Con Habilidad di Pensa Por Proteha Bo?

OLANAN halto ta un bista bunita y impresionante, pero pa marinero nan ta nifica peliger. E awanan halto ei por costa nan nan bida.

Den un manera similar, sirbidonan di Dios kisas ta haya nan cada bes cu mas presion cu ta menasa di hundi nan. Podise bo a ripara cu ola tras ola di prueba y tentacion ta baha pisa riba cristiannan. Ta sigur cu bo kier contraresta nan na un manera dicidido, ya cu bo kier evita di naufraga den sentido spiritual. (1 Timoteo 1:19) Habilidad di pensa ta un parti importante di bo defensa. Kico e ta, y con nos ta hay’e?

E palabra Hebreo traduci como “habilidad di pensa”, mezim·máh, ta bini for di un palabra basico cu ta nifica “plania of traha complot.” (Proverbionan 1:4, NW) Pues, algun version di Bijbel ta traduci mezim·máh como “prudencia”, “discrecion” of “prevision.” Eruditonan biblico Jamieson, Fausset y Brown ta describi mezim·máh como un “cautela cu ta yuda bo scapa di maldad, y haya cos bon.” Esaki kiermen cu nos ta tene cuenta cu e consecuencia cu nos accionnan por tin riba termino cortico y tambe termino largo. Si nos tin habilidad di pensa, nos lo considera cuidadosamente ki alternativanan nos tin prome cu nos actua, specialmente ora di tuma decisionnan importante.

Ora un hende cu habilidad di pensa ta bai tuma decision relaciona cu futuro of cu su situacion actual, e ta analisa prome cua ta e posibel peligernan of trampanan cu tin. Una bes el a identifica e posibel peligernan, e ta plania con e por evita nan, teniendo cuenta cu e influencia di su ambiente y amistadnan. Di e manera ei e por traha un plan di accion cu lo trece bon resultado, podise asta Dios su bendicion. Laga nos considera algun ehempel practico pa ilustra e proceso aki.

Evita e Trampa di Inmoralidad Sexual

Ora un boto ta nabega contra biento fuerte, e ta topa cu ola grandi contra dje. Si e marineronan no corta e olanan contrario bon, e boto por bolter.

Nos ta confronta un situacion similar, ya cu nos ta biba den un mundo obsesiona cu sex. Tur dia, olanan di idea- y imagennan sensual ta bin riba nos. Nos no por ignora e efecto cu nan por tin riba nos deseonan sexual normal. Nos tin cu uza nos habilidad di pensa y confronta e tentacion na un manera dicidido en bes di djis drif bai den situacionnan peligroso.

Por ehempel, hende homber cristian hopi bes ta traha hunto cu otro hombernan cu tin masha tiki respet pa hende mohe y cu ta considera hende mohe simplemente como un obheto sexual. Tur nan combersacionnan ta caba na chistenan obsceno y den dobel sentido. E ambiente aki cu tempo lo por hinca ideanan inmoral den mente di un cristian.

Un mohe cristian kisas tambe tin cu traha pafo di cas y pues por hay’e cu dificultad. Podise e ta traha hunto cu hende homber y hende mohe cu no tin mesun normanan moral cu ne. Talbes un di su coleganan masculino ta mustra interes den dje. Na principio, kisas e homber ta trat’e lief, y asta ta respet’e pa su punto di bista religioso. E homber su atencion persistente y e echo cu tur ora nan ta hunto lo por lanta den e ruman mohe cristian un deseo pa un amistad mas intimo.

Como cristian, con habilidad di pensa of discrecion por yuda nos den sircunstancianan asina? Prome, e por spierta nos contra e peligernan spiritual, y di dos, e por motiva nos pa plania e manera corecto pa actua. (Proverbionan 3:21-23) Den casonan manera esnan menciona aki, nos tin cu laga nos coleganan comprende bon cla cu nos normanan ta diferente debi na nos creencianan basa riba Bijbel. (1 Corintionan 6:18) Nos abla y conducta por confirma esaki. Fuera di esei, kisas nos lo tin cu limita nos trato cu cierto coleganan.

Pero situacionnan cu por hiba na inmoralidad no ta limita na nos luga di trabou. Nan por surgi tambe ora un pareha casa permiti problema debilita nan union. Un sirbido biahero a comenta: “Un matrimonio no ta kibra diripiente. E pareha pocopoco ta habri for di otro emocionalmente. Casi nan no ta papia cu otro ni pasa tempo hunto. Kisas nan ta bai core tras di cosnan material pa yena e bashi den nan matrimonio. Y como cu casi nan no ta duna otro compliment, nan por sinti nan atrai na otro personanan di sexo opuesto.”

E ruman experencia aki a sigui bisa: “Periodicamente, parehanan casa tin cu tuma tempo pa papia tocante nan matrimonio pa wak si tin algo ta dañando nan relacion cu otro. Nan mester plania con nan por studia, haci oracion y predica hunto. Nan lo beneficia masha si nan papia cu otro ‘den cas, riba caminda, ora nan ta bai drumi y ora nan lanta’, mescos cu mayornan y yiunan ta haci.”—Deuteronomio 6:7-9.

Con pa Trata cu Comportacion Cu No Ta Cristian

Fuera di yuda nos confronta tentacionnan moral cu exito, habilidad di pensa por yuda nos trata tambe cu problema cu nos rumannan cristian. Ora biento ta supla den direccion cu e boto ta nabega, esei ta produci ola cu ta push’e dilanti. E olanan ei por hisa e parti patras di e boto y mand’e di banda. Esaki ta pone cu e ora ei e olanan ta bin dal den banda di e boto cu e posibilidad di daña e boto.

Nos tambe por ta core riesgo cu ta bini for di un direccion inespera. Nos ta sirbi Yehova “den un acuerdo” hunto cu hopi rumannan cristian fiel. (Sofonias 3:9) Si un di nan ta actua den un manera cu no ta cristian, esei por parce manera un abuso di confiansa y por causa nos hopi sufrimento. Con habilidad di pensa lo por preveni nos di bira desbalansa y sinti nos demasiado ofendi?

Corda cu “no tin ningun hende cu no ta peca.” (1 Reinan 8:46) Pesei nos no mester keda sorprendi cu de bes en cuando un ruman cristian ta irita nos of ofende nos. Sabiendo esaki, nos por prepara pa algo asina y medita riba e manera cu nos lo mester reacciona. Con apostel Pablo a reacciona ora algun di su rumannan cristian a papia malo di dje y cu menosprecio? En bes di perde su balansa spiritual, el a conclui cu tawata hopi mas importante pa gana Yehova su aprobacion cu esun di hende. (2 Corintionan 10:10-18) Si nos tin un actitud asina esei lo evita cu nos ta reacciona mucho pura ora un hende haci nos algo.

Ta casi mescos cu ora bo dal bo dede. Ora esaki sosode, nos ta pasa un par di minuut sin por pensa cla. Pero despues cu e dolo baha, nos por rasona y actua normal atrobe. Wel, asina tambe nos no mester reacciona mesora riba un remarke of accion cu no ta bondadoso. Mas bien, para un rato y pensa riba e consecuencianan di un represaya descabeya.

Malcolm, un misionero di hopi aña, ta splica kico e ta haci ora e sintie ofendi. “Mi prome stap ta pa pasa door di un lista di pregunta: Mi ta rabia cu e ruman aki pasobra nos personalidadnan ta completamente diferente? Loke el a bisa ta realmente importante? Ta e echo cu mi ta sufri di malaria tin un efecto riba mi nervionan y ta haci mi mas crepchi? Lo mi tin un otro opinion di e asunto despues di un par di ora?” Manera Malcolm a descubri, hopi bes e desacuerdo no ta importante y por ser pasa por halto.a

Malcolm ta agrega: “De bes en cuando, apesar di tur mi esfuersonan pa resolve un situacion, e otro ruman no ta keda cu un actitud amigabel. Mi ta purba pa no laga esaki molestia mi. Una bes mi a haci tur loke mi por, mi ta wak e asunto den un otro manera. Mentalmente mi ta pone e asunto un banda como algo cu lo ser resolve di mes segun tempo ta pasa en bes di algo cu ami mester resolve personalmente. Lo mi no laga e cos ei perhudica mi spiritualmente ni afecta mi relacion cu Yehova ni cu mi rumannan.”

Mescos cu Malcolm, nos no mester laga e mal comportacion di un persona molestia nos di mas. Den tur congregacion tin hopi ruman dushi y fiel. Ta un placer pa cana den e caminda cristian “hunto” cu nan. (Filipensenan 1:27) Un cos mas cu por yuda nos wak e asunto den un perspectiva corecto ta di corda cu nos tin e apoyo amoroso di nos Tata celestial.—Salmo 23:1-3; Proverbionan 5:1, 2; 8:12.

No Stima e Cosnan di Mundo

Habilidad di pensa por yuda nos confronta un otro presion sutil. Tin biaha biento ta manda e olanan den banda di e boto. Ora weer ta normal, e olanan ei pocopoco por desvia e barco for di su rumbo. Pero durante un tormenta, ola biniendo di banda por pone e boto bolter.

Asina tambe, si nos entrega na e presion pa gosa di tur loke e mundo malbado tin di ofrece, e estilo di bida materialista aki por desvia nos for di nos rumbo den sentido spiritual. (2 Timoteo 4:10) Si nos no frena nos amor pa mundo, esei cu tempo por pone nos bandona nos rumbo cristian completamente. (1 Huan 2:15) Con habilidad di pensa por yuda nos cu esaki?

Na prome luga, lo e yuda nos calcula kico precis ta e peligernan cu nos por confronta. Mundo ta uza tur triki imaginabel pa tenta nos pa cumpra su cosnan. Constantemente e ta promove henter un pakete cu supuestamente tur hende mester tin: e estilo di bida di hende rico, di hende fasinante y atractivo y di hende aparentemente “exitoso.” (1 Huan 2:16) Propaganda ta priminti nos e admiracion y aprobacion di tur hende, specialmente di nos pareunan y biciñanan. Habilidad di pensa lo yuda nos contraresta e propaganda aki. Lo e corda nos di e importancia di keda “liber di amor pa placa”, ya cu Yehova a priminti cu ‘nunca lo e no bandona nos.’—Hebreonan 13:5.

Na di dos luga, habilidad di pensa lo preveni nos di sigui esnan cu a “desvia for di e berdad.” (2 Timoteo 2:18) Ta masha dificil pa contradeci hende cu nos tawata gusta y confia. (1 Corintionan 15:12, 32-34) Asta si ta na un grado masha limita nos ta ser influencia door di esnan cu a bandona e rumbo cristian, esei lo por stroba nos progreso spiritual y cu tempo hinca nos den peliger. Nos lo ta mescos cu un barco cu a desvia solamente un grado for di su rumbo corecto. Riba un biahe largo, e desviacion chikito ei por pone e barco keda sin yega su destino.—Hebreonan 3:12.

Habilidad di pensa por yuda nos sa precis den ki condicion spiritual nos ta awor y den ki condicion nos lo ta probablemente den futuro. Kisas nos ta reconoce cu nos mester participa mas plenamente den actividadnan cristian. (Hebreonan 6:11, 12) Tende con un Testigo hoben a uza su habilidad di pensa pa yud’e sigui metanan spiritual: “Mi tawatin e chens di haya un carera den periodismo. Esaki a atrae mi masha, pero mi a corda riba e versiculo den Bijbel cu ta bisa cu ‘e mundo ta pasa bai’, mientras cu ‘esun cu haci e boluntad di Dios ta permanece pa semper.’ (1 Huan 2:17) Mi a rasona cu e manera cu mi ta biba mester refleha loke mi ta kere. Mi mayornan a bandona e fe cristian, y mi no kier a sigui nan ehempel. Pesei mi a dicidi di hiba un bida cu un proposito y a inscribi den e trabou di tempo completo como pionero regular. Despues di cuater aña yen di satisfaccion, mi ta combenci cu mi a tuma e decision corecto.”

Con pa Confronta Tormenta Spiritual cu Exito

Dicon ta urgente pa nos uza nos habilidad di pensa awe? Marineronan mester ta alerta pa señalnan di peliger, specialmente ora forma un tormenta. Si weer bira friu lihe y biento lanta, nan ta tapa y mara tur cos y prepara pa lo piyo. Di un manera similar, nos tin cu prepara pa presionnan di gran intensidad segun cu e mal sistema aki ta acerca su fin. Mundo su norma- y balornan moral ta desintegra, y ‘hendenan malbado ta bai di malo pa piyo.’ (2 Timoteo 3:13) Mescos cu marineronan ta scucha pronosticonan di tempo cu regularidad, asina tambe nos tin cu haci caso di e spiertamentonan profetico di e Palabra inspira di Dios.—Salmo 19:7-11.

Ora nos ta uza habilidad di pensa, nos ta aplica e conocemento cu ta hiba na bida eterno. (Huan 17:3) Nos por anticipa problema y dicidi con pa supera nan. Di e manera ei nos lo prepara nos mes firmemente pa nos no ser desvia for di e rumbo cristian, y nos por pone “un bon fundeshi pa futuro” door di fiha metanan spiritual y purba alcansa nan.—1 Timoteo 6:19.

Si nos mantene sabiduria practico y habilidad di pensa, nos lo no tin nodi “tene miedo di desaster inespera.” (Proverbionan 3:21, 25, 26) Mas bien nos por haya consuelo den Dios su promesa: “Pasobra sabiduria lo bin den bo curason, y conocemento lo ta agradabel na bo alma. Discrecion [“habilidad di pensa”, NW] lo warda bo.”—Proverbionan 2:10, 11.

[Nota]

[Plachi na pagina 23]

Comunicacion regular ta fortifica un matrimonio