Un Carta di Dios, Cu Ta Stima Bo

BISA mi, cua buki bo ta gusta mas cu tur?— Tin mucha cu ta scohe buki tocante bestia, y tin mucha ta scohe buki cu tin hopi plachi. Bukinan asina por ta dushi pa lesa.

Pero e miho bukinan na mundo ta esnan cu ta siña nos e berdad tocante Dios. Un di e bukinan ei ta mas special cu tur. Abo sa ta cua?— Ta Bijbel.

Dicon Bijbel ta asina importante?— Debi cu ta Dios a duna nos e. Bijbel ta conta nos di Dios y di e bon cosnan cu Dios ta bai haci pa nos. Anto e ta mustra nos kico nos mester haci pa Dios keda contento cu nos. E ta manera un carta di Dios.

Dios por a skirbi henter Bijbel den shelo anto duna nos e. Pero no ta esei el a haci. Dios a uza su sirbidonan riba tera pa skirbi casi tur parti di Bijbel, maske e pensamentonan den dje si ta di Dios.

Con Dios a haci e cos ei?— Wak un ehempel aki pa bo compronde. Ora nos tende stem di un hende na radio, e stem por ta bini di un hende cu ta hopi leu. Ora nos wak television, nos por asta mira hende di otro parti di mundo, y nos por tende loke nan ta papia tambe.

Hende por yega te luna den nan raketnan, anto for di ayariba manda mensahe pa nos aki riba tera. Bo tawata sa esei?— Si hende mes por haci e cos ei, bo no ta kere cu Dios por manda mensahe for di shelo?— Claro cu si! Y el a hacie hopi prome cu hende tawatin radio of television.

Tawatin un homber cu a yega di tende Dios papia. Su nomber ta Moises. Moises no por a mira Dios, pero el a tende Dios su stem si. Miyones di hende tawat’ei ora e cos ei a pasa. Riba e dia ei Dios a pone henter un sero sagudi, y tawatin strena cu lamper. E hendenan tawata sa cu Dios a papia, pero nan tawatin hopi miedo. Pesei nan a bisa Moises: “No laga Dios papia cu nos, pa nos no muri.” Despues Moises a skirbi e cosnan cu Dios a bisa. Y loke Moises a skirbi ta para den Bijbel.—Exodo 20:18-21.

Moises a skirbi e prome cinco bukinan di Bijbel. Pero no ta e so a skirbi Bijbel. Dios a uza mas o menos 40 homber pa skirbi diferente parti di Bijbel. E hombernan aki a biba hopi, hopi tempo pasa, y a dura hopi aña prome cu nan a caba di skirbi Bijbel. Si, a dura mas o menos 1.600 aña! E cos asombroso ta, cu maske algun di e hombernan aki no a yega di topa otro nunca, tur loke nan a skirbi ta klop bon bon cu otro.

Un par di homber cu Dios a uza pa skirbi Bijbel tawata hopi conoci. Prome, Moises tawata un wardado di carne. Pero despues el a bira lider di e nacion di Israel. Salomon tawata un rei, y e tawata e homber mas sabi y mas rico na mundo. Pero tawatin otro escritornan di Bijbel cu no tawata asina conoci. Amos tawata cuida palo cu ta pari figo.

Tambe tawatin un escritor di Bijbel cu tawata docter. Bo sa con yam’e?— Si, Lucas. Un otro escritor di Bijbel a yega di ta cobrado di belasting. E yama Mateo. Y un otro tawata abogado, un experto den lei religioso Hudiu. E a skirbi mas tanto buki di Bijbel cu tur e otro escritornan. Bo sa con yam’e?— Si, Pablo. Anto Pedro cu Huan, dos disipel di Hesus cu tambe a skirbi parti di Bijbel, tawata piscado.

Hopi di e escritornan di Bijbel aki a skirbi cosnan cu Dios tawata bai haci den futuro. Con nan por tawata sa e cosnan ei prome cu nan a sosode?— Ta Dios a laga nan sa. El a bisa nan kico ta bai pasa.

Tempo cu Hesus, e Gran Maestro, tawata na tera, casi henter Bijbel tawata skirbi caba. Awor, corda cu e Gran Maestro a yega di biba den shelo caba. E tawata sa kico Dios a haci. El a kere cu Bijbel ta di Dios?— Si.

Ora Hesus tawata papia cu hende tocante e cosnan cu Dios a haci, e tawata lesa for di Bijbel. Tin biaha e tawata bisa nan for di cabes loke Bijbel ta bisa. Y Hesus a trece mas informacion di Dios tambe pa nos. Hesus a bisa: “E cosnan cu mi a tende for di dje, esakinan mi ta papia cu e mundo.” (Huan 8:26) Hesus a tende hopi cos for di Dios, pasobra el a yega di biba serca Dios. Y unda nos por lesa e cosnan cu Hesus a bisa?— Den Bijbel. Nan tur ta skirbi pa nos lesa.

Claro cu e hendenan cu Dios a uza pa skirbi Bijbel a skirbie den e idioma cu nan tawata papia tur dia. Pesei mayor parti di Bijbel ta skirbi na Hebreo, algun parti ta skirbi na Arameo, y un parti basta grandi na Griego. Door cu mayoria hende awendia no por lesa e idiomanan ei, hende a traduci Bijbel na otro idioma. Awendia tin partinan di Bijbel cu ta traduci na mas cu 2.260 idioma pa hende por lesa. Imagina bo! Bijbel ta un carta cu Dios a manda pa hende rond mundo. Pero maske hende a traducie masha hopi bes, toch e mensahe den dje ta keda di Dios.

Loke Bijbel ta bisa ta importante pa nos. Ta hopi tempo pasa nan a skirbie, pero e ta conta nos cos cu ta pasando awor. Y e ta conta nos kico Dios ta bai haci aki poco tempo. E ta bisa cos emocionante! E ta duna nos un speransa masha bunita.

Tambe Bijbel ta siña nos con Dios kier pa nos biba. E ta bisa nos kico ta bon y kico ta malo. Abo mester sa e cosnan aki, y ami tambe. Bijbel ta conta nos di hende cu a haci malo y loke a pasa cu nan, pa nos no tin nodi pasa den e mesun problemanan cu nan a pasa aden. Tambe e ta conta nos di hende cu a haci bon, y e ta mustra nos con cos a bai bon pa nan door di esei. Tur e cosnan aki ta skirbi pa nos bon.

Pero pa nos por probecha di tur e bon cosnan den Bijbel, nos mester sa contesta di un pregunta. E pregunta ta esaki: Ta ken a duna nos Bijbel? Kico abo lo contesta?— Si, henter Bijbel ta di Dios. Wel anto, con nos por mustra cu nos ta sabi di berdad?— Door di scucha Dios y haci loke e ta bisa.

Pesei nos mester tuma tempo pa lesa Bijbel hunto. Ora nos haya carta di un hende cu nos ta stima hopi, nos ta keda les’e cada bes. Nos ta stima e carta ei masha hopi. Asina nos mester stima Bijbel tambe, pasobra e ta un carta di Esun cu mas ta stima nos. E ta un carta di Dios, cu ta stima nos.