Den Ki Rumbo Bo Bida Ta Bayendo?

• Hopi hende ta asina absorba den e asuntonan di bida diario cu casi nan no ta pensa mes den ki rumbo nan bida ta bayendo.

• Bijbel ta informa nos di susesonan maraviyoso cu ta bai tuma luga. Tambe e ta spierta nos cu institucionnan humano lo bai experencia un cambio drastico rond mundo. Pa nos beneficia di loke Bijbel ta bisa y pa evita calamidad, ta urgente pa nos actua dicidido.

• Tin hende cu sa kico Bijbel ta bisa y cu ta purba aplic’e, pero nan ta laga precupacionnan di bida desvia nan.

• Abo ta contento cu e rumbo cu bo bida ta tumando? Ora bo ta plania pa haci cos, bo ta considera ki efecto nan lo por tin riba bo metanan di largo plaso den bida?

[Cuadro/Plachi na pagina 9]

Kico Ta Mas Importante pa Bo?

Con lo bo evalua lo siguiente? Numera nan a base di prioridad.

Hopi di e cosnan aki tin nan debido luga den bida, pero ora bo tin cu scohe, kico ta bini na prome luga? na di dos? etcetera.

․․․ Dibirticion/recreo

․․․ Mi trabou of mi profesion

․․․ Mi salu

․․․ Felicidad personal

․․․ Mi casa

․․․ Mi mayornan

․․․ Un cas bunita, bon paña

․․․ Ser esun mas miho den tur loke mi ta haci

․․․ Adoracion di Dios

[Cuadro na pagina 10]

Bo Desisionnan Ta Hibando Bo Caminda Realmente Bo Kier Bai?

PENSA RIBA E PREGUNTANAN AKI

DIBIRTICION/RECREO: Loke mi ta scohe como recreo ta refresca mi? E ta encera actividadnan excitante cu por pone mi salu na peliger of asta haci mi mancaron pa resto di mi bida? E ta un forma di “dibirti” cu podise ta duna mi un par di ora di excitacion pero cu por causa dolor di curason permanente? Asta si e dibirticion cu mi ta scohe ta sano, mi ta dedicando asina tanto tempo na dje cu no ta keda tempo pa cosnan mas importante?

MI TRABOU OF MI PROFESION: E ta sirbi como un medio pa mantene mi, of en realidad mi ta su catibo? E ta exigi asina tanto di mi cu e ta daña mi salu? Mi ta prefera di traha overtime of lo mi prefera di pasa tempo cu mi casa of cu mi yiunan? Si mi doño di trabou ta exigi pa mi haci cos cu ta molestia mi consenshi of cu ta pone cu hopi bes mi no ta resta tempo pa actividadnan spiritual, lo mi hacie toch pa mi no perde mi trabou?

MI SALU: Mi no ta precupa cu ne, of mi ta tene cuidou pa mi no dañ’e? Ta tocante mi salu so mi ta papia? E manera cu mi ta trata mi salu ta demostra cu mi famia ta importante pa mi?

FELICIDAD PERSONAL: Esaki ta e prome cos cu mi ta tene cuenta cu ne? Mi ta pon’e prome cu e felicidad di mi casa of di mi famia? E manera cu mi ta busc’e ta cuadra cu e echo cu mi ta adora e Dios berdadero?

MI CASA: Mi ta considera mi casa como mi compañero of compañera intimo solamente ora ta cumbini mi? Mi ta trata mi casa cu honor, como un persona cu tin derecho di tin su dignidad? Mi creencia den Dios ta influencia e manera cu mi ta considera mi casa?

MI MAYORNAN: Si ainda mi ta menor di edad, mi ta obediente na mi mayornan? Por ehempel, mi ta contesta nan cu respet, ta haci e tareanan cu nan ta duna mi, ta yega cas na e ora cu nan ta bisa mi, ta evita e amistadnan y actividadnan cu nan ta spierta mi p’e? Si mi ta adulto, mi ta scucha mi mayornan cu respet, y ta duna nan e yudansa apropiado ora esaki ta necesario? Ta loke ta cumbini mi ta determina e manera cu mi ta trata cu nan of ta e conseho di e Palabra di Dios ta determina esei?

MI YIUNAN: Mi ta sinti mi responsabel pa siña mi yiunan e debido norma- y balornan moral, of mi ta spera cu ta scol tin cu haci esei? Mi ta pasa tempo cu mi yiunan, of mi ta spera pa co’i hunga, television of computer tene nan ocupa? Mi ta disiplina mi yiunan tur biaha cu nan ignora e recordatorionan di Dios, of mi ta hacie principalmente ora mi ta rabia?

UN CAS BUNITA, BON PAÑA: Kico ta determina cuanto atencion mi ta duna na mi aparencia y pertenencianan? Ta e impresion cu mi ta spera di haci riba mi biciñanan? e bienestar di mi famia? of e echo cu mi ta un sirbido di Dios?

SER ESUN MAS MIHO DEN TUR LOKE MI TA HACI: Mi ta sinti cu ta importante pa haci cos na un manera bon? Mi ta haci esfuerso pa ta esun mas miho? E ta molestia mi ora un otro hende haci un cos miho cu mi?

ADORACION DI DIOS: E aprobacion di Dios ta mas importante pa mi cu e aprobacion di mi casa, mi yiunan, mi mayornan of mi doño di trabou? Lo mi ta dispuesto pa pusha mi sirbishi na Dios na di dos luga, afin di mantene un estilo di bida comodo?

CONSIDERA E CONSEHO DI BIJBEL CU SUMO ATENCION

Ki luga Dios ta ocupa den bo bida?

Eclesiastes 12:13: “Teme Dios y warda su mandamentonan, pasobra esaki ta aplicabel na cada persona” [of, “ta henter e obligacion di hende”, NW].

PUNTRA BO MES: Mi bida ta demostra cu mi ta pensa asina? Obediencia na Dios su mandamentonan ta determina con mi ta atende mi responsabilidadnan na cas, na trabou of na scol? Of ta otro interesnan of e presionnan di bida ta loke ta determina si mi ta aparta tempo pa Dios?

Ki clase di relacion bo tin cu Dios?

Proverbionan 3:5, 6: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”

Mateo 4:10: “Adora SEÑOR bo Dios, y sirbi e so.”

PUNTRA BO MES: Ta asina mi ta sinti pa cu Dios? Mi actividadnan diario, y tambe e manera cu mi ta trata situacionnan dificil, ta demostra tal confiansa y debocion?

Con importante lesamento y studiamento di Bijbel ta pa bo?

Huan 17:3: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”

PUNTRA BO MES: E importancia cu mi ta duna na lesa e Palabra di Dios y medita riba dje ta demostra cu di berdad mi ta kere loke e texto ei ta bisa?

Con importante ta pa bo pa asisti na reunionnan di e congregacion cristian?

Hebreonan 10:24, 25: “Laga nos considera con pa stimula otro pa stima y haci bon obra, y no laga di asisti na nos mes reunionnan, . . . y mucho mas ainda, ora boso ta mira cu e dia ta yegando serca.”

Salmo 122:1: “Mi tawata contento ora nan a bisa mi: ‘Laga nos bai na e cas di SEÑOR.’”

PUNTRA BO MES: E manera cu mi ta biba ta demostra aprecio pa e instruccion aki cu tin den e Palabra di Dios? Durante e luna cu a pasa, tin reunion cristian cu mi a falta pasobra mi a pone otro cos prome cu nan?

Bo ta participa cu celo den e actividad di papia cu otro hende tocante Dios y su proposito?

Mateo 24:14: “E evangelio aki di e reino lo wordo predica den henter mundo como un testimonio . . . , y e ora ei e fin lo yega.”

Mateo 28:19, 20: “Bai y haci tur e nacionnan disipel di mi, . . . y siña nan pa cumpli cu tur loke mi a ordena boso.”

Salmo 96:2, 3: “Canta na SEÑOR, bendiciona su nomber; proclama e bon nobo di su salbacion dia tras dia.”

PUNTRA BO MES: E actividad aki di berdad tin e luga cu e merece den mi bida? Mi esfuerso pa participa den dje ta demostra cu mi ta combenci di e seriedad di e tempo den cua nos ta biba?