E Beneficionan pa Hende Cu Ta Leal

DEN algun pais, mucha ta gusta tenta door di tira otro cu pegasaya. E simiñanan aki tin punta skerpi cu ta keda pega riba paña di e otro mucha y maske kico e purba haci—sea cana pura, core, sagudi of bula—e simiñanan no ta los. E unico manera pa kita nan ta door di ranca nan un pa un. E muchanan ta pasa hopi pret.

Claro cu no ta tur hende ta gusta pegasaya riba nan paña, pero tur hende ta keda asombra si con duro e simiñanan ei ta pega. Lealtad tin e mesun caracteristica. Un persona leal ta mantene un relacion duradero cu un otro persona. E ta cumpli fielmente cu e deber- y obligacionnan di e relacion ei asta ora circunstancianan ta haci esei dificil. E palabra “lealtad” ta pone nos corda riba birtudnan manera sinseridad, fieldad y debocion. Sinembargo, aunke bo ta contento cu otro hende ta leal na bo, bo tin e determinacion pa ta leal na otro hende? Si ta asina, na ken bo mester ta leal?

Fieldad den Matrimonio—Un Necesidad Basico

Den matrimonio lealtad ta masha importante. Pero lamentablemente, hopi bes e no t’ei. Un esposo y esposa cu ta keda fiel na nan voto matrimonial—esta, cu ta keda hunto y den cua cada un ta traha pa bienestar di e otro—a dal un paso importante den direccion di haya felicidad y siguridad. Pakico? Pasobra hende a ser crea cu e necesidad pa mustra lealtad y pa ricibi lealtad. Ora e matrimonio di Adam cu Eva a tuma luga den e hofi di Eden, Dios a declara: “Un homber lo bandona su tata y su mama y lo uni cu su esposa.” Mescos mester a conta pa e esposa; e mester a pega na su esposo. Esposo y esposa mester tawata fiel na otro y coopera cu otro.—Genesis 2:24; Mateo 19:3-9.

Claro cu esei tawata miles di aña pasa. Esei ta nifica cu lealtad den matrimonio awe a bai for di moda? Mayoria hende lo contesta cu no. Investigadonan na Alemania a haya cu 80 porshento di hende a considera fieldad den matrimonio como algo importantisimo. Nan a tene un di dos encuesta pa saca afo kico ta e caracteristicanan mas deseabel den hende homber y hende mohe. A pidi un grupo di hende homber menciona e cinco cualidadnan cu nan a admira mas den hende mohe, y un grupo di hende mohe a menciona e cinco cualidadnan cu nan a admira mas den hende homber. E birtud mas balora serca tanto hende homber como hende mohe tawata fieldad.

Si, lealtad ta parti di un fundeshi fuerte pa un matrimonio exitoso. Pero manera nos a mira den e articulo anterior, hopi hende ta consider’e un birtud, ma poco di nan ta practic’e. Por ehempel, e porsentahe halto di divorcio den hopi pais ta un indicacion di e deslealtad cu ta reina awe. Con partnernan matrimonial por contraresta e tendencia aki y keda leal na otro?

Lealtad Ta Pone un Matrimonio Dura

Ora esposo y esposa ta busca oportunidad pa confirma nan debocion na otro nan ta demostra lealtad. Por ehempel, por lo general ta mihor pa bisa “nos” en bes di “mi”—“nos amigonan”, “nos yiunan”, “nos propiedad”, “nos experencianan”, etcetera. Ora nan ta traha plan y tuma decision relaciona cu cas, trabou, criamento di yiu, entretenimento, vakantie of actividadnan religioso, ta bon pa nan tene cuenta cu otro su sintimento y opinion.—Proverbionan 11:14; 15:22.

Ora cada partner ta laga e otro sinti cu e ta un persona stima y keri nan ta mustra lealtad na otro. Un persona casa ta sinti su mes insigur ora su partner ta actua den un manera demasiado familiar cu un otro persona di e sexo opuesto. Bijbel ta conseha hende homber pa pega na “e esposa di [su] hubentud.” Un esposo no mester laga su curason desea e atencion y admiracion di un hende mohe cu no ta su esposa, pa no papia mes di haci contacto fisico inapropiado cu otro hende mohe. Bijbel ta spierta: “Esun cu comete adulterio cu un mohe ta falta comprondemento; esun cu haci esaki ta caba cu su mes.” Esposanan tin cu cumpli cu e mesun norma halto di fieldad ei.—Proverbionan 5:18; 6:32.

Fieldad den matrimonio ta bale la pena? Claro cu si. E ta haci e matrimonio mas stabil y mas duradero, y cada un di e partnernan ta beneficia personalmente. Por ehempel, ora un esposo ta interesa fielmente den e bienestar di su esposa, e esposa ta haya un sintimento di siguridad cu ta yud’e desplega su mihor cualidadnan. Mescos ta conta pa e esposo. Su determinacion pa ta leal na su esposa ta yud’e pega mas na principionan husto den tur area di su bida.

Ora un esposo y esposa ta pasando door di un periodo dificil, lealtad lo pone nan tur dos sinti nan sigur. Di otro banda, den un matrimonio caminda no tin lealtad, hopi bes e manera cu nan ta reacciona riba problema ta pa separa of busca divorcio. Un paso asina, na luga di resolve problema, hopi bes ta crea otro problema. Den e decada di 1980, un consehero di moda bon conoci a bai laga su casa y famia. El a haya felicidad como un homber soltero? Binti aña despues, el a admiti cu e separacion ei a lag’e “solitario y trastorna; sin por drumi anochi y cu gana di por bisa [su] yiunan bon nochi.”

Lealtad Entre Mayor y Yiu

Ora mayornan ta leal na otro, tin hopi chens cu nan yiunan tambe lo siña ser leal. Mas despues den bida, yiunan cu a lanta den un famia leal y amoroso lo haya cu ta mas facil pa actua di un manera responsabel pa cu nan partner y tambe pa cu nan mayornan segun cu esakinan ta sinti e limitacionnan di biehes.—1 Timoteo 5:4, 8.

Claro cu no ta semper e mayornan ta bira malo prome. Tin biaha ta e yiu tin mester di cuido fiel. Esaki tawata e situacion cu Herbert y Gertrud—ambos Testigo di Yehova—a haya nan aden pa mas cu 40 aña. Nan yiu, Dietmar, a sufri henter su bida di un malesa cu yama distrofia muscular. Pa e ultimo shete añanan prome cu su morto na november 2002, Dietmar tawatin mester di cuido y atencion binticuater ora pa dia. Amorosamente su mayornan a atende su necesidadnan. Asta nan a instala aparato medico den nan cas y a ricibi entrenamento medico. Un bunita ehempel di lealtad den famia!

Lealtad Ta Masha Importante pa Amistad

Un tal Birgit a bisa: “Un persona por ta felis sin ta casa, pero ta dificil pa bo ta felis sin un amigo.” Talbes bo ta di acuerdo cu esei. Sea bo ta casa of soltero, e lealtad di un bon amigo lo duna bo un sintimento di tierno cariño y lo enrikece bo bida. Claro cu si bo ta casa, bo mihor amigo mester ta bo casa.

Un amigo no ta djis un conoci. Kisas nos conoce hopi hende—biciña, colega y hende cu nos ta topa de bes en cuando. Berdadero amistad ta exigi tempo, energia y compromiso emocional. Ta un honor pa ta amigo di un persona. Amistad tin su beneficionan, pero tambe e ta encera responsabilidad.

Algo masha necesario ta bon comunicacion cu nos amigonan. Kisas necesidad ta pone cu amigonan mester comunica cu otro. Birgit a bisa: “Si un di nos tin un problema, ami cu mi amiga ta yama otro un of dos biaha pa siman. Ta un consuelo pa sa cu e t’ei y ta dispuesto pa scucha.” Distancia no mester ta un barera pa amistad. Gerda y Helga ta biba miles di kilometer leu for di otro, pero pa mas cu 35 aña nan ta bon amiga di otro. Gerda a bisa: “Nos ta skirbi otro regularmente, conta experencia y describi nos sintimentonan interno, sea nan ta gososo of tristo. Ora mi haya carta di Helga mi ta bira sumamente contento. Nos tin e mesun liña di pensamento.”

Lealtad ta masha importante pa amistad. Un acto desleal por kibra asta relacionnan di hopi tempo. Ta normal pa amigonan conseha otro asta den asuntonan confidencial. Amigonan lo papia di curason sin e temor di wordo menosprecia of di mira nan confiansa traiciona. Bijbel ta declara: “Un amigo ta stima tur ora bai, y un ruman ta naci pa tempo di adversidad.”—Proverbionan 17:17.

Siendo cu nos amigonan tin influencia riba con nos ta pensa, sinti y actua, ta importante pa nos sera amistad cu hende kende nan forma di bida ta cuadra cu esun di nos. Por ehempel, haci sigur di cultiva amistad cu hende cu tin e mesun creencianan cu bo, y tambe e mesun punto di bista moral y e mesun normanan di loke ta bon y malo. E amigonan ei lo yuda bo alcansa bo metanan. Ademas, pakico lo bo kier ta pega cu un persona kende no tin e mesun normanan moral cu bo? Bijbel ta mustra e importancia di scohe e amigonan corecto ora e ta bisa: “Esun cu anda cu hende sabi lo ta sabi, ma un compañero di hende bobo lo sufri daño.”—Proverbionan 13:20.

Lealtad Ta Algo Cu Nos Por Siña

Ora un mucha mira con pegasaya ta pega riba un otro su paña, probablemente lo e tin gana di hunga e wega ei bes tras bes. Nos por bisa mescos di un persona cu ta leal. Pakico? Pasobra mas nos practica lealtad, mas facil e ta bira. Si un persona siña for di tempran den bida pa ta leal den famia, mas despues lo ta mas facil pa e desaroya amistad cu ta basa riba lealtad. Na su debido tempo, amistadnan fuerte y duradero asina por prepara e caminda pa lealtad den matrimonio. Tambe esei lo yud’e pa e ser leal den e amistad di mas importante cu tur.

Hesus a bisa cu e mandamento di mas grandi ta pa stima Yehova Dios cu henter nos curason, alma, mente y forsa. (Marco 12:30) Esaki ta nifica cu nos mester ta totalmente leal na Dios. Ser leal na Yehova Dios ta trece bendicionnan rico. Nunca lo e desapunta nos, pasobra e ta bisa di su mes: “Mi ta leal.” (Yeremias 3:12, NW) En berdad, lealtad, of fieldad, na Dios ta trece bendicion eterno.—1 Huan 2:17.

[Comentario na pagina 6]

E lealtad di un bon amigo lo duna bo un sintimento di tierno cariño

[Plachi na pagina 5]

Miembronan di famia cu ta leal na otro ta percura pa otro