scondi.”
5, 6. (a) Kico lo por sosode cu tempo, y con nos por evita esei? (b) Dicon nos mester sigui aumenta e tesoro di conocemento cu nos a haya den Bijbel?
5 No ta dificil pa siña mira e “conocemento di Dios” di e manera ei. Por ehempel, casi sigur un di e cosnan cu bo a siña como parti di “e conocemento di Dios” ta cu Yehova tin e proposito pa tur hende obediente biba pa semper den Paradijs riba tera. (Salmo 37:28, 29) Ora cu bo a caba di siña e berdad ei, sin duda lo e tawata manera un berdadero tesoro pa bo. Lo el a yena bo mente y bo curason cu speransa y goso. Pero con ta awor? E aprecio cu bo tawata sinti pa bo tesoro a bira dof segun cu tempo a pasa? Si ta asina, bo tin cu purba haci dos cos. Di prome, bo tin cu haya bo aprecio di antes bek. Bo tin cu keda corda bo mes regularmente dicon bo ta balora cada berdad cu Yehova a siña bo, incluso esnan cu bo a siña hopi aña pasa.
6 Di dos, bo tin cu keda aumenta bo tesoro. Con cu bai bin, si pa casualidad bo coba haya un piedra precioso, kico lo bo haci? Lo bo djis hinc’e den bo saco y cana bai satisfecho? Of lo bo sigui coba pa wak si no tin mas? E Palabra di Dios ta yen di berdad manera piedra precioso y pipita di oro. Ni maske cuanto di nan bo a haya caba, ainda tin mas. (Romanonan 11:33) Cada bes cu bo coba saca un pipita di berdad, puntra bo mes: ‘Dicon e ta un tesoro? E ta yuda mi compronde Yehova su personalidad y su proposito mas miho? E ta duna mi guia practico cu por yuda mi sigui e pasonan di Hesus?’ Door di medita riba e tipo di preguntanan ei bo por aumenta e amor cu bo tin pa e berdadnan cu Yehova a siña bo.
Mustra Amor pa e Berdadnan Cu Nos Ta Siña Hende
7, 8. Menciona algun manera pa nos laga hende mira cu nos ta stima e berdadnan cu nos a siña for di Bijbel. Duna un ehempel.
7 Con nos por mustra cu nos ta stima e berdadnan cu nos a siña for di e Palabra di Dios ora nos ta instrui otro hende? Door di sigui e ehempel di Hesus y uza Bijbel hopi como base ora nos ta predica y siña hende. Ultimamente e pueblo di Dios rond mundo a haya e animacion pa uza Bijbel mas tanto den nan ministerio publico. Segun cu bo ta haci esei, busca manera pa bo laga e doño di cas sinti cu abo mes tambe ta balora loke bo ta comparti cu ne for di Bijbel.—Mateo 13:52.
8 Por ehempel, net despues di e atake terorista di aña pasa na New York, un ruman mohe cristian a comparti Salmo 46:1 y 11 cu e hendenan cu el a topa ora e tawata predica. Prome e tawata puntra nan con ta bai cu nan despues di e tragedia cu a tuma luga. E tawata scucha cu atencion na loke nan tawata responde, mustra cu el a comprende, anto bisa: “Mi tin mag di comparti un texto di Bijbel cu bo cu a yuda ami hopi den e tempo dificil aki?” Masha poco hende a nenga, y e ruman a hiba hopi combersacion excelente. Ora e mesun ruman mohe aki ta papia cu un hoben, hopi bes e ta bisa: “Mi tin mas cu 50 aña ta siña hende Bijbel, y bo kier sa algo? Nunca mi no a haya mi cu un problema cu e buki aki no por yuda bo sali afo.” Door di acerca hende cu sinseridad y entusiasmo, nos ta mustra nan cu nos ta balora y ta stima loke nos a siña for di e Palabra di Dios.—Salmo 119:97, 105.
9, 10. Dicon ta importante pa nos uza Bijbel pa contesta pregunta tocante nos creencianan?
9 Ora un hende puntra nos tocante nos creencianan, nos tin un bon chens pa mustra cu nos ta stima e Palabra di Dios. Mescos cu Hesus a siña nos cu su ehempel, nos lo no duna un contesta basa djis riba nos propio ideanan. (Proverbionan 3:5, 6) Mas bien nos lo uza Bijbel pa contest’e. Bo tin miedo cu un hende por haci bo un pregunta cu bo no por contesta? Awel wak dos paso concreto cu bo por dal.
10 Te caminda bo por, sea prepara. Apostel Pedro a skirbi: “Santifica Cristo como Señor den boso curason, y sea semper dispuesto pa duna contesta na cada un cu pidi boso pa duna cuenta di e speransa cu tin den boso, sinembargo cu suavidad y reverencia.” (1 Pedro 3:15) Bo ta semper cla y dispuesto pa defende bo creencianan? Por ehempel, si un hende kier sa dicon bo no ta participa den un cierto custumber of practica cu no ta cuadra cu Bijbel, no keda satisfecho pa djis bisa: “E ta bai contra mi religion.” Si bo bisa asina, por parce cu bo ta laga otro hende tuma decision pa bo, y hende por kere cu bo ta miembro di un secta religioso. Kisas ta miho si bo bisa: “Bijbel, e Palabra di Dios, ta prohibi e cos ei” of: “Mi Dios lo no keda contento.” Anto duna e hende un splicacion rasonabel dicon bo ta bisa asina.—Romanonan 12:1, NW.
11. Ki yudansa nos tin pa por ta prepara pa contesta pregunta tocante e berdadnan den e Palabra di Dios?
11 Si bo no ta sinti bo prepara, dicon bo no ta dedica un tiki tempo na studia e buki Rasonamento for di e Scritura?a Scohe un par di tema cu casi sigur hende lo puntra bo di dje, anto memorisa un par di punto biblico. Tene bo buki Rasonamento y bo Bijbel na man. No duda pa uza ningun di nan dos. Bisa e persona cu bo tin un buki cu por yuda bo haya contesta biblico.
12. Kico nos lo por bisa si nos no sa con pa contesta un pregunta biblico?
12 Purba di no precupa innecesariamente. Ningun ser humano imperfecto no tin contesta pa tur cos. Pesei, ora nan haci bo un pregunta biblico cu bo no por contesta, bo por bisa nan asin’aki libremente: “Mi ta contento cu bo a bini cu un pregunta asina interesante. Pa mi ta franco, mi no sa e contesta. Pero mi ta sigur si cu Bijbel ta toca e tema ei. Como cu mi gusta haci investigacion biblico, lo mi wak bo pregunta mas aleu y laga bo sa.” Si bo trata e asunto di un manera franco y humilde asina, posiblemente lo bo habri caminda pa bolbe combersa mas aleu cu e persona.—Proverbionan 11:2.
Amor pa Esnan Cu Nos Ta Instrui
13. Dicon nos mester keda positivo tocante e hendenan cu nos ta predica na dje?
13 Hesus a mustra amor pa e hendenan cu el a siña. Con nos lo por imit’e den esaki? Nunca nos no mester haya un actitud sin heful pa e hendenan rond di nos. Ta berdad cu “e guera di e gran dia di Dios Todopoderoso” ta yega dia pa dia mas serca, y hopi di e miles di miyones di hendenan riba mundo lo ser destrui. (Revelacion 16:14; Yeremias 25:33) Pero nos no sa ken lo scapa y ken lo muri. E decision hudicial ei tin cu tuma luga den futuro ainda, y ta Hesucristo, esun cu Yehova a nombra, mester tum’e. Tanten cu e huicio ei no a tuma luga, nos ta mira tur hende como posibel sirbidonan di Yehova.—Mateo 19:24-26; 25:31-33; Echonan 17:31.
14. (a) Con nos lo por examina nos mes pa wak si nos ta sinti pa hende? (b) Na ki maneranan practico nos por mustra cu nos ta sinti pa hende y cu nos tin interes personal den nan?
14 Nos ta purba mustra empatia, esta, sinti pa hende mescos cu Hesus a haci. Nos lo por puntra nos mes: ‘Mi ta sinti pa hende engaña door di e mentira- y decepcionnan astuto di religion, politica y comercio di e mundo aki? Ora nan ta parce di no tin cu nes cu e mensahe cu mi ta trece pa nan, mi ta purba comprende dicon nan ta sinti asina? Mi ta reconoce cu sea ami mes of otronan cu actualmente ta sirbi Yehova fielmente a yega di pensa mescos cu nan? Mi a adapta mi manera di acerca nan pa mi por lanta nan interes toch? Of mi ta djis pensa cu no tin speransa pa hende asina?’ (Revelacion 12:9) Ora hende nota cu di berdad nos ta sinti pa nan, tin mas chens pa nan reacciona bon na nos mensahe. (1 Pedro 3:8) Ademas, si nos ta sinti pa hende, esei por motiva nos pa mustra mas interes den esnan cu nos topa den nos ministerio. Kisas nos lo por anota ki pregunta nan tin, y kico ta precupa nan. Ora nos bolbe serca nan, nos por mustra nan cu nos a pensa riba e cosnan cu nan a bisa ultimo bes cu nos a topa. Y si na e momento ei nan ta den un necesidad urgente, kisas nos por ofrece nan yudansa practico.
15. Dicon nos mester purba mira e banda bon den hende, y con nos lo por haci esei?
15 Mescos cu Hesus, nos tambe ta concentra riba e bon cualidadnan di hende. Kisas un mayor soltero ta haciendo un esfuerso admirabel pa lanta su yiunan, of un homber ta lucha pa mantene su famia. Of kisas un hende di edad ta mustra interes den cos spiritual. Nos ta paga tino riba e tipo di cosnan ei di e hendenan cu nos topa? Nos ta elogia nan pa e cosnan ei? Door di hacie, nos ta enfatisa e base comun cu tin entre nan y nos y asina nos por habri caminda pa nos duna un testimonio di e Reino.—Echonan 26:2, 3.
Humildad Ta Esencial pa Mustra Amor
16. Dicon ta importante pa nos keda suave y respetuoso cu e hendenan cu nos ta predica na dje?
16 Amor pa e hendenan cu nos ta siña lo motiva nos pa obedece e spiertamento sabi aki di Bijbel: “Conocemento ta haci arogante, ma amor ta edifica.” (1 Corintionan 8:1) Hesus tawatin masha hopi conocemento, pero nunca e no tawata arogante. Pesei, ora bo ta comparti bo creencianan, evita di tin un tono di discuti of un actitud di superioridad. Nos meta ta pa yega na curason di hende y atrae nan na e berdadnan cu nos ta stima asina tanto. (Colosensenan 4:6) Corda cu ora Pedro a conseha cristiannan pa nan ta cla pa duna un defensa, el a recorda nan mesora cu nan mester hacie “cu suavidad y reverencia [of, “respet profundo”, NW].” (1 Pedro 3:15) Si nos ta suave y respetuoso, nos lo tin mas chens di atrae hende na e Dios cu nos ta sirbi.
17, 18. (a) Con nos mester reacciona ora hende ta pensa cu nos no ta capasita pa e ministerio? (b) Dicon no ta necesario pa un studiante di Bijbel sa idiomanan biblico antiguo?
17 Nos no tin nodi impresiona hende cu cuanto cos nos sa, ni con bon educacion nos tin. Si tin hende den bo teritorio cu ta nenga di scucha ken cu no tin cierto diploma of titulo universitario, no laga nan actitud desanima bo. Hesus no a precupa su mes cu esnan cu a bisa cu e no a haya siñansa na ningun di e scolnan rabinico prestigioso di su tempo, ni e no a laga e prehuicionan ei influenci’e pa purba impresiona hende cu tur loke e sa.—Huan 7:15.
18 Humildad y amor ta hopi mas importante pa un minister cristian, cu cualkier cantidad di educacion cu e por tin. E Gran Educador Yehova ta capasita nos pa e ministerio. (2 Corintionan 3:5, 6) Y ni maske kico lidernan religioso di cristiandad bisa, nos no tin nodi siña idioma biblico antiguo pa nos bira maestro di e Palabra di Dios. Yehova a inspira e escritornan di Bijbel pa skirbi di un manera asina cla y concreto, cu practicamente tur hende por comprende e berdadnan precioso cu tin den dje. E berdadnan ei ta keda intacto, apesar cu a traduci nan den centenares di idioma. Pesei, maske de bes en cuando ta util si nos conoce e idiomanan antiguo, e no ta necesario. Ademas, si nos bira orguyoso door cu nos tin habilidad cu idioma, esei por pone nos perde un caracteristica cu si ta necesario pa cristian berdadero: ser dispuesto pa siña.—1 Timoteo 6:4.
19. Den ki sentido nos ministerio cristian ta un servicio util?
19 No por tin duda cu nos ministerio cristian ta un trabou cu ta exigi un actitud humilde. Regularmente nos ta expone nos mes na oposicion, indeferencia y asta persecucion. (Huan 15:20) Sinembargo, ora nos efectua nos ministerio fielmente, nos ta rindiendo un servicio vital. Si nos sigui sirbi hende humildemente asina den e trabou aki, nos lo ta imitando e amor cu Hesucristo a mustra pa hende. Pensa bo un rato: Si nos tin cu predica na mil hende indeferente of cu ta contra, djis pa nos por alcansa un solo persona manera carne, esei lo no bale la pena? Claro cu si! Pesei, door di persisti den e trabou aki sin nunca entrega, nos ta rindiendo un servicio fiel na e hendenan manera carne cu nos falta pa alcansa ainda. Sin duda, Yehova y Hesus lo haci sigur pa nos haya hopi mas di e hendenan precioso ei prome cu e fin yega.—Hageo 2:7.
20. Cua ta algun manera cu nos por siña hende cu nos ehempel?
20 Un otro manera cu nos por mustra cu nos ta dispuesto di sirbi hende ta door di siña nan cu nos ehempel. Por ehempel, nos kier siña hende cu e miho manera pa biba, y e miho manera pa haya satisfaccion den bida ta door di sirbi Yehova “e Dios felis.” (1 Timoteo 1:11, NW) Ora nan mira con nos ta trata cu nos biciñanan y nos compañeronan di scol y di trabou, nan por mira cu di berdad nos ta felis y satisfecho? Otro cos: Nos ta siña studiantenan di Bijbel cu e congregacion cristian ta un refugio di amor den un mundo friu y feros. E studiantenan por mira facilmente cu nos ta stima tur hende den congregacion y ta traha duro pa mantene pas cu otro?—1 Pedro 4:8.
21, 22. (a) Un examinacion propio pa loke ta nos ministerio lo por motiva nos pa probecha di ki oportunidadnan? (b) Kico un serie di articulo den e siguiente edicion di E Toren di Vigilancia ta bai trata?
21 Tin bes, door cu nos kier haci mas tanto posibel den nos sirbishi, nos ta sinti nos motiva pa examina nos mes di nobo. Haciendo esei cu frankesa, hopi ruman ta descubri cu nan ta den posicion pa haci mas den e ministerio door di cuminsa sirbishi di tempo completo, of door di muda bai biba un caminda cu tin mas necesidad. Tin ruman a dicidi di siña un otro idioma pa nan yuda e comunidad creciente di imigrante den nan propio teritorio. Si bo ta den posicion pa haci e cosnan aki, pensa bon riba nan hunto cu oracion. Un bida di sirbi ta duna hopi goso, satisfaccion y pas mental.—Eclesiastes 5:12.
22 Laga nos sigui imita Hesucristo di tur manera cu nos por, door di aumenta tanto e amor cu nos tin pa e berdadnan cu nos ta siña hende, como e amor cu nos tin pa e hendenan cu nos ta siña. Si nos desaroya e amor aki anto demostr’e den e dos formanan aki, esei lo ta un excelente fundeshi pa nos por ta maestro manera Cristo. Pero con nos por edifica riba e fundeshi ei? Den e siguiente edicion di E Toren di Vigilancia lo sali un serie di articulo cu lo trata algun di e metodonan di siña spesifico cu Hesus a uza.
[Nota]
a Publica door di Testigonan di Yehova.
Con Lo Bo Contesta?
• Con nos por ta sigur cu e ehempel di Hesus como maestro no ta mucho eleva pa nos imita?
• Con nos por mustra cu nos ta stima e berdadnan cu nos a siña for di Bijbel?
• Dicon ta importante pa nos keda humilde segun cu nos conocemento ta aumenta?
• Cua ta algun manera cu nos por mustra cu nos ta stima e hendenan cu nos ta purba siña?
[Plachi na pagina 16]
Te caminda bo por, sea prepara
[Plachi na pagina 16, 17]
Si bo ta balora “e conocemento di Dios”, lo bo por uza Bijbel na un manera eficas
[Plachi na pagina 18]
Nos ta mustra cu nos ta stima hende door di comparti e bon nobo cu nan