Nos Amigonan Mester Ta Hende Cu Ta Stima Dios

UN AMIGO ta un hende cu nos gusta papia cu ne y pasa tempo cu ne. Pero ta importante pa nos tin amigo cu ta bon. Ken bo ta kere cu ta e miho amigo cu nos por tin?— Si, Yehova Dios.

Pero, nos por ta amigo di Dios?— Wel, Bijbel ta bisa cu Abraham, un homber cu a biba hopi tempo pasa, tawata “amigo di Dios.” (Santiago 2:23) Bo sa dicon e tawata su amigo?— Bijbel ta bisa nos dicon. E ta bisa cu Abraham a obedece Dios. El a obedece asta ora Dios a pidie haci cos cu tawata dificil p’e. Kiermen, si nos kier ta amigo di Yehova, nos mester haci cos cu e ta keda contento cu ne, mescos cu Abraham a haci, y mescos cu e Gran Maestro tambe a haci semper.—Genesis 22:1-14; Huan 8:28, 29; Hebreonan 11:8, 17-19.

Hesus a bisa su apostelnan: “Boso ta mi amigo, si boso haci loke mi ordena boso.” (Huan 15:14) Tur loke Hesus a bisa hende haci a bin di Yehova. Pesei, loke Hesus tawata kiermen ta, cu ta hende cu haci loke Dios bisa ta su amigo. Si, tur su amigonan tawata stima Dios.

E apostelnan di e Gran Maestro tawata algun di su miho amigonan. Na pagina 75 di e buki aki bo por mira nan riba e plachi. Nan tawata cana tur caminda cu ne y yud’e predica. Hesus a pasa hopi tempo cu e hombernan ei. Nan tawata come hunto, papia cu otro tocante Dios y haci otro cos hunto. Pero Hesus tawatin hopi amigo mas. E tawata keda na nan cas y nan tawata pasa bon hunto.

Un di e famianan cu Hesus tawata gusta keda serca dje tawata biba na un pueblo chikito cu yama Betania. E pueblo ei tawata keda net banda di e stad grandi Herusalem. Bo ta corda e famia ei?— Nan ta Maria, Marta y nan ruman homber Lazaro. Hesus a bisa cu Lazaro ta su amigo. (Huan 11:1, 5, 11) El a stima e famia aki y e tawata gusta pasa tempo cu nan, door cu nan tawata stima Yehova y sirbie.

Esei no kiermen cu Hesus no tawata bondadoso cu hende cu no ta sirbi Dios. E tawata trata nan tambe bon. E tawata asta bai nan cas y come cu nan. Door di esei, tin hende a bisa cu Hesus ta ‘amigo di cobrado di belasting y pecado.’ (Mateo 11:19) Pero Hesus no tawata bai cas di e hendenan ei door cu e gusta e manera cu nan ta biba. E tawata bishita nan pa e por papia cu nan tocante Yehova. El a purba yuda nan kita for di mal caminda y sirbi Dios.

Un di e biahanan cu el a haci e cos ei ta ora e tawata na e stad cu yama Yerico. Hesus tawata djis pasando eibanda riba caminda pa bai Herusalem. Tawatin yen di hende, y un di nan tawata un homber cu yama Zakeo. Zakeo kier a haya un chens di mira Hesus. Pero e tawata un homber cortico, y e no por a mira Hesus pasobra tawatin yen di hende rond di dje. Pesei, el a core bai un luga mas dilanti riba e caminda, anto a subi un palo pa e por a mira Hesus miho ora e pasa eibanda.

Ora Hesus a yega na e palo, el a hisa cara y bisa: ‘Baha abou lihe, pasobra awe mi ta bin bo cas.’ Pero Zakeo tawata un homber rico cu a yega di haci cos malo. Dicon Hesus kier a bai cas di un homber asina?—

No ta door cu Hesus a gusta e manera cu e homber ei a biba. El a bai cas di Zakeo pa e papia cu ne tocante Dios. Hesus a mira con e homber a haci su best pa mir’e. Pesei, e tawata sa cu casi sigur Zakeo lo scuch’e. Tawata un bon chens pa papia cu ne tocante con Dios ta bisa cu hende mester biba.

Anto awor, kico ta pasando riba e plachi?— Zakeo a gusta e cosnan cu Hesus a siñ’e. El a sinti duele, pasobra el a yega di nek hopi hende, y awor el a priminti di paga nan bek e cennan cu e no tawatin mag di coi for di nan. Anto e ora ei, el a bira siguido di Hesus. Ta te despues cu el a haci tur e cosnan ei, Zakeo cu Hesus a bira amigo.—Lucas 19:1-10.

Si nos ta hende cu ta siña for di e Gran Maestro, bo ta kere cu nos lo bishita hende cu no ta nos amigo?— Si. Pero si nos bai nan cas, nos no ta bai pasobra nos gusta e manera cu nan ta biba. Y nos lo no haci cos malo hunto cu nan tampoco. Nos lo bishita nan pa nos por papia cu nan tocante Dios.

Pero nos bon amigonan ta e hendenan cu mas nos gusta pasa tempo cu ne. Ma pa nan ta e sorto di amigo cu ta bon pa nos tin, nan mester ta e sorto di amigo cu Dios ta gusta. Tin hende cu no sa mes ken Yehova ta. Pero si nan kier siña tocante Dios, nos por yuda nan. Y ora nan bin stima Yehova manera nos ta stim’e, e ora ei nan por bira nos bon amigo.

Tin un otro manera pa bo haya sa si ta un bon idea pa bo bira bon amigo di un hende. Bo tin cu paga tino kico e ta haci. E ta haci malo contra otro hende, anto hari tambe? E cos ei no ta bon, toch?— E ta hay’e den problema tur ora? Nos no kier haya nos den problema hunto cu ne, no ta berdad?— Of, e ta haci cos pa malo anto pensa cu e ta sabi pasobra ningun hende no a catch e? Asta si ningun hende no catch e, Dios si a mira kico el a haci, no ta asina?— Bo ta kere cu ta bon pa nos tin un amigo asina?—

Bo por coi bo Bijbel? Laga nos wak kico Bijbel ta bisa tocante con hende cu nos ta anda cu ne ta afecta nos bida. E texto ta 1 Corintionan capitulo 15, versiculo 33. B’a hay’e?— E ta bisa: “No laga hende gaña boso: ‘Mal compania ta daña bon custumber.’” Esei kiermen cu si nos anda cu mal hende, nos tambe ta bira mal hende. Y mescos ta conta si nos anda cu bon hende; nan ta yuda nos haya bon custumber.

Laga nos no lubida nunca cu Esun mas importante den nos bida ta Yehova. Nos no kier pa nada pasa cu e amistad cu nos tin cu ne, toch?— Pesei nos mester paga tino pa tur nos amigonan ta hende cu ta stima Dios.