Felis Cu Nan A Siña Lesa!

NA ALGUN parti di Islanan Salomon, casi 80 porshento di esnan cu awor ta Testigo di Yehova tawatin cu lucha contra analfabetismo. E problema ei tawata stroba nan di participa mas tanto na nan reunionnan semanal di congregacion, y door di esei mes tambe tawata mas dificil pa nan comparti e berdad di Reino cu otronan. Di berdad ta posibel pa hende grandi cu nunca a yega di tene un potlot den nan man siña lesa?

Casi tur congregacion di Testigonan di Yehova na Islanan Salomon a duna les di lesa y skirbi uzando e foyeto Aplica Bo Mes na Lesamento y Skirbimento, publica door di Testigonan di Yehova. E siguiente ehempelnan ta mustra con e programa aki a yuda centenares di hende mehora nan nivel di habilidad. Y mas importante ainda, awor cu nan a siña lesa nan por duna testimonio mas miho tocante nan fe.—1 Pedro 3:15.

Un misionero asigna pa traha cu un congregacion cu mas di shen publicado di Reino a nota cu mayoria di esnan presente na e studio biblico di E Toren di Vigilancia no tawatin un ehemplar personal di e revista, y casi ningun hende no tawata duna comentario. Dicon? Door di analfabetismo. Ora e congregacion a anuncia cu lo tene un scol pa siña lesa y skirbi, e misionero a ofrece su mes gustosamente pa sirbi como maestra. Prome, ta un par di studiante so a bini, pero pronto mas cu 40 hende di tur edad a cuminsa asisti.

Kico tawata e resultado? E misionero ta conta: “Djis un poco tempo despues cu e scol a cuminsa, mi a bai plasa seis or di mainta pa cumpra cuminda pa e cas di misionero, y mi a topa un par di e studiantenan, asta mucha, ta bende coco y berdura. Pakico? Pasobra nan tawata kier tin cen pa cumpra pen cu schrift pa uza den e scol di lesamento! Ademas, esnan cu a participa den e scol a haya un motibo pa busca nan propio ehemplar di E Toren di Vigilancia.” E misionero ta sigui conta: “Awor, durante e Studio di Toren di Vigilancia cu e congregacion, tur hende, grandi y chikito, ta participa, y e consideracion tin bida.” Un cos cu a haci e misionero hopi contento ta cu cuater miembro di e klas a pidi pa nan sali den e trabou di predica, pasobra nan a bisa cu nan “no tin miedo mas.”

Ademas di siña lesa y skirbi, e studiantenan tawatin mas efecto positivo tambe. Por ehempel, pa hopi aña e esposa incredulo di un Testigo tawata precupa e congregacion. E tawata tira hende cu piedra pa delaster un cos chikito, y asta el a yega di ataca otro hende mohe cu pida palo. E biahanan cu e tawata bai e reunionnan cristian cu su casa, e tawata haci asina tanto yalurs cu e esposo a dicidi di cuminsa uza bril di solo scur pa su casa no acus’e di ta wak otro hende mohe.

Pero poco tempo despues cu e lesnan a cuminsa, e señora a puntra pocopoco: “Mi tin mag di join e klas?” E contesta tawata si. For di e dia ei e no a faya ni un les ni un reunion di congregacion. El a traha duro pa siña lesa, y su adelanto tawata impresionante. El a keda masha contento. E siguiente cos cu el a pidi tawata: “Mi tin mag di studia Bijbel?” Gustosamente su casa a cuminsa studia cu ne, y e ta sigui progresa den su habilidad di lesa y skirbi y den su conocemento di Bijbel.

Pa un hende di 50 aña cu nunca a yega di mishi cu un potlot, djis tene un pen den su man y forma e letternan di alfabet por ta un obstaculo mes grandi cu un sero. Tin di nan ta haya blar na nan dede door di e manera cu nan ta primi e potlot riba e papel den e prome temponan cu nan ta siñando. Despues di varios siman luchando pa siña tene e potlot y control’e, algun di nan ta grita cu un smile: “Mi por move mi man suave riba e papel!” E instructornan tambe ta keda contento di mira e studiantenan progresa. Un di nan a bisa: “Dirigi un di e klasnan aki ta un gran goso, y hopi bes na final di un les e studiantenan ta expresa nan aprecio sinsero pa e percuracion aki di Yehova cu aplauso.”

E Testigonan cu awor por lesa tambe ta alegra hunto cu e misioneronan. Pakico? Pasobra awor nan por uza nan habilidad di lesa y skirbi pa honra Yehova.

[Plachi na pagina 8, 9]

Grandi y chikito ta aprecia e klasnan pa siña lesa y skirbi