CAPITULO 8
“Pa e Proposito Aki Mi A Wordo Manda”
1-4. (a) Con Hesus na un manera habil a siña un muher Samaritano, y cu ki resultado? (b) Con e apostelnan a reacciona?
NAN tabatin basta ora ta cana. Hesus cu su apostelnan tabata bayendo den direccion noord, for di Judea rumbo pa Galilea. Pa sigui e ruta di mas cortico—un biahe di mas o menos tres dia—nan mester a pasa dor di Samaria. Tabata casi diesdos or di merdia ora cu nan a yega na un stad chikito cu yama Sicar, caminda nan a para pa busca algo di come y bebe.
2 Hesus a keda sosega banda di un pos pafo di e stad, mientras cu su apostelnan a bai cumpra cuminda. Un muher a yega cerca pa saca awa. Hesus tabata “cansa di su biahe”, y si e tabata kier lo e por a ignora e muher. (Juan 4:6) Nos lo a compronde p’e si el a djis sera su wowo sin precupa cu loke e muher Samaritano aki a bin haci. Manera nos a mira den Capitulo 4 di e buki aki, e muher aki probablemente lo a spera cu cualkier Hudiu lo a trat’e cu menosprecio. Sinembargo, Hesus a start un combersacion cu ne.
3 El a cuminsa cu un ilustracion, uno saca for di e muher su bida diario y cu tabata de echo conecta cu loke e muher tabata haci na e momento ei. E muher a bin pa saca awa; Hesus a papia cu ne di e awa cu ta duna bida y cu lo kita su sed spiritual. Varios biaha e muher a menciona puntonan cu facilmente por a hiba na un controversia.a Pero cu tacto Hesus a evita e puntonan ei y a sigui cu e combersacion riba e topico cu e tabatin na mente. El a consentra riba asuntonan spiritual, esta, adoracion puro y Jehova Dios. Su palabranan tabatin efecto di largo alcance, pasobra e muher a bai conta e hombernan di e stad loke Hesus a bis’e, y nan tambe kier a scucha Hesus.—Juan 4:3-42.
4 Ora cu e apostelnan a bin bek, kico nan a pensa di e testimonio remarcabel cu Hesus tabata dunando? No tin ningun indicacion di entusiasmo di nan parti. Nan a keda sorprendi cu Hesus tabata papia mes cu e muher aki, y aparentemente nan no a papia nada cu e muher. Despues cu el a bai, nan a urgi Hesus pa come e cuminda cu nan a trece. Pero Hesus a bisa nan: “Mi tin cuminda pa come cu boso no sa di dje.” Straña, nan a kere cu ta di cuminda literal Hesus a papia. E ora ei el a splica nan: “Mi cuminda ta pa haci e boluntad di esun cu a manda mi, y pa cumpli cu su trabou.” (Juan 4:32, 34) Pues Hesus a siña nan cu su trabou principal den bida tabata mas importante p’e cu come. E tabata kier pa nan tambe sinti asina tocante e trabou ei. Cua trabou esaki tabata?
5. Kico tabata e trabou principal den e bida di Hesus, y kico nos lo considera den e capitulo aki?
5 Un biaha Hesus a bisa: “Mi mester predica e reino di Dios . . . , pasobra ta pa e proposito aki mi a wordo manda.” (Lucas 4:43) Si, Hesus a wordo manda pa predica y siña hende e bon noticia di e Reino di Dios.b E siguidonan di Hesus djawe tin e mesun trabou pa haci. Ta masha importante anto pa nos considera dicon Hesus a predica, kico el a predica y ki actitud e tabatin relaciona cu su asignacion.
Dicon Hesus A Predica
6, 7. Con Hesus tabata kier pa “tur instructor publico” sinti tocante e tarea di comparti e bon nobo cu otro hende? Ilustra esei.
6 Laga nos considera kico Hesus a pensa di e berdadnan cu el a siña hende; caba nos lo trata su actitud relaciona cu e hendenan cu el a siña. Hesus a uza un ilustracion bibo pa mustra kico el a pensa di e trabou di comparti cu otro hende e berdadnan cu Jehova a siñ’e. El a bisa: “Tur instructor publico ora el a ser siña tocante e reino di shelo, ta manera un hende, un doño di cas, cu ta saca for di su tesoro cosnan nobo y bieu.” (Mateo 13:52, NW) Dicon e doño di cas den e ilustracion aki ta saca cos for di su tesoro?
7 E doño di cas no ta saca cos for di su tesoro djis pa show off cu loke e tin, manera Rei Ezekias di pasado a yega di haci, anto cu consecuencianan penoso. (2 Reinan 20:13-20) Kico ta motiva e doño di cas? Considera e ilustracion aki: Bo ta bai bishita un meneer di scol masha stima na su cas. E ta habri un lachi y ta saca dos carta, un ta bieu te el a bira geel, e otro ta mas nobo. Ta carta cu el a haya di su tata, un di nan for di hopi aña pasa tempo cu e meneer di scol tabata mucha y e otro ta mas recien. E meneer su wowonan ta briya ora e ta conta bo con importante e cartanan aki ta p’e y con nan conseho a cambia su bida y lo por yuda bo tambe. Ta bisto cu e cartanan ta di gran balor pa e meneer, nan tin un luga special den su curason. (Lucas 6:45) E ta mustra bo e cartanan aki, no pa gaba of pa saca algun probecho, sino pa beneficia bo y pa yuda bo compronde cuanto balor nan tin p’e.
8. Dicon nos tin bon motibo pa considera e berdadnan cu nos ta siña for di e Palabra di Dios como tesoro?
8 E Gran Maestro, Hesus, tabatin e mesun motivacion pa comparti e berdadnan di Dios cu otro hende. P’e, e berdadnan aki tabata tesoronan di balor incalculabel. El a stima nan y tabata ansioso pa comparti nan. E tabata kier pa tur su siguidonan, “tur instructor publico”, sinti asina. Nos ta sinti asina? Nos tin bon motibo pa stima tur berdad cu nos siña for di e Palabra di Dios. Nos ta balora e hoyanan di e berdad sea cu nan ta creencianan cu nos ta aprecia for di hopi tempo of refinacionnan mas recien. Ora nos ta papia cu entusiasmo sincero y ta mantene nos amor pa loke Jehova a siña nos, nos ta transmiti e amor ei, mescos cu Hesus a haci.
9. (a) Kico Hesus a sinti pa e hendenan cu el a siña? (b) Con nos por imita e actitud cu Hesus tabatin pa hende?
9 Ademas, Hesus a stima e hendenan cu el a siña, manera nos lo trata mas en detaye den Seccion 3. Profesia a bisa di antemano cu e Mesias lo “tin compasion di e pober y di esun den necesidad.” (Salmo 72:13) Y en berdad, Hesus tabata interesa den hende. E tabata interesa den loke nan a pensa y den loke a motiva nan; e tabata precupa pa e carganan cu a pone presion riba nan y e obstaculonan cu a stroba nan di capta e berdad. (Mateo 11:28; 16:13; 23:13, 15) Por ehempel, corda riba e muher Samaritano. Sin duda, el a keda masha impresiona cu Hesus a mustra interes den dje. E echo cu Hesus a discerni su situacion personal a motiv’e pa acepta Hesus como profeta y pa conta otro hende tocante Hesus. (Juan 4:16-19, 39) Ta berdad cu como siguido di Hesus djawe nos no por lesa curason di e hendenan cu nos ta predica na dje. Loke si nos por haci ta mustra interes den hende, mescos cu Hesus a haci; nos por laga nan mira cu nos ta interesa den nan; y nos por adapta nos palabranan pa satisface nan interesnan, retonan y necesidadnan specifico.
Loke Hesus A Predica
10, 11. (a) Kico Hesus a predica? (b) Con bin a surgi e necesidad di e Reino di Dios?
10 Kico Hesus a predica? Si bo mester bai busca e contesta den e siñansanan di hopi religion cu ta bisa cu nan ta represent’e, lo bo por conclui cu el a proclama un tipo di evangelio social. Of podise lo bo haya e impresion cu el a boga pa reformanan politico of cu el a enfatisa salbacion personal como e cos di mas importante. Sinembargo, manera nos a menciona anteriormente, Hesus a bisa bon cla: “Mi mester predica e reino di Dios.” Kico precies esei a ensera?
11 Corda cu Hesus tabata den shelo ora cu Satanas na prome instante a lanta duda si ta husto cu Jehova ta e Soberano di universo. Lo mester tabata hopi doloroso pa Hesus mira Satanas calumnia su Tata husto y acus’e di ta un Gobernante inhusto cu ta priva Su criaturanan di loke ta bon! E Yiu di Dios lo mester a sintie hopi tristo ora cu Adam cu Eva, e futuro mayornan di humanidad, a kere e calumnia di Satanas! E Yiu a mira con pica y morto a pasa pa henter e famia humano debi na e rebelion ei. (Romanonan 5:12) Pero ki emociona lo e mester tabata ora el a haya sa cu un dia su Tata lo a corigi e situacion!
12, 13. Ki inhusticianan e Reino di Dios lo corigi, y con Hesus a haci e Reino e punto central di su ministerio?
12 Kico tabata e cuestion principal cu mester a ser resolvi? Mester a santifica Jehova su nomber santo, es decir, limpi’e di tur rastro di reproche cu Satanas y tur cu a uni cu ne, a pone riba e nomber ei. Mester a keda demostra cu Jehova ta e Soberano legitimo. Hesus a compronde e cuestionnan sumamente importante aki mihor cu cualkier otro hende. Den e oracion modelo, el a siña su siguidonan pidi prome pa e nomber di su Tata sea santifica, despues pa e Reino di su Tata bin, anto caba pa Dios su boluntad sosode na Tera. (Mateo 6:9, 10) Pronto e Reino di Dios, cu Cristo Hesus como su Gobernante, lo elimina Satanas su sistema corupto for di riba Tera y confirma Jehova su gobernacion husto pa semper.—Daniel 2:44.
13 E Reino ei tabata e tema di Hesus su ministerio. Tur su palabra- y accionnan a yuda clarifica kico e Reino ei ta y con lo e sirbi e proposito di Jehova. Hesus no a laga nada desvi’e for di su mision di predica e bon nobo di e Reino di Dios. Den su tempo, tabatin cuestionnan social urgente, masha hopi inhusticia, y toch el a enfoca riba su mensahe y su trabou. Acaso e echo cu Hesus a haci esei a nifica cu e tabatin un punto di bista inflexibel y cu su manera di aborda hende tabata laf y repetitivo? Definitivamente cu no!
14, 15. (a) Con Hesus a duna prueba di ta “mas cu Salomon”? (b) Con nos por imita Hesus den e mensahe cu nos ta predica?
14 Manera nos lo bai mira den henter e seccion aki, Hesus a haci su siñansa fascinante y yen di variedad. El a papia cu e meta di yega na curason di e hendenan. Esei por laga nos corda riba e Rei sabi, Salomon, kende a busca palabranan agradabel, palabranan corecto di e berdad, pa transmiti e pensamentonan cu Jehova a inspir’e pa skirbi. (Eclesiastes 12:10) Jehova a duna e homber imperfecto ei “grandesa di curason”, y esei a capasit’e pa papia tocante hopi cos, entre otro di parha, pisca, mata y bestia. Hende tabata bin di luganan leu pa tende Salomon papia. (1 Reinan 4:29-34) Sinembargo, Hesus tabata “mas cu Salomon.” (Mateo 12:42) E tabata hopi mas sabi y tabatin hopi mas “grandesa di curason.” Ora Hesus tabata siña hende, el a uza su conocemento superior di e Palabra di Dios, y tambe su conocemento di parha, bestia, pisca, agricultura, clima, sucesonan actual, historia y condicionnan social. Sinembargo, Hesus nunca a gaba cu su conocemento afin di impresiona otro hende. El a tene su mensahe simpel y cla. P’esei ta di compronde cu e hendenan tabata gusta scuch’e!—Marco 12:37; Lucas 19:48.
15 Cristiannan djawe ta purba sigui Hesus su ehempel. Nos no tin e mesun sabiduria y conocemento inmenso cu ne, pero si nos tur tin un midi di conocemento y experencia cu nos por uza ora nos ta comparti e berdadnan di e Palabra di Dios cu otro hende. Por ehempel, mayornan por haci uzo di nan experencia den criamento di yiu pa ilustra Jehova su amor pa Su yiunan. Otro cristiannan por uza ehempel- of ilustracionnan basa riba nan empleo, scol of nan conocemento di hende y di sucesonan actual. Na mes momento, nos ta tene cuidou pa no laga nada kita nos atencion for di nos mensahe, cu ta e bon nobo di e Reino di Dios.—1 Timoteo 4:16.
Hesus Su Actitud Relaciona cu Su Ministerio
16, 17. (a) Ki actitud Hesus tabatin relaciona cu su ministerio? (b) Con Hesus a mustra cu su ministerio tabata e enfoke principal di su bida?
16 Hesus a considera su ministerio como un tesoro precioso. Gustosamente el a yuda hende mira su Tata celestial manera E ta en realidad, no e misterio cu doctrina- y tradicionnan confuso di hende a crea di dje. Hesus tabata gusta yuda hende haya un relacion aproba cu Jehova y tambe e speransa di bida eterno. Tabata un placer p’e pa duna hende e consuelo y goso di e bon nobo. Con el a demostra cu e tabatin e sintimentonan ei? Considera tres manera.
17 Di prome, Hesus a haci e ministerio e cos principal den su bida. Su carera tabata pa papia tocante e Reino; esei tabata e obra principal den su bida, e cos cu mas a interes’e. Ta p’esei, manera nos a menciona den Capitulo 5, Hesus sabiamente a mantene su bida simpel. El a keda cu su bista enfoca riba loke tabata mas importante, manera el a conseha otronan pa haci. E no a laga hopi cos kita su atencion, cosnan cu segun cu tempo tabata pasa lo e mester a paga, mantene, drecha of remplasa. El a biba simpel pa no laga nada kit’e innecesariamente for di su ministerio.—Mateo 6:22, NW; 8:20.
18. Den ki maneranan Hesus a uza tur su vigor den e ministerio?
18 Di dos, Hesus a uza tur su vigor den su ministerio. El a dedica masha hopi energia na e ministerio, canando literalmente centenares di kilometer dor di henter Palestina, en busca di hende cu e por a comparti e bon nobo cu ne. El a papia cu nan den nan cas, riba plenchinan publico, na plasa y pafo den aire liber. El a papia cu nan asta ora cu e tabatin mester di sosiego, cuminda, awa of un rato pa relaha cu su amigonan intimo. Asta ora e tabata muriendo, el a sigui comparti e bon noticia di e Reino di Dios cu otro hende!—Lucas 23:39-43.
19, 20. Con Hesus a ilustra e urgencia di e trabou di predica?
19 Di tres, Hesus a trata e ministerio como algo urgente. Corda riba su combersacion cu e muher Samaritano na e pos pafo di Sicar. Aparentemente e apostelnan di Hesus no a mira den e situacion ei pakico tabata asina urgente pa comparti e bon nobo cu otro hende. Hesus a bisa nan: “Boso no ta bisa: ‘Falta cuater luna pa tempo di cosecha yega’? Mira, mi ta bisa boso, hisa boso cara wak y mira e cunucunan, pasobra nan ta blanco pa wordo cosecha.”—Juan 4:35.
20 Hesus a basa e ilustracion ei riba e temporada cu nan tabata aden. Evidentemente nan tabata den luna di kisleu (november/december). Tabata falta cuater luna ainda pa e cosecha di sebada, cu lo a tuma luga rond di e Pasco Hudiu, riba 14 di nisan. Pues, cunukeronan no a sinti ningun urgencia relaciona cu cosecha na e momentonan ei. Ainda tabata falta hopi dia. Pero kico di e cosecha di hende? Esei si tabata otro cos. Tabatin hopi hende cla pa tende, pa siña, pa bira discipel di Cristo y haya e maraviyoso speransa cu Jehova a extende na nan. Tabata como si fuera Hesus por a wak e cunucunan figurativo ei y mira cu nan tabata blanco di tur e grano hecho cu tabata zuai bai bin suavemente den biento, indicando cu nan tabata cla pa ser cosecha.c Awor tabata e momento, y e trabou tabata urgente! P’esei ora cu e hendenan di un cierto stad a purba tene Hesus cerca nan, el a bisa nan: “Mi mester predica e reino di Dios na e otro stadnan tambe, pasobra ta pa e proposito aki mi a wordo manda.”—Lucas 4:43.
21. Con nos por imita Hesus?
21 Den tur e tres maneranan cu nos a considera, nos por imita Hesus. Nos por haci e ministerio cristian e enfoke principal di nos bida. Maske nos tin famia y obligacionnan den mundo, nos por demostra cu nos ministerio ta na prome luga ora nos ta participa den dje cu celo y cu regularidad, manera Hesus a haci. (Mateo 6:33; 1 Timoteo 5:8) Nos por uza tur nos vigor den e ministerio, dunando generosamente di nos tempo, energia y recursonan pa apoy’e. (Lucas 13:24) Anto semper nos por tene na mente cu nos trabou ta urgente. (2 Timoteo 4:2, NW) Nos tin cu probecha di delaster un oportunidad pa predica!
22. Kico nos lo considera den e siguiente capitulo?
22 Hesus a haci sigur cu e trabou por a sigui despues di su morto. Di e manera ei tambe el a demostra cu el a mira e importancia di e trabou. El a encarga su siguidonan pa sigui cu e trabou di predica y siña hende. E encargo ei lo ta e topico di e siguiente capitulo.
a Por ehempel, ora cu e muher a puntr’e con bin un Hudiu ta papia cu un Samaritano, e tabata referi na un conflicto di siglonan bieu entre e dos pueblonan. (Juan 4:9) Ademas, e muher a declara cu su pueblo ta descendiente di Jacob, algo cu e Hudiunan di e tempo ei tabata nenga redondamente. (Juan 4:12) E Hudiunan tabata yama e Samaritanonan ‘Cutano’ pa enfatisa cu nan tabata descendiente di pueblonan stranhero.
b Predica ta nifica proclama, of declara, un mensahe. Siña hende tin casi e mesun nificacion pero ta ensera transmiti un mensahe na un manera mas profundo y detaya. Bon metodo di siña hende ta ensera haya maneranan pa yega na curason di e studiantenan afin di motiva nan pa actua riba loke nan ta tende.
c Relaciona cu e versiculo aki, un buki di consulta ta bisa: “Ora grano hecha, su color ta cambia di berde pa geel, of pa un color cla, indicando cu ta tempo pa cosech’e.”