Dios Tin Nomber

KICO hopi bes ta e prome cos cu bo ta puntra un hende ora bo sera conoci cu ne?— Si, bo ta puntr’e su nomber. Tur hende tin nomber. Dios a duna e prome homber riba tera un nomber. El a yam’e Adam. Adam su casa tawata yama Eva.

Pero no ta hende so tin nomber. Pensa kico ta un par di otro cos cu tambe tin nomber. Ora un hende duna bo un popchi, un cacho of un pushi, bo ta duna e tambe nomber. Of no?— Si, ta hopi importante pa bo tin nomber.

Hisa cara anochi, y wak cuanto streya tin. Bo ta kere cu nan tin nomber?— Si, Dios a duna cada streya den shelo un nomber. Bijbel ta bisa nos: ‘E ta conta cuanto streya tin; e ta yama nan tur na nan nomber.’—Salmo 147:4.

Segun bo, ken ta e persona mas importante di henter universo?— Si, Dios. Bo ta kere cu e tin un nomber?— Hesus a bisa cu si. Un biaha cu Hesus tawata resa na Dios, el a bisa Dios: ‘Mi a haci bo nomber conoci na mi siguidonan.’ (Huan 17:26) Abo conoce e nomber di Dios?— Dios mes ta siña nos con su nomber ta. E ta bisa: “Ami ta Yehova. Esei ta mi nomber.” Kiermen, Dios su nomber ta YEHOVA.—Isaias 42:8, NW.

Con bo ta sinti ora un hende corda bo nomber?— Bo ta bira contento, no?— Yehova tambe kier pa hende sa su nomber. Pesei, ora nos ta papia tocante Dios nos mester uza su nomber, Yehova. E Gran Maestro a uza e nomber di Dios, Yehova, ora e tawata papia cu hende. Un biaha Hesus a bisa: “Bo tin cu stima Yehova bo Dios cu henter bo curason.”—Marco 12:30, NW.

Hesus tawata sa cu “Yehova” ta un nomber hopi importante. Pesei, el a siña su siguidonan pa uza e nomber di Dios. Asta el a siña nan papia di e nomber di Dios ora nan ta haci oracion. Hesus tawata sa cu Dios kier pa tur hende conoce Su nomber, Yehova.

Hopi tempo pasa Dios a mustra Moises con importante Su nomber ta. Moises tawata un di e yiunan di Israel. E yiunan di Israel tawata yama Israelita, y nan tawata biba na un tera cu yama Egipto. E hendenan di Egipto tawata yama Egipcio. Nan a pone e Israelitanan bira catibo, y nan tawata haci hopi cos di abuso cu nan. Ora Moises a bira grandi, el a purba yuda un di e hendenan di su pueblo. Esei a pone Farao, e rei di Egipto, rabia. E kier a mata Moises! Pesei Moises a hui bai for di Egipto.

Moises a bai un otro tera, e tera di Madian. Na Madian, Moises a casa y a cuminsa cria un famia. El a traha como cuidado di carne tambe. Un dia ora Moises tawata cuidando su carnenan banda di un sero, el a mira un cos masha straño. Un mata di sumpiña tawata na candela, pero e no tawata kima! Moises a hala serca pa wak e miho.

Bo sa kico a pasa e ora ei?— Moises a tende un stem ta yam’e for di den e mata di sumpiña cu tawata na candela. E stem a bisa, “Moises! Moises!” Ta ken tawata yam’e?— Ta Dios tawata papia! Dios tawatin hopi trabou pa Moises. Dios a bisa: ‘Bin, y lo mi manda bo serca Farao, rei di Egipto, pa bo saca mi pueblo, e yiunan di Israel, for di Egipto.’ Dios a priminti Moises cu E lo yud’e haci esei.

Pero Moises a bisa Dios: ‘Mi ta bai serca e yiunan di Israel na Egipto y lo mi bisa nan cu Dios a manda mi. Y si nan puntra mi: “Con ta su nomber?” kico lo mi contesta nan?’ Dios a bisa Moises pa e bisa e yiunan di Israel: ‘Yehova a manda mi serca boso. Yehova ta mi nomber pa semper.’ (Exodo 3:1-15) Esei ta mustra cu Dios ta bai keda yama Yehova. Nunca e no ta bai cambia su nomber. Dios kier pa nos keda yam’e Yehova pa semper.

Ora Moises a bai bek Egipto, e Egipcionan a kere cu Yehova tawata djis un dios suak di e Israelitanan. Nan no a kere cu e ta Dios di henter mundo. Pesei Yehova a bisa e rei di Egipto: ‘Mi ta bai pone hende den henter mundo conoce mi nomber.’ (Exodo 9:16) Anto Yehova a haci su nomber conoci di berdad. Bo sa con el a hacie?—

Wel, el a laga Moises guia e pueblo di Israel, y saca nan for di Egipto. Ora nan a yega Lama Cora, Yehova a traha un caminda seco stret door di e lama. E Israelitanan a pasa riba tera seco y yega bon na otro banda. Pero ora Farao cu tur su soldanan a cuminsa pasa riba e caminda seco meimei di lama, e awanan cu tawata wanta na tur dos banda di e caminda a basha riba nan, y nan tur a muri.

Mesora hende di tur parti di mundo a cuminsa tende kico Yehova a haci na Lama Cora. Con nos por sa cu nan a tende loke a pasa?— Wel, un 40 aña despues e Israelitanan a yega Canan, e tera cu Yehova a priminti di duna nan. Ei un mucha mohe cu yama Rahab a bisa dos homber Israelita: “Nos a tende con [Yehova] a seca e awa di Lama Cora boso dilanti, ora boso a sali for di Egipto.”—Hosue 2:10.

Awendia tin hopi hende cu ta mescos cu e Egipcionan aya. Nan no ta kere cu Yehova ta Dios di henter mundo. Pesei Yehova kier pa su pueblo conta otro hende tocante dje. Hesus mes a haci esei. Poco prome cu fin di su bida riba tera, el a bisa Yehova den oracion: “Mi a haci bo nomber conoci na nan.”—Huan 17:26.

Abo kier ta manera Hesus? Awel, conta otro hende cu Dios su nomber ta Yehova. Kisas lo bo ripara cu hopi hende no sa su nomber. Un motibo ta cu algun di e hendenan cu ta traduci Bijbel ta pone SEÑOR cu letter capital na luga di e nomber di Dios. Pero si bo wak Exodo 3:14 den Beibel na papiamentu koriente (BPK), lo bo mira cu abou na e pagina e ta bisa: “Den nos traduccion e nomber Yahwe (Yehova) ta traduci cu SEÑOR cu letternan capital.”

Kico tur esaki ta siña nos?— Si, nos ta siña cu Yehova ta e nomber mas importante cu tin, pasobra e ta e nomber di Dios Todopoderoso, e Tata di Hesus, y Esun cu a traha tur cos. Anto corda: Hesus a bisa cu nos tin cu stima Yehova Dios cu henter nos curason. Abo ta stima Yehova?—

Con nos por mustra cu nos ta stima Yehova?— Un manera ta door di siña conoce Dios manera un Amigo. Un otro manera ta door di bisa otro hende su nomber. Tambe nos por conta nan tocante tur e cosnan maraviyoso cu Yehova a traha, y tur e bon cosnan cu el a haci. Yehova ta keda hopi contento ora nos haci asina, pasobra e kier pa hende sa di dje. Nos tambe por yuda hende sa di Yehova, no ta asina?—

No ta tur hende lo kier scucha nos papia tocante Yehova. Hopi hende no a scucha ni ora Hesus e Gran Maestro a papia di Dios. Pero esei no a pone Hesus stop di papia tocante Yehova.

Pesei, laga nos ta manera Hesus. Laga nos keda papia tocante Yehova. Si nos haci asina, Yehova Dios lo keda contento cu nos, pasobra nos ta mustra cu nos ta stima su nomber.