Ta Bale la Pena pa Bo Ta Leal?
“BO TA pagando mucho hopi cen pa bo seguro medico”, Karl,a un bendedo di seguro a bisa. “Si bo pasa pa mi compania, bo ta spar 15 euro pa luna, locual ta bastante.”
“Por ta bo tin rason”, Jens a contesta. “Pero mi tin mi seguro medico cu e mesun compania pa hopi aña caba. Nan a yuda mi bon den pasado, y mi kier keda leal na nan.”
“Lealtad ta un bunita cualidad”, Karl a contesta. “Pero bo lealtad ta costa bo placa!”
Karl tawatin rason. Hopi bes, e echo cu bo ta leal, of fiel, na un otro persona por costa bo placa.b Tambe e ta exigi tempo, energia y compromiso emocional. Ta bale la pena pa bo ta leal?
Hopi Ta Balor’e, Ma Poco Ta Practic’e
Den un encuesta cu e Instituto di Sondeo di Opinion Allensbach a efectua na Alemania, 96 porshento di e personanan entrevista a mira fieldad como un cualidad deseabel. Un di dos encuesta cu Allensbach a efectua entre personanan di 18 pa 24 aña a mustra cu 2 di cada 3 di nan ta mira “fieldad” como algo “in”, es decir, algo positivo.
Hopi hende ta considera lealtad of fieldad como bon cualidadnan, pero loke realmente ta conta ta pa ser fiel of ser leal. Den varios pais Europeo, por ehempel, masha poco pareha casa of miembro di famia ta leal na otro. E situacion entre amigo tambe ta mescos. Masha poco di nan sa ta echt leal na otro. Y e lealtad cu tawata existi un tempo entre doño di trabou cu trahado of entre negoshi cu su clientenan basicamente a bai perdi. Con bin?
Tin biaha e bida druk cu nos ta hiba ta caba cu tur e tempo y fortalesa emocional cu nos mester tin pa por cumpli cu compromisonan cu ta exigi lealtad. Hende cu ta sinti cu otronan a laga nan na caya kisas awor no kier ta fiel na ningun hende mas. Talbes otronan ta prefera di hiba un bida liber di compromiso, djis pa nan no tin nodo di ta leal.
Sea cual sea e motibo, hopi hende ta considera lealtad un birtud, pero masha poco di nan ta practic’e. Pesei, laga nos considera e siguiente preguntanan: Ta bale la pena pa ta leal? Si ta asina, na ken nos mester ta leal, y den ki manera? Kico ta e beneficionan di lealtad?
[Nota]
a A cambia algun nomber den e articulo aki y den esun siguiente.
b Aunke “lealtad” y “fieldad” no ta ser uza semper den e mesun contexto, den e articulonan aki tin biaha nos ta uza esun na luga di e otro.
[Plachi na pagina 3]
Hopi hende ta considera lealtad un birtud, pero masha poco di nan ta practic’e