Dicon Hesus Tawata un Gran Maestro

MAS cu dos mil aña pasa, un yiu masha special a nace. El a crece bira e homber mas importante cu a yega di biba. E tempo ei, ningun hende no tawatin avion ni auto. No tawatin television, ni computer ni Internet tampoco.

Nan a yama e yiu Hesus. El a bira e homber mas sabi cu a yega di biba na mundo. Hesus a bira e miho maestro tambe. E tawata splica cos dificil na un manera facil pa hende compronde.

Hesus tawata siña hende unda cu el a topa nan. E tawata siña nan canto di lama y den boto. E tawata siña nan na cas y canando di un luga pa otro. Hesus no tawatin auto, ni e no a biaha den bus ni den trein. Hesus tawata cana na pia bai di un luga pa otro pa siña hende.

Hende por siña nos hopi cos. Pero e Gran Maestro, Hesus, por siña nos e cosnan di mas importante. Den Bijbel ta caminda nos por lesa e cosnan cu Hesus a bisa. Ora nos tende su palabranan for di Bijbel, ta mescos cu ta cu nos Hesus ta papia.

Dicon Hesus tawata asina un Gran Maestro? Un motibo ta cu Hesus mes tawatin un maestro cu a siñ’e. Y Hesus tawata sa cu ta masha importante pa scucha. Pero, di ken Hesus a scucha? Ken a siñ’e?— Su Tata. Y Tata di Hesus ta Dios.

Prome cu Hesus a bini na tera como hende, e tawata biba den shelo serca Dios. Esei kiermen cu Hesus no tawata manera otro hende, pasobra ningun otro hende no a yega di biba den shelo prome cu nan a nace na tera. Hesus tawata un bon Yiu den shelo. E tawata scucha di su Tata. Pesei Hesus por a siña hende e cosnan cu el a siña for di Dios. Abo por haci mescos cu Hesus door di scucha di bo tata y bo mama.

Ademas Hesus tawata un Gran Maestro pasobra el a stima hende. E kier a yuda hende siña tocante Dios. Hesus a stima hende grandi, pero el a stima mucha tambe. Anto mucha tawata gusta bai serca Hesus pasobra e tawata papia cu nan y scucha nan.

Un dia, un par di mayor a trece nan yiunan chikito serca Hesus. Pero Hesus su amigonan a kere cu e tawata mucho druk pa papia cu mucha chikito. Pesei nan a bisa e mayornan y e muchanan pa nan bai. Pero kico Hesus a bisa?— Hesus a bisa: “Laga e muchanan bin serca mi; no stroba nan.” Si, Hesus tawata kier pa e muchanan bin serca dje. Maske e tawata un homber hopi sabi y hopi importante, Hesus a tuma tempo pa siña mucha chikito.—Marco 10:13, 14.

Bo sa dicon Hesus a siña mucha y a scucha nan? Un motibo ta cu e tawata kier haci nan felis door di conta nan di Dios, su Tata den shelo. Con abo por haci hende felis?— Door di conta nan e cosnan cu abo a siña tocante Dios.

Un biaha Hesus a uza un mucha chikito pa siña su amigonan un les importante. El a pone e mucha para meimei di Su disipelnan, esta, su siguidonan. E ora ei Hesus a bisa cu e homber grandinan ei mester a cambia nan manera, y bira manera e mucha.

Kico Hesus tawata kiermen? Bo sa con hende grandi of asta mucha grandi mester bira manera un mucha chikito?— Wel, un mucha chikito no sa mes hopi cu un hende grandi, y e ta cla pa siña. Pesei, loke Hesus tawata kiermen ta cu su disipelnan mester ta humilde, manera mucha chikito. Si, nos tur por siña hopi cos for di otro. Y nos tin cu compronde cu e cosnan cu Hesus ta siña nos ta mas importante cu loke nos mes ta pensa.—Mateo 18:1-5.

Tambe Hesus tawata asina un Gran Maestro pasobra e tawata sa con pa splica hende cos na un manera interesante. E tawata splica hende cos na un manera facil y cla. E tawata papia tocante parha, flor y otro cos cu hende sa di dje, pa yuda nan compronde cosnan di Dios.

Un dia Hesus tawata riba un sero, y hopi hende a bini serca dje. Hesus a cai sinta y a duna nan un discurso, esta, un sermon, manera bo ta mira aki. E discurso aki yama e Sermon Riba Sero. Hesus a bisa: ‘Mira e parhanan di shelo. Nan no ta sembra. Nan no ta warda cuminda den mangasina. Pero Dios den shelo ta duna nan cuminda. Boso no bal mucho mas cu nan?’

Tambe Hesus a bisa: ‘Mira e lelinan di sabana. Nan ta crece sin traha mata curpa. Anto mira con bunita nan ta! Ni Rei Salomon, cu tur su rikesa, no tawata bisti mas bunita cu leli di sabana. Pesei, si Dios ta cuida flor cu ta crece, lo e no cuida boso tambe?’—Mateo 6:25-33.

Bo a compronde kico Hesus a siña nos aki?— E no tawata kier pa nos precupa tocante unda nos ta bai haya cuminda pa come ni paña pa bisti. Dios sa cu nos tin mester di tur e cosnan ei. Hesus no tawata kiermen cu nos no mester traha pa nos tin cuminda cu paña. Loke el a bisa ta cu nos mester pone Dios na prome luga. Si nos haci asina, Dios mes lo percura pa nos tin cuminda pa come y paña pa bisti. Abo ta kere loke el a bisa?—

Kico e hendenan a pensa ora Hesus a caba di papia?— Bijbel ta bisa cu nan a keda asombra cu su manera di siña. Nan tawata gusta scuch’e. E cosnan cu el a bisa a yuda hende haci bon.—Mateo 7:28.

Si, ta hopi importante pa nos siña for di Hesus. Bo sa con nos por siña di dje?— Wel, nos tin un buki, y e cosnan cu Hesus a bisa ta skirbi den dje. Bo sa con yama e buki ei?— Bijbel Santo. Esei kiermen cu nos por scucha Hesus si nos paga tino na e cosnan cu nos ta lesa den Bijbel. Anto den Bijbel tin un historia hopi emocionante tocante con Dios mes a bisa nos pa scucha Hesus. Laga nos wak kico a pasa.

Un dia Hesus a bai cu tres di su amigonan te na halto riba un sero. Nan tawata yama Santiago, Huan cu Pedro. Despues nos ta bai siña hopi mas di nan, pasobra nan tur tres tawata hopi bon amigo di Hesus. Awor, na e ocasion special aki, Hesus su cara a cuminsa briya masha hopi. Anto su paña a cuminsa briya mescos cu lus, manera bo ta mira riba e plachi.

Despues, Hesus cu su amigonan a tende un stem for di shelo. E stem a bisa: ‘Esaki ta mi Yiu stima, esun cu mi ta contento cu ne. Tende di dje.’ (Mateo 17:1-5) Bo sa ta ken su stem esei tawata?— Di Dios! Si, ta Dios mes a bisa cu nan mester a tende di su Yiu.

Kico di nos cu ta biba awe? Nos lo haci loke Dios a bisa, esta, tende di su Yiu e Gran Maestro?— Esei ta loke nos tur mester haci. Bo ta corda con nos por scucha Hesus?—

Si, nos por scucha e Yiu di Dios door di lesa e historianan di su bida den Bijbel. Tin hopi cos masha bunita cu e Gran Maestro tin pa conta nos. Bo ta bai gusta siña tocante nan den Bijbel. Anto si bo conta bo amigonan e cosnan bon cu bo ta siña, esei lo haci bo felis tambe.