Mundo Su Manera Troci di Mira Lealtad

UN DIABIERNA anochi na Tel Aviv, Israel, un mucha homber a join un grupo di hoben cu tawata warda pafo di un club nocturno. Un rato despues un explosion teribel a bula e grupo for di otro.

Di e manera ei, otro atacante suicida a entrega su bida, y kita bida di 19 otro hoben violentamente. Despues un asistent medico a bisa reporteronan: “Tawatin parti di curpa plama tur caminda. Tur tawata hoben; asina jong. Ta e esena di mas horibel cu mi a yega di mira.”

Thurstan Brewin a skirbi den The Lancet cu “ta net e cualidadnan cu hende ta admira, manera por ehempel lealtad . . . , por yuda guera cuminsa, y pone cu ta mas dificil pa para nan.” Si, henter historia humano ta mancha cu matansanan sangriento cometi den nomber di lealtad: e crusadanan di cristiandad of e masacrenan organisa di Alemania Nazi ta djis dos ehempel.

Mas y Mas Victima di Deslealtad

Niun hende no por nenga cu lealtad fanatico por ta destructivo, pero falta di lealtad tambe por causa sosiedad hopi daño. Segun un diccionario, ser leal ta nifica ser fiel na un persona of un causa, y esei ta encera cu bo no ta bandona bo posicion ni traiciona bo causa apesar di tentacion. Aunke mayoria hende ta bisa cu nan ta admira hende leal asina, tin un gran falta di lealtad den sosiedad humano asta na e nivel di mas basico: den famia. Cifranan di diborcio a subi drasticamente como resultado di e enfasis cu hende ta pone riba satisfaccion personal, e stress y ansiedad di bida diario, y e infieldad sexual cu a bira asina comun. Y mescos cu tawata e caso cu e explosion di bom na Tel Aviv, hopi bes ta hobennan ta e victimanan inocente.

Segun un estudio: “Hopi bes, educacion di mucha ta ser perhudica door di e instabilidad familiar cu diborcio, separacion y criansa door di un solo mayor ta trece cu ne.” Principalmente mucha homber cu ta biba serca nan mama so tin chens di cai atras na scol, comete suicidio of cai den crimen hubenil. Cada aña, un miyon mucha na Merca tin cu pasa den diborcio di nan mayornan, y mita di tur mucha den e pais ei cu nace den un matrimonio tin hopi chens di bira victima di diborcio prome cu nan cumpli 18 aña. Cifranan ta mustra cu e situacion ta mes tristo pa hopi hoben na otro parti di mundo.

Lealtad—Un Norma Mucho Halto?

E manera cu e sentido di lealtad tradicional ta disparce actualmente ta pone e palabranan di Rei David parce mas apropiado cu nunca: “Yuda, SEÑOR, pasobra no tin hende deboto [“leal”, NW] mas; pasobra e fielnan ta disparce for di meimei di e yiunan di hende.” (Salmo 12:1) Kico ta ocasiona e falta di lealtad cu nos ta mira tur caminda? Roger Rosenblatt a skirbi e siguiente comentario den e revista Time: “Lealtad ta un norma hopi bunita, pero den naturalesa di hende tin simplemente mucho hopi temor, falta di confiansa propio, oportunismo y ambicion pa bo spera pa nos como hende suak por cumpli cu un norma asina.” Den un descripcion di e tempo cu nos ta biba aden, Bijbel ta haci un declaracion masha franco: “Hende lo ta stimado di nan mes . . . impio [“desleal”, NW], sin amor.”—2 Timoteo 3:1-5.

Ya cu lealtad of falta di lealtad tin un influencia asina grandi riba loke hende ta pensa y haci, nos lo por puntra nos mes: ‘Ken realmente ta merece nos lealtad?’ Wak kico e siguiente articulo tin di bisa riba e pregunta aki.

[Reconocemento di plachi na pagina 3]

Potret ariba: © AFP/CORBIS