Un Mundo Nobo Segun Dios Su Promesa

BIJBEL, Dios su Palabra skirbi, ta duna nos speransa ora e ta bisa: “Segun su promesa nos ta sperando shelonan nobo y un tera nobo, den cual ta biba husticia.”—2 Pedro 3:13.

Kico e “shelonan nobo” ta? Bijbel ta relaciona shelo cu gobernacion. (Echonan 7:49) E “shelonan nobo” ta un gobierno nobo cu lo goberna e tera. Lo e ta nobo pasobra lo e remplasa e actual sistema di gobernacion; tambe e ta un desaroyo nobo den e cumplimento di Dios su proposito. Esei ta e Reino cu Hesus a siña nos pidi p’e den oracion. (Mateo 6:10) Siendo cu ta Dios ta Fuente di e Reino ei, y Dios ta biba den shelo, Bijbel ta yam’e “e reino di shelo.”—Mateo 7:21.

Kico e “tera nobo” ta? E no ta un planeta nobo, ya cu Bijbel ta declara bon cla cu tera lo ta habita pa semper. E “tera nobo” ta un sosiedad humano nobo. Lo e ta nobo pasobra e malbadonan lo wordo corta kita for di tera. (Proverbionan 2:21, 22) Tur hende cu lo ta na bida e tempo ei lo honra y obedece e Creador y lo biba na harmonia cu su rekisitonan. (Salmo 22:27) Hende di tur nacion ta hayando e invitacion pa siña kico ta e rekisitonan ei y biba na harmonia cu nan awor. Abo ta haciendo esei?

Den Dios su mundo nobo, tur hende lo respeta Su gobernacion. Amor pa Dios ta motiva bo pa obedece su mandamentonan? (1 Huan 5:3) Bo obediencia ta bisto den bo cas? na trabou of na scol? y den e manera cu bo ta hiba bo bida?

Den e mundo nobo ei, hende lo ta uni den adoracion di e Dios berdadero. Abo ta adora e Creador di shelo y tera? Bo adoracion realmente ta uni bo cu compañeronan di adoracion di tur nacion, tur rasa y tur idioma?—Salmo 86:9, 10; Isaias 2:2-4; Sofonias 3:9.

[Cuadro na pagina 17]

E Dios Cu Ta Priminti e Cosnan Aki

E ta e Creador di shelo fisico y di planeta Tera. E ta esun cu Hesucristo a identifica como “e unico Dios berdadero.”—Huan 17:3.

Mayor parti di humanidad ta honra diosnan cu nan mes a inventa. Miyones di hende ta buig dilanti di imagennan sin bida. Otronan ta glorifica institucionnan humano, filosofianan basa riba norma- y balornan material of nan propio deseonan. Asta entre esnan cu ta declara cu nan ta uza Bijbel, no ta tur ta honra e nomber di esun cu Bijbel ta identifica como “e Dios berdadero.”—Deuteronomio 4:35, NW.

E Creador a bisa tocante su mes: “Ami ta Yehova. Esei ta mi nomber.” (Isaias 42:5, 8, NW) E nomber aki ta aparece un 7.000 biaha den Bijbel su idiomanan original. Hesucristo a siña su siguidonan resa: “Nos Tata cu ta den shelo, bo nomber sea santifica.”—Mateo 6:9.

Ki clase di persona e Dios berdadero ta? E ta describi su mes como un persona “yen di compasion y gracia, kende no ta rabia lihe y kende ta abunda den misericordia y berdad”, y como un persona cu sigur no ta laga di castiga esnan cu deliberadamente ta viola su mandamentonan. (Exodo 34:6, 7) E historia di su trato cu humanidad ta confirma cu e descripcion ei ta berdad.

Tanto e nomber como e persona cu e nomber ei ta representa tin cu ser santifica, es decir, trata como santo. Como Creador y Soberano Universal, nos mester obedec’e y ador’e exclusivamente. E tin derecho riba esei. Abo personalmente ta dun’e e cosnan aki?

[Cuadro/Plachi na pagina 18]

Ki Cambionan “Shelonan Nobo y un Tera Nobo” Lo Trece?

Planeta Tera transforma den Paradijs Lucas 23:43

Trabou cu ta duna satisfaccion, abundancia di cuminda Isaias 25:6; 65:17, 21-23

[Cuadro/Plachi na pagina 19]

Lo Bo Beneficia?

Dios no por gaña!—Tito 1:2.

Yehova ta declara: “Mi palabra . . . lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:11.

Ya caba Yehova ta creando “shelonan nobo y un tera nobo.” E gobierno celestial ta funciona caba. E fundeshi di e “tera nobo” ta poni caba.

Despues di revela algun di e cosnan maraviyoso cu “un shelo nobo y un tera nobo” lo trece pa humanidad, Revelacion ta cita Dios mes, e Soberano di universo, bisando: “Mira, mi ta haci tur cos nobo.” Tambe e ta bisa: “Skirbi, pasobra e palabranan aki ta fiel y berdadero.”—Revelacion 21:1, 5.

E pregunta crucial ta: Nos ta haciendo e cambionan necesario afin di por ser considera digno di forma parti di e “tera nobo” ei bou di e “shelonan nobo”?