Loke Mucha Mester Haya di Nan Mayornan

TUR mayor ta tuma parti den un suseso cu ningun hende no por caba di compronde completamente. Cada un ta contribui cu un parti di nan mes, y como resultado un ser humano bibo y completamente forma ta desaroya den bariga di e mama. Pues, no ta nada straño cu ora un baby nace, hende ta papia di “e milager di nacemento.”

Pero di mes, hayamento di yiu ta apenas e comienso di e responsabilidad di e mayornan. Ora e baby caba di nace e ta depende casi completamente riba otro hende pa su necesidadnan fisico. Pero ora e cuminsa crece e tin mester di mas. E tin mester di yudansa pa e desaroya den sentido mental, emocional, moral y spiritual.

Un di e cosnan principal cu un mucha tin mester pa e por desaroya na un manera sano, ta amor di su mayornan. Ta importante pa expresa bo amor na dje cu palabra, pero palabra so no ta basta. Bo mester mustr’e cu accion cu bo ta stim’e. Si, mucha tin mester pa nan mayornan duna nan un bon ehempel. Nan tin mester di guia moral: principio cu por yuda nan den bida. Y ta for di hopi chikito nan mester cuminsa haya e guia aki. Cosnan masha tristo por pasa, y sa pasa tambe, ora mucha keda sin haya yudansa prome cu ta laat.

E principionan cu tin den Bijbel ta miho cu cualkier principio cu bo por haya otro caminda. Siñansa basa riba Bijbel tin cierto bentahanan unico. Ora bo uza Bijbel pa siña bo yiunan, nan ta bin compronde cu loke bo ta siña nan no ta djis algo cu un otro ser humano ta bisa, sino loke nan Creador, nan Tata celestial ta bisa. Esei ta duna bo consehonan un forsa inigualabel.

Bijbel ta anima mayornan pa traha duro pa inculca principio husto den mente di nan yiunan. Pero segun cu muchanan ta crece, hopi bes mayornan ta haya cu ta dificil pa papia cu nan tocante net e cosnan di mas importante. E buki aki, Siña for di e Gran Maestro, ta diseña pa yuda preveni cu un situacion asina ta desaroya. E ta duna abo y bo yiunan informacion spiritual pa boso lesa hunto. Pero mas ainda, e mester yuda lanta combersacion entre e chikitin y esun cu ta lesa e buki aki cu ne.

Lo bo nota cu e buki ta pidi pa e muchanan duna contesta. Tin hopi pregunta den e capitulonan, na luganan bon scohi. Ora bo yega na nan, lo bo mira un strepi (—). E strepi ta pa corda bo cu bo mester pausa, pa anima e mucha expresa su mes. Mucha gusta participa. Si nan no por participa, nan ta perde interes lihe.

Pero loke ta asta mas importante ta cu e preguntanan aki lo yuda bo haya sa kico ta biba den mente di bo yiu. Por sosode cu e mucha ta duna un contesta robes. Pero loke e les ta sigui bisa despues di cada pregunta t’ei specialmente pa yuda e mucha desaroya un manera sano di pensa.

Algo special di e buki aki ta e mas cu 230 plachinan. Mayoria di nan ta bin acompaña cu texto breve cu ta anima e mucha pa bisa kico e ta pensa tocante loke e ta mira riba e plachi, y tocante loke el a lesa. Pesei, ta bon pa bo repasa e plachinan cu e mucha. Nan por sirbi como un excelente medio di educacion cu ta caba di mustra kico ta e lesnan principal cu e mucha mester saca for di e capitulo.

Ora e mucha siña lesa, anim’e pa e lesa e buki pa bo tende, y pa e les’e su so tambe. Mas e les’e, mas e bon consehonan den dje lo penetra den su mente y curason. Pero di tur manera ta hopi importante pa boso lesa e buki hunto y riba un base regular, pasobra esei lo fortalece e lasonan di cariño y respet entre abo y bo yiu.

Apenas un par di decada pasa, nos lo no por a kere mes cuanto awendia nos muchanan ta ser exponi na relacion sexual inapropiado, spiritismo y otro practicanan baho. Pesei nan tin mester di proteccion, y e buki aki ta yuda bo duna nan tal proteccion na un manera drechi, pero franco. Pero loke mucha tin mester di dje principalmente ta pa bo dirigi nan na e Fuente di tur sabiduria, nos Tata den shelo, Yehova Dios. Esei ta loke Hesus e Gran Maestro a haci semper. Nos ta spera sinseramente cu e buki aki lo yuda abo y bo famia dirigi boso bida di tal manera cu boso ta agrada Yehova, cu bendicion eterno como resultado.