Esun Cu A Traha Tur Cos

AMI sa un cos cu lo bo gusta hopi. Bo kier tende ta kico e ta?— Wak bo man. Dobla bo dedenan. Awor, coi un cos. Bo man por haci hopi cos, anto bon tambe. Bo sa ta ken a traha nos mannan?—

Si, ta e mesun cu a traha nos boca, nos nanishi y nos wowo: Dios, Tata di e Gran Maestro. Bo no ta contento cu Dios a duna nos wowo?— Nos por mira hopi cos cu nan. Nos por mira flor. Nos por mira yerba berde y shelo blou. Asta nos por mira parha chikito ta come, manera esnan riba e plachi aki. Si, ta dushi cu nos por mira cos asina, no?—

Ma ta ken a traha e cosnan aki? Ta un hende a traha nan? No. Hende por traha cas. Pero ningun hende no por traha yerba cu ta crece. Hende no por traha yiu di parha, ni flor, ni ningun otro cos cu tin bida. Bo tawata sa e cos ei?—

Ta Dios a traha tur e cosnan aki. Ta Dios a traha shelo y tera. Ta Dios a traha hende tambe. El a crea e prome hende homber y e prome hende mohe. Esei ta loke Hesus, e Gran Maestro, a siña nos.—Mateo 19:4-6.

Con Hesus por tawata sa cu ta Dios a traha hende homber cu hende mohe? Hesus a mira Dios traha nan?— Si, el a mir’e. Hesus tawata serca Dios ora Dios a traha hende homber cu hende mohe. Hesus tawata e prome persona cu Dios a traha. Hesus tawata un angel, y e tawata biba den shelo serca su Tata.

Bijbel ta conta nos cu Dios a bisa: “Laga nos traha hende.” (Genesis 1:26) Bo sa ta ken Dios a bisa e cos ei?— El a bisa su Yiu. Dios tawata papiando cu esun cu despues a bini na mundo y a bira Hesus.

Con bo ta haya e cos ei? Bon, no? Imagina bo! Ora nos ta scucha Hesus, nos ta siñando for di esun cu tawata serca Dios ora Dios a traha mundo y tur otro cos. Hesus a siña hopi cos trahando cu su Tata den shelo. Pesei, no ta nada straño cu Hesus ta e Gran Maestro!

Bo ta kere cu Dios tawata tristo prome cu el a traha su Yiu door cu e tawata su so?— No, e no tawata tristo. Pakico anto el a traha otro cos bibo?— El a hacie pasobra e ta un Dios di amor. E tawata kier pa otronan tambe biba y gosa di bida. Nos mester gradici Dios cu el a duna nos bida.

Tur cos cu Dios a haci ta mustra cu e tin amor. Dios a traha solo. Solo ta duna nos lus y ta tene nos curpa cayente. Si nos no tawatin solo, tur cos lo tawata friu y lo no tawatin bida riba tera. Bo no ta contento cu Dios a traha solo?—

Ta Dios ta pone awa yobe tambe. Kisas tin bes bo no gusta ora awa ta yobe, pasobra e ora ei bo no por bai hunga pafo. Pero awasero ta yuda flor crece. Pesei, ora nos mira flor bunita, ken nos mester gradici pa nan?— Dios. Anto ken nos mester gradici ora nos come un fruta dushi of un berdura cu ta smak bon?— Nos mester gradici Dios, pasobra ta su solo y su awasero ta haci cos crece.

Awor, laga nos bisa cu un hende ta puntra bo: “Ta Dios a traha hende cu bestia tambe?” Kico bo ta contest’e?— Si bo bisa: “Si, ta Dios a traha hende cu bestia”, bo a contest’e bon. Pero kico ta pasa si un hende no ta kere cu ta berdad cu Dios a traha hende? Y kico awor si e bisa cu hende a bin di bestia? Wel, no ta esei Bijbel ta siña nos. Bijbel ta bisa cu ta Dios a traha tur cos cu tin bida.—Genesis 1:26-31.

Pero kisas tin hende lo bisa bo cu nan no ta kere den Dios. E ora ei, kico lo bo bisa un hende asina?— Si bo kier bo por mustr’e un cas. Puntr’e: “Ta ken a traha e cas ei?” Tur hende sa cu un hende mester a trah’e. Ta claro cu e cas no a traha su mes!—Hebreonan 3:4.

E ora ei, bai cu e hende pafo y mustr’e un flor. Puntr’e: “Ken a traha e cos aki?” No ta un hende. Y mescos cu e cas no a traha su mes, e flor tampoco no a traha su mes. Ta un persona a trah’e. Si, Dios.

Pidi e hende para un rato y scucha un parha canta. E ora ei, puntr’e: “Ken a traha e parha y siñ’e canta?” Si, Dios. Ta Dios a traha shelo, tera, y tur cos cu tin bida! E ta Esun cu ta duna bida.

Tog un hende lo por bisa bo cu e ta kere den cos cu e por mira so. Lo e por bisa bo: ‘Si mi no por mira un cos, mi no ta kere aden.’ Pesei tin hende ta bisa cu nan no ta kere den Dios, pasobra nan no por mir’e.

Ta berdad cu nos no por mira Dios. Bijbel ta bisa cu ‘niun hende no por mira Dios.’ Ningun hende riba tera no por mira Dios; ni homber, ni mohe ni mucha. Pesei ningun hende no mester purba traha un prenchi ni un imagen di Dios. Dios a asta bisa nos cu nos no tin mag di traha imagen di dje. Esei kiermen cu Dios no ta keda contento si nos tin cos asina den nos cas.—Exodo 20:4, 5; 33:20; Huan 1:18.

Pero si bo no por mira Dios, con bo por sa cu Dios ta existi di berdad? Pensa un rato. Bo por mira biento?— No. Ningun hende no por mira biento. Pero bo por mira kico biento ta haci si. Bo por mira blachi move bai bin ora biento pasa den rama di palo, y esei ta yuda bo mira cu biento ta existi.

Bo por mira cos cu Dios a traha tambe. Ora bo mira un flor bibo of un parha, bo ta mirando un cos cu Dios a traha. E cosnan ei ta mustra bo cu Dios ta existi di berdad.

Kisas un hende por puntra bo: ‘Ken a traha solo y tera?’ Bijbel ta bisa: ‘Dios a crea shelo y tera.’ (Genesis 1:1) Si, Dios a traha tur e cosnan bunita aki! Con bo ta haya e cos ei?—

Bo no ta contento cu nos ta na bida? Nos por tende parha canta bunita. Nos por mira flor y otro cos cu Dios a traha. Anto nos por come e cuminda cu Dios a duna nos.

Nos mester gradici Dios pa tur e cosnan aki. Pero e cos cu mas nos mester gradicie p’e ta cu el a duna nos bida. Si di berdad nos ta gradicido na Dios, anto tin un cos cu nos lo haci. Kico e ta?— Nos lo tende di Dios, y nos lo haci loke e ta bisa nos den Bijbel. Asina nos por mustra cu nos ta stima Esun cu a traha tur cos.