Na Ken Bo Mester Ta Leal?

“Nos patria: . . . Mare semper e tin rason; pero cu of sin rason, nos patria e ta keda.”—Stephen Decatur, oficial di marina Mericano, 1779-1820.

HOPI hende ta haya cu lealtad incondicional na nan pais ta nan obligacion di mas sagrado. Otronan lo adapta e palabranan di Stephen Decatur y bisa: ‘Mi religion, mare semper e tin rason; pero cu of sin rason, mi religion e ta keda.’

Si nos ta realistico, ta e luga caminda nos a nace ta determina cua pais of religion ta exigi nos lealtad. Pero ken nos mester ta leal na dje ta un asunto mucho importante pa nos lag’e den man di casualidad. Sinembargo, cuestiona e ideanan cu nos a lanta cu ne tocante ken of kico nos mester ta leal na dje ta algo cu ta exigi curashi, y e por ta un reto.

Un Test di Lealtad

Un señora cu a crece na Zambia ta bisa: “For di mucha mi ta un hende religioso. Oracion tur dia dilanti e altar di mi famia, celebracion di dianan religioso y baimento di tempel regularmente tawata parti di mi criansa. Mi religion y mi adoracion tawata parti di mi cultura, di mi comunidad y di mi bida di famia.”

Sinembargo, como adolecente el a cuminsa studia Bijbel cu Testigonan di Yehova, y poco tempo despues el a dicidi di cambia di religion. E cos aki tawata un acto di deslealtad?

Zlatko a crece na Bosnia, y el a bringa temporalmente den e conflicto cu su pais tawata aden. E tambe a cuminsa studia Bijbel cu Testigonan di Yehova. Awor e no ta dispuesto di lanta arma contra ningun hende. Ta desleal e ta?

E manera cu bo ta contesta e preguntanan aki ta depende di bo punto di bista. E señora cu nos a menciona anteriormente ta bisa: “Den mi comunidad, cambia di religion tawata un cos impordonabel. Nan a mir’e como un acto di deslealtad y un traicion contra bo famia y bo comunidad.” Zlatko su excompañeronan militar tambe tawata haya cu ken cu no kier bringa na nan banda ta un traido. Pero tanto e señora ei como Zlatko ta haya cu ta un lealtad superior a motiva nan accion: lealtad na Dios. Ta importante pa nos sa con Dios ta mira esnan cu kier ta leal na dje.

Berdadero Lealtad—Un Expresion di Amor

Rei David a bisa Yehova Dios: “Cu un persona leal lo bo actua den lealtad.” (2 Samuel 22:26, NW) E palabra Hebreo traduci aki como “lealtad” ta transmiti e idea di bondad motiva door di amor cu ta pega na algo of na un hende te ora e cumpli cu su proposito pa e cos of e hende ei. Yehova ta pega su mes amorosamente na esnan cu ta leal na dje, manera un mama cu su yiu na pecho. Yehova a bisa su sirbidonan leal na Israel di antiguedad: “Un mohe por lubida su yiu cu e ta cria na pecho, y no tene compasion cu e yiu di su mondongo? Esakinan por lubida, ma Ami si lo no lubida bo.” (Isaias 49:15) Esnan cu ta dispuesto di pone lealtad na Dios prome cu tur otro cos por ta sigur cu lo E cuida nan cu amor.

Nos ta leal na Yehova debi cu nos ta stim’e. E amor ei ta motiva un hende pa stima loke Yehova ta stima, y odia e cosnan malbado cu Yehova ta odia. (Salmo 97:10) Ya cu Yehova su cualidad principal ta amor, lealtad na Dios ta yuda un hende pa e no trata otronan cu falta di amor. (1 Huan 4:8) Pues, si lealtad na Dios ta motiva un hende pa cambia di creencia religioso, esei no kiermen cu e no ta stima su famia mas.

Lealtad na Dios—Un Influencia Positivo

Asin’aki e señora di Zambia cu nos a menciona anteriormente ta splica dicon el a cambia di religion: “Door di studia Bijbel mi a bin conoce Yehova como e unico Dios berdadero, y mi a desaroya un relacion personal cu ne. Yehova ta diferente for di tur e diosnan cu mi tawata adora. E ta perfectamente balansa den su amor, husticia, sabiduria y poder. Ya cu Yehova ta exigi debocion exclusivo, mi tawatin cu bandona e otro diosnan.

Mi mayornan tawata bisa mi cada bes cu nan tawata hopi malcontento cu mi, y cu mi a laga nan na caya. Esei tawata dificil pa mi, pasobra aprobacion di mi mayornan tawata hopi importante pa mi. Pero segun cu mi a haya mas y mas conocemento di e berdadnan di Bijbel, mi a comprende cu ta un cos so mi por a haci. Mi no por a bira lomba pa Yehova.

Scohe pa ta leal na Yehova en bes di na tradicionnan religioso no kiermen cu mi no ta leal na mi famia. Mi ta haci mi best pa mustra nan cu palabra y accion cu mi ta comprende con nan ta sinti. Pero si mi no ta leal na Yehova, lo mi por stroba mi famia di siña conoc’e, y esei si lo ta un falta di lealtad.”

Asina tambe, si pa motibo di un hende su lealtad na Dios e kier keda neutral den asuntonan politico y no lanta arma contra otro hende, esei no kiermen cu e ta un traido. Zlatko ta splica su accionnan asin’aki: “Maske mi a ser lanta supuestamente como cristian, mi a casa cu un hende di otro creencia. Ora guera a cuminsa, tur dos banda a exigi mi lealtad. Nan a obliga mi scohe na ki banda lo mi bringa. Mi a bringa den guera tres aña y mei. Cu tempo, ami cu mi casa a hui bai Croacia, y einan nos a topa Testigonan di Yehova.

Nos estudio di Bijbel a laga nos mira cu ta na Yehova nos mester ta leal prome cu tur otro cos, y cu E kier pa nos stima nos prohimo sin importa di ki religion of ki rasa nan ta. Awor ami cu mi casa ta uni adorando Yehova, y mi a siña cu mi no por ta leal na Dios y bringa contra mi prohimo.”

Lealtad Forma a Base di Conocemento Exacto

Ya cu Yehova ta nos Creador, nos lealtad na dje ta mas importante cu lealtad na cualkier otro cos. (Revelacion 4:11) Sinembargo, ta conocemento exacto tin cu forma nos lealtad na Dios pa e no daña bira un forsa fanatico y destructivo. Bijbel ta anima nos: ‘Boso wordo renoba den e spirito di boso mente, y bisti e hende nobo, cu a wordo crea segun Dios den santidad [“lealtad”, NW] berdadero.’ (Efesionan 4:23, 24) E homber famoso cu a skirbi e palabranan inspira ei tawatin e curashi pa cuestiona e ideanan di lealtad cu el a ser cria cu ne. E investigacion cu el a haci a pone cu un transformacion positivo a tuma luga cu su personalidad.

Si, Saulo a enfrenta un test di su lealtad mescos cu hopi hende den nos tempo. Saulo a lanta den e tradicionnan stricto di su famia, y e tawata conoci pa su lealtad na e religion cu el a nace aden. Lealtad na su causa a asta hib’e na comete actonan violento contra esnan cu no tawata di acuerdo cu su punto di bista. Saulo tawata bon conoci como un hende cu tawata invadi cas di cristiannan y lastra nan bai cu ne pa ricibi castigo y asta morto.—Echonan 22:3-5; Filipensenan 3:4-6.

Pero una bes cu Saulo a haya conocemento exacto di Bijbel, el a haci loke hopi di su pareunan lo no a ni pensa di haci. El a cambia di religion. Saulo, cu despues a bira conoci como apostel Pablo, a scohe pa ta leal na Dios y no na tradicion. Lealtad na Dios basa riba conocemento exacto a motiva Saulo pa cambia su comportacion destructivo y fanatico di antes, anto bira un persona tolerante, amoroso y cu a promove loke ta bon.

Pakico Nos Mester Ta Leal?

Si nos permiti Dios su normanan forma nos sentido di lealtad, nos lo saca beneficionan bisto. Por ehempel, un informe di 1999 di e Instituto Australiano di Estudionan Relaciona cu Bida di Famia a bisa cu dos di e cosnan fundamental cu ta contribui na matrimonio duradero y cu ta duna satisfaccion ta “confiansa y fieldad . . . [y] un sentido di spiritualidad.” E mesun estudio a yega na e conclusion cu “ora un matrimonio ta stabil y ta duna satisfaccion” e homber- y mohenan ta mas contento, mas salu, y nan ta biba mas largo. Ademas, matrimonionan stabil ta duna mucha mas chens di gosa di un bida felis.

Den e mundo insigur cu nos ta biba aden awendia, lealtad ta manera un bui salbabida mara na un barco di rescate. Si e “landado” no ta leal na nada, ola y biento lo bent’e p’aki y p’aya. Pero si e pone su lealtad na e caminda robes, ta como si fuera e ta tene na un salbabida cu ta mara na un barco cu ta senk. Mescos cu a pasa cu Saulo, su lealtad por lastr’e hiba na un proceder destructivo. Sinembargo, lealtad na Yehova, basa riba conocemento exacto, ta un salbabida cu por duna nos stabilidad y hiba nos na salbacion.—Efesionan 4:13-15.

Yehova ta priminti lo siguiente na esnan cu ta leal na dje: “SEÑOR ta stima husticia y no ta bandona su santonan [“lealnan”, NW]. Nan ta keda preserva pa semper.” (Salmo 37:28) Pronto Yehova lo trece tur hende leal na dje den un paradijs caminda nan lo disfruta di libertad for di pena y dolo, y lo gosa di relacionnan duradero, liber di bareranan religioso y politico.—Revelacion 7:9, 14; 21:3, 4.

Aworaki mes caba, miyones di hende rond mundo a descubri cu ta lealtad na Yehova so ta trece berdadero felicidad. Pakico no laga Testigonan di Yehova yuda bo samina bo punto di bista tocante lealtad cu yudansa di e berdad di Bijbel? Bijbel ta bisa nos: “Samina boso mes pa wak si boso ta den e fe; samina boso mes!”—2 Corintionan 13:5.

Nos tin mester di curashi pa nos cuestiona nos religion y puntra nos mes dicon nos ta leal na dje, pero e recompensa por bal e esfuerso si door di esei bo ta hala mas serca di Yehova Dios. E señora cu nos a menciona anteriormente ta expresa e sintimentonan di hopi hende ora e bisa: “Mi a siña cu ser leal na Yehova y su normanan ta yuda nos pa ta balansa den e manera cu nos ta trata cu nos famia, y nos ta bira miho miembro di nos comunidad. Ni maske con dificil e pruebanan ta, si nos ta leal na Yehova, semper E lo ta leal na nos.”

[Plachi na pagina 6]

Conocemento exacto a motiva Saulo pa cambia loke e tawata leal na dje

[Plachi na pagina 7]

Pakico no samina loke bo ta leal na dje den lus di e berdad di Bijbel?

[Reconocemento di plachi na pagina 4]

Churchill, upper left: U.S. National Archives photo; Joseph Göbbels, far right: Library of Congress