‘E Ora Di Huicio’ A Yega

REVELACION, e ultimo buki di Bijbel, ta informa nos di e echo cu tin un angel bulando meimei di shelo cu bon noticia of “evangelio eterno pa predica.” E angel ta bisa na bos halto: “Teme Dios y dun’e gloria, pasobra e ora di su huicio a yega.” (Revelacion 14:6, 7) E ‘ora di huicio’ ei ta encera tanto e proclamacion como e ehecucion di Dios su huicio. Un “ora” ta un periodo di tempo relativamente cortico. E ta bini como culminacion di “e ultimo dianan.” Nos ta biba den e tempo ei awor.—2 Timoteo 3:1.

Yegada di ‘e ora di huicio’ ta bon noticia pa amantenan di husticia. Lo e ta un tempo ora cu Dios lo trece alivio pa su sirbidonan cu ta sufri na man di e mundo violento y sin amor aki.

Aworaki—prome cu ‘e ora di huicio’ termina den destruccion di e actual sistema di cosnan malbado—Bijbel ta urgi nos pa “teme Dios y dun’e gloria.” Abo ta haciendo esei? Esaki ta nifica hopi mas cu djis bisa: “Mi ta kere den Dios.” (Mateo 7:21-23; Santiago 2:19, 20) E debido temor di Dios mester pone nos demostra un respet profundo p’e. E mester pone nos kita for di maldad. (Proverbionan 8:13) Tambe e mester yuda nos stima loke ta bon y odia loke ta malo. (Amos 5:14, 15) Si nos ta honra Dios, nos lo scuch’e cu gran respet. Nos lo no ta asina ocupa cu otro cos cu nos no tin tempo pa lesa su Palabra, Bijbel, cu regularidad. Nos lo confi’e tur momento y cu henter nos curason. (Salmo 62:8; Proverbionan 3:5, 6) Hende cu realmente ta honr’e ta reconoce cu como Creador di shelo y tera, e ta e Soberano Universal, y cu amor nan ta somete nan mes na dje como Esun cu tin derecho di goberna riba nan. Si nos realisa cu nos lo tin cu presta mas atencion na e cosnan aki, laga nos haci esei sin tarda.

E tempo di ehecuta huicio cu e angel a papia di dje ta conoci tambe como ‘e dia di Yehova.’ Un “dia” similar a bini riba Herusalem di antiguedad na aña 607 prome cu nos era pasobra su habitantenan no a haci caso di e spiertamentonan di Yehova mediante su profetanan. Door di pensa den nan mes cu Yehova su dia no tawata serca, nan a pone nan bida den mas peliger. Yehova a spierta nan: “E ta serca y e ta bin masha lihe mes.” (Sofonias 1:14) Un otro ‘dia di Yehova’ a bini riba Babilonia di antiguedad na aña 539 prome cu nos era. (Isaias 13:1, 6) E habitantenan di Babilonia tawatin confiansa den nan fortificacionnan y den nan diosnan, y pesei nan a ignora e spiertamentonan cu e profetanan di Yehova a duna. Pero den un solo anochi, e Medo- y Personan a conkista e gran Babilonia.

Kico nos ta confronta awe? Un otro ‘dia di Yehova’ pero di alcanse hopi mas largo. (2 Pedro 3:11-14) Dios a declara su huicio contra ‘Babilonia e Grandi.’ Segun Revelacion 14:8, un angel ta declara: “El a cai! Ata e gran Babilonia a cai.” Esei a tuma luga caba. Babilonia no por frena adoradonan di Yehova mas. Su corupcion y envolvimento den guera a wordo saca na cla tur caminda. Awor su destruccion final ta serca. Pa e motibo ei Bijbel ta urgi hende na tur parti: “Sali for di dje [Babilonia e Grandi] . . . pa bo no participa den su picanan y pa bo no ricibi di su plaganan; pasobra su picanan a montona yega te na shelo, y Dios a corda su inikidadnan.”—Revelacion 18:4, 5.

Kico ta Babilonia e Grandi? Esei ta e sistema mundial di religion cu tin e caracteristicanan di Babilonia di antiguedad. (Revelacion, capitulo 17, 18) Considera algun similaridad:

• E sacerdotenan di Babilonia di antiguedad tawata profundamente meti den e nacion su asuntonan politico. Esei ta e caso tambe di mayoria religion djawe.

• E sacerdotenan di Babilonia hopi bes a fomenta e gueranan di e nacion. Religion di tempo moderno hopi bes a hiba delantera den bendiciona solda ora cu e nacionnan tawata bai guera.

• E doctrina- y practicanan di Babilonia di antiguedad a hiba e nacion na inmoralidad hopi baho. Awendia, ora cu lidernan religioso a pusha Bijbel su norma di moralidad un banda, inmoralidad ta reina tanto den e gremio di clero como di laico. Ta bon pa tuma nota cu debi na e echo cu Babilonia e Grandi ta prostitui su mes cu e mundo y su sistemanan politico, Revelacion ta pint’e manera un mohe di mala bida.

• Tambe Bijbel ta bisa cu Babilonia e Grandi ta biba “den luho.” Den Babilonia di antiguedad, e organisacion di e tempel a obtene cantidad grandi di tereno, y e sacerdotenan a bira prominente den actividadnan comercial. Awe, fuera di luganan di adoracion, Babilonia e Grandi ta doño di masha hopi negoshi y propiedad. Su siñansanan y su dianan di fiesta ta trece hopi rikesa p’e y pa otronan den e mundo comercial.

• Uzo di imagen, magia y bruheria tawata comun den Babilonia di antiguedad, mescos cu ta e caso awe den hopi luga. Nan a considera morto como un pasashi pa un otro bida. Babilonia tawata yen di tempel y kapel na honor di su diosnan, pero e habitantenan tawata opone adoradonan di Yehova. E mesun creencianan y practicanan ta identifica Babilonia e Grandi.

Den tempo di antiguedad, Yehova a uza nacionnan politico y militar poderoso pa castiga esnan cu persistentemente a desprecia Yehova y su boluntad. Ta pesei e Asirionan a destrui Samaria na aña 740 prome cu nos era. Babilonia a destrosa Herusalem na aña 607 prome cu nos era y despues e Romanonan a bolbe destru’e na aña 70 di nos era. E Medo- y Personan na nan turno, a conkista Babilonia na aña 539 prome cu nos era. Pa nos tempo, Bijbel ta predeci cu gobiernonan politico, mescos cu un bestia salbahe, lo ataca “e prostituta” y kit’e sunu, sacando na cla ken e ta realmente. Nan lo destru’e completamente.—Revelacion 17:16.

E gobiernonan mundial di berdad lo haci un cos asina? Bijbel ta declara cu ‘Dios lo pone esei den nan curason.’ (Revelacion 17:17) Esei lo ta un cos repentino, sorprendente, spantoso, no un cos gradual of cu hende lo mira ta bini.

Ki accion abo tin cu tuma? Puntra bo mes: ‘Ainda mi ta pega na un organisacion religioso cu ta mancha cu doctrina- y practicanan cu ta identific’e como parti di Babilonia e Grandi?’ Asta si bo no ta un miembro, lo bo por puntra bo mes: ‘Mi a permiti e actitud di Babilonia e Grandi influencia mi?’ Ki clase di actitud? Un actitud di tolera inmoralidad, di amor pa cosnan material y placer mas cu amor pa Dios, of di ignora e Palabra di Yehova deliberadamente (asta den cosnan cu ta parce chikito). Pensa bon prome cu bo contesta.

Pa nos tin e aprobacion di Yehova, ta masha importante pa tanto den nos accionnan como den e deseonan di nos curason, nos duna prueba cu realmente nos no ta parti di Babilonia e Grandi. No tin tempo pa perde. Bijbel ta spierta nos cu e fin lo bin diripiente, y ta bisa: “Babilonia, e gran stad, lo wordo tira abou cu violencia [of, “cu un lansamento rapido”, NW], y lo no wordo haya nunca mas.”—Revelacion 18:21.

Pero mas cos lo sosode. Den un otro rasgo di e ‘ora di huicio’ ei, Yehova Dios lo pidi cuenta di e sistema politico mundial, su gobernantenan, y tur cu ta ignora su gobernacion legitimo mediante su Reino celestial den man di Hesucristo. (Revelacion 13:1, 2; 19:19-21) E vision profetico cu ta para skirbi na Daniel 2:20-45 ta presenta gobernacion politico for di tempo di Babilonia di antiguedad te cu awor, como un imagen gigantesco cu ta consisti di oro, plata, brons, hero y klei. Relaciona cu nos tempo, e profecia a bisa: “E Dios di shelo lo lanta un reino cu nunca lo no wordo destrui.” Y encuanto loke e Reino ei lo haci ainda durante Yehova su ‘ora di huicio’, Bijbel ta declara: “E lo garna y pone un fin na tur e reinonan aki [traha door di hende], ma e mes lo dura pa semper.”—Daniel 2:44.

Bijbel ta spierta adoradonan berdadero pa no stima “e cosnan cu tin den mundo”, esta, e estilo di bida cu e mundo aki aleha for di e Dios berdadero ta promove. (1 Huan 2:15-17) Bo decisionnan y accionnan ta demostra cu bo ta completamente na fabor di e Reino di Dios? Di berdad bo ta pon’e na prome luga den bo bida?—Mateo 6:33; Huan 17:16, 17.

[Cuadro na pagina 14]

Ki Dia e Fin Ta Bin?

“E Yiu di hende lo bin na un ora cu boso no ta pensa.”—Mateo 24:44.

“Sea alerta . . . pasobra boso no sa e dia ni e ora cu e Yiu di hende ta bin.”—Mateo 25:13.

“E lo no tarda.”—Habacuk 2:3.

[Cuadro na pagina 14]

Lo A Haci un Diferencia si Bo Tawata Sa?

Si bo tawata sa sigur cu lo dura un par di aña mas prome cu e benidero ehecucion di huicio dibino bin, esei lo a cambia e manera cu bo ta hiba bo bida? Si e fin di e sistema bieu aki ya a tarda mas di loke bo a spera, bo a laga esei influencia bo pa ta menos activo den Yehova su sirbishi?—Hebreonan 10:36-38.

E echo cu nos no sa e tempo exacto ta duna nos oportunidad di demostra cu nos ta sirbi Dios cu motibonan puro. Hende cu conoce Yehova ta realisa cu manifestacion di celo na ultimo ora—net prome cu e fin—lo no impresiona Dios, kende ta wak loke tin den nos curason.—Yeremias 17:10; Hebreonan 4:13.

Pa hende cu realmente ta stima Yehova, semper Yehova ta bin na prome luga. Mescos cu otro hende, cristiannan berdadero kisas tin un trabou. Sinembargo, nan meta no ta pa bira rico sino pa nan tin suficiente cuminda y paña y un tiki extra pa comparti cu otro hende. (Efesionan 4:28; 1 Timoteo 6:7-12) Tambe nan ta disfruta di recreo sano y de bes en cuando un cambio den nan rutina, pero nan deseo ta pa esei refresca nan, y no djis pa haci loke tur hende ta haci. (Marco 6:31; Romanonan 12:2) Mescos cu Hesucristo, nan tin deleite den haci e boluntad di Dios.—Salmo 37:4; 40:8.

Cristiannan berdadero kier biba y sirbi Yehova pa semper. E speransa ei no ta bira menos precioso pasobra nan tin cu warda un tiki mas largo di loke algun di nan a spera pa haya cierto bendicionnan.

[Cuadro/Plachi na pagina 15]

E Cuestion di Soberania

Pa compronde dicon Dios ta permiti asina tanto sufrimento, nos tin cu compronde e cuestion di soberania. Kico ta soberania? Esei ta e posicion di autoridad supremo.

Como cu Yehova ta e Creador, e tin e derecho di goberna tera y tur cos cu ta biba riba dje. Sinembargo, Bijbel ta splica cu na principio di historia humano, Satanas e Diabel a cuestiona Yehova su soberania. Satanas a pretende cu Yehova a pone demasiado restriccion, cu El a gaña nos prome mayornan tocante kico lo pasa si nan ignora Dios su lei y haci cos na nan manera, y cu en realidad lo tawata miho si nan a goberna nan mes sin Dios.—Genesis, capitulo 2, 3.

Si Dios a destrui e rebeldenan mesora, esei lo a demostra Dios su poder, pero esei lo no a resolve e cuestionnan cu a lanta. En bes di destrui e rebeldenan al instante, Yehova a permiti tur creacion inteligente mira e resultado di rebelion. Apesar cu esaki a encera sufrimento, na mesun tempo el a duna nos un chens di nace.

Ademas, Yehova a haci un sacrificio grandi pa amorosamente e percura pa hende cu obedec’e y eherce fe den e sacrificio di rescate di su Yiu, lo por ser libra di pica y su consecuencianan y biba den Paradijs. Si ta necesario, esaki lo por ta mediante un resureccion for di morto.

Door cu Dios a permiti tempo pa resolve e cuestion, su sirbidonan a haya tambe chens di demostra cu nan por reacciona faborabel riba Dios su amor y duna prueba di nan integridad na Yehova bou di tur circunstancia. Ta masha importante pa resolve e cuestion di Dios su soberania—hunto cu e cuestion liga cu ne di integridad humano—pa por tin e debido respet pa lei den universo. Sin e respet ei, berdadero pas nunca lo ta posibel.a

[Nota]

[Plachi na pagina 15]

E sistema mundial di gobernacion politico lo yega na su fin