“Riba Tur Cos, Keda Ferviente Den Boso Amor Pa Otro”

“Fin di tur cos ta serca. . . . Riba tur cos, keda ferviente den boso amor pa otro.”—1 PEDRO 4:7, 8.

HESUS tawata sa cu su ultimo oranan hunto cu su apostelnan tawata precioso. E tawata sa kico ta spera nan. Nan tawatin un trabou grandi pa haci, pero hende lo a odia nan y persigui nan, mescos cu nan a haci cu Hesus. (Huan 15:18-20) Mas cu un biaha durante e ultimo anochi ei cu nan tawata hunto, el a recorda nan cu nan mester “stima otro.”—Huan 13:34, 35; 15:12, 13, 17.

² Apostel Pedro, kende tawata presente e anochi ei, a compronde e importancia di Hesus su recordatorio. Añanan despues, den un carta cu Pedro a skirbi un poco prome cu e destruccion di Herusalem, el a enfatisa e importancia di amor. El a conseha cristiannan: “Fin di tur cos ta serca. . . . Riba tur cos, keda ferviente den boso amor pa otro.” (1 Pedro 4:7, 8) Pedro su palabranan ta hopi importante pa hende cu ta biba durante “e ultimo dianan” di e sistema di cosnan actual. (2 Timoteo 3:1) Kico ta nifica ser “ferviente den boso amor”? Dicon ta importante pa nos tin tal amor pa otro hende? Y con nos por demostra cu nos tin e?

Kico Ta Nifica ‘Ser Ferviente den Amor’?

³ Hopi hende ta pensa cu amor ta un sintimento cu ta bin di mes. Pero Pedro no tawata papia simplemente tocante cualkier tipo di amor; e tawata papia di e forma di mas noble di amor. E palabra “amor” na 1 Pedro 4:8 ta un traduccion di e palabra Griego a·gá·pe. E palabra ei ta referi na amor sin egoismo cu ta ser guia, of dirigi, door di principio. Segun un buki di referencia, Bijbel por ordena un persona pa e tin e tipo di amor aki pasobra amor agape no ta principalmente un emocion sino ta un determinacion personal cu ta pon’e actua na un cierto manera. Como cu nos a hereda e inclinacion pa ta egoista, nos tin mester di recordatorio pa mustra amor na otro, y pa hacie den maneranan cu ta basa riba e principionan di Dios.—Genesis 8:21; Romanonan 5:12.

⁴ Esaki no kiermen cu nos tin cu stima otro simplemente pasobra e ta nos deber. A·gá·pe no ta un amor sin calor humano y sintimento. Pedro a bisa cu nos mester keda ‘ferviente den nos amor pa otro’ (literalmente, “tene pa otro un amor cu ta extende of rek”, Kingdom Interliniar).a Sinembargo, tal amor ta rekeri esfuerso. Relaciona cu e palabra Griego traduci “ferviente”, un erudito a bisa: “E ta transmiti e imagen di un atleta cu na final di un careda ta extende of rek su musculonan plenamente p’e saca su ultimo gota di forsa cu a rest’e.”

⁵ Pues, nos amor no mester ta limita na haci solamente loke ta facil ni limita na un grupito. Amor cristian ta rekeri pa nos “extende” of rek nos curason, demostrando amor asta ora esei kisas ta dificil pa haci. (2 Corintionan 6:11-13) Claro cu e tipo di amor aki ta algo cu nos tin cu cultiva y traha ariba, mescos cu un atleta tin cu train y traha pa mehora su habilidadnan. Ta di sumo importancia pa nos tin tal amor pa otro. Dicon? Tin por lo menos tres motibo.

Dicon Nos Mester Stima Otro?

⁶ Na prome luga, “pasobra amor ta bin di Dios.” (1 Huan 4:7) Yehova, e Fuente di e cualidad atractivo aki, a stima nos prome. Apostel Huan a bisa: “Pa medio di esaki e amor di Dios a wordo manifesta den nos, cu Dios a manda su Yiu unigenito den mundo pa nos por a biba pa medio di dje.” (1 Huan 4:9) Dios su Yiu a ser ‘manda’ door di bira un criatura humano, cumpli cu su sirbishi y muri na un staca di tormento; tur esei pa asina nos por haya bida. Con nos mester reacciona riba e expresion supremo aki di Dios su amor? Huan a bisa: “Si Dios a stima nos asina tanto, nos tambe mester stima otro.” (1 Huan 4:11) Tuma nota cu Huan a skirbi: “Si Dios a stima nos asina tanto”, no simplemente abo sino nos. E punto ta bon cla: Si Dios ta stima nos compañeronan den fe, anto nos tambe mester stima nan.

⁷ Na di dos luga, awor ta specialmente importante pa nos stima otro mas tanto, ya asina nos por yuda nos rumannan den necesidad pasobra “fin di tur cos ta serca.” (1 Pedro 4:7) Nos ta bibando den “temponan trabahoso.” (2 Timoteo 3:1) Condicionnan mundial, desasternan natural y oposicion ta trece hopi sufrimento riba nos. Bou di circunstancianan dificil, nos tin cu hala mas y mas serca otro. Amor ferviente lo uni nos mas tanto y motiva nos pa ‘percura pa otro.’—1 Corintionan 12:25, 26.

⁸ Na di tres luga, nos tin cu stima otro pasobra nos no kier “duna Diabel oportunidad” pa e probecha di nos. (Efesionan 4:27) Satanas ta cla pa uza e imperfeccionnan di nos compañeronan den fe—nan debilidadnan, faltanan y erornan—como piedra di trompica. Nos lo laga un comentario papia sin pensa of un acto no mucho amabel pone nos aleha for di e congregacion? (Proverbionan 12:18) No si nos ta ferviente den nos amor pa otro! E amor ei ta yuda nos mantene pas y sirbi Dios unidamente “den un acuerdo.”—Sofonias 3:9.

Con pa Demostra Cu Bo Ta Stima Otro

⁹ Mustramento di amor tin cu cuminsa na cas. Hesus a bisa cu hende lo identifica su berdadero siguidonan na e amor cu nan tin pa otro. (Huan 13:34, 35) Amor mester ta bisto no solamente den e congregacion sino tambe den famia: entre esnan casa y entre mayornan y yiunan. No ta basta pa sinti amor pa miembronan di famia; nos tin cu expres’e den maneranan positivo.

¹⁰ Con esnan casa por demostra amor pa otro? Tuma e esposo. Na loke e ta bisa y haci—tanto den publico como den priva—un esposo cu di berdad ta stima su casa ta laga su esposa sa cu e ta apreci’e. E esposo ta respeta su casa su dignidad personal y ta tene consideracion cu e esposa su pensamento, su punto di bista y sintimento. (1 Pedro 3:7) E esposo ta pone bienestar di su esposa prome cu di su mes, y ta haci tur loke e por pa percura pa e esposa su necesidadnan material, spiritual y emocional. (Efesionan 5:25, 28) Anto e esposa cu realmente ta stima su casa ta respet’e, maske tin biaha e esposo no ta cumpli cu e esposa su expectativanan. (Efesionan 5:22, 33) E esposa ta apoya su esposo y ta sumiso na dje, y no ta bin cu exigencianan irasonabel, sino mas bien ta coopera cu su esposo pa sigui consentra riba asuntonan spiritual.—Genesis 2:18; Mateo 6:33.

¹¹ Mayornan, con boso por mustra amor pa boso yiunan? Un evidencia di boso amor ta e echo cu boso ta dispuesto pa traha duro pa percura materialmente pa nan. (1 Timoteo 5:8) Pero yiu tin mester di mas cu cuminda, paña y un dak riba nan cabes. Pa nan por lanta cu amor pa e Dios berdadero y sirbie, nan tin mester di educacion spiritual. (Proverbionan 22:6) Esei ta nifica traha tempo como famia pa studia Bijbel, pa participa den sirbishi di veld y pa asisti na reunionnan cristian. (Deuteronomio 6:4-7) Pa boso ta consistente den e actividadnan ei ta exigi basta sacrificio, specialmente den e tempo trabahoso aki. Boso interes y boso esfuerso pa percura pa e necesidadnan spiritual di boso yiunan ta un expresion di amor, pasobra asina boso ta demostra cu boso tin nan bienestar eterno na pecho.—Huan 17:3.

¹² Ta masha importante pa mayornan demostra amor tambe door di percura pa e necesidadnan emocional di nan yiunan. Mucha ta vulnerable; boso mester sigura nan curason tierno bes tras bes di boso amor. Bisa nan cu boso stima nan, y duna nan hopi cariño, pasobra tal expresionnan ta sigura nan cu nan ta digno di ricibi amor y cu nan tin balor. Elogia nan na un manera sinsero y caloroso, pasobra esei ta laga nan sa cu boso ta mira nan esfuerso y ta balora esei. Disiplina nan cu amor, pasobra e tipo di coreccion ei ta mustra nan cu boso ta interesa den ki clase di persona nan ta birando. (Efesionan 6:4) Tur e tipo di expresionnan sano ei di amor ta yuda forma un famia felis y hopi uni, un famia cu lo ta miho prepara pa resisti e presionnan di e ultimo dianan aki.

¹³ Amor ta motiva nos pa pasa por halto di e faltanan di otro hende. Corda cu ora Pedro a conseha su lectornan pa “keda ferviente den [nan] amor pa otro”, el a duna e motibo dicon esaki tawata asina importante: “Pasobra amor ta cubri un multitud di pica.” (1 Pedro 4:8) “Cubri” pica no kiermen sconde picanan serio. Ta na su luga pa raporta picanan serio na esnan den puesto di responsabilidad den e congregacion y laga nan atende esei. (Levitico 5:1; Proverbionan 29:24, NW) Lo ta un falta grandi di amor—y contrario na principio biblico—pa permiti personanan cu ta comete picanan grave sigui haci daño na esnan inocente of gaña nan.—1 Corintionan 5:9-13.

¹⁴ Den mayoria caso, e erornan y faltanan di compañeronan den fe ta cosnan chikito. Nos tur tin biaha ta trompica den loke nos ta bisa of haci, y ta decepciona of asta ofende otro. (Santiago 3:2) Nos mester ta lihe pa laga tur hende sa di otronan su faltanan? Tal proceder solamente lo yuda crea friccion den e congregacion. (Efesionan 4:1-3) Si nos ta ser dirigi pa amor, nos lo no “divulga un falta” di un compañero den fe. (Salmo 50:20, NW) Mescos cu hende ta pleister un muraya y ferf e pa cubri su imperfeccionnan, asina amor ta cubri e imperfeccionnan di otro hende.—Proverbionan 17:9.

¹⁵ Amor lo motiva nos pa yuda esnan cu ta den berdadero necesidad. Segun cu e situacion den e ultimo dianan ta bira mas malo, lo por tin biaha cu nos compañeronan den fe tin mester di yudansa material of fisico. (1 Huan 3:17, 18) Por ehempel, tin un miembro di nos congregacion cu a hay’e den problema economico serio of cu a perde trabou? Anto podise nos por ofrec’e un poco yudansa material, segun nos circunstancia ta permiti. (Proverbionan 3:27, 28; Santiago 2:14-17) Tin cos di drecha na cas di un biuda di edad avansa? Anto podise nos por tuma e iniciativa apropiado pa yuda cu e trabou.—Santiago 1:27.

¹⁶ Nos mustramento di amor na otro hende no ta limita na esnan cu kisas ta biba den nos bicindario. Tin biaha nos por tende di informenan tocante sirbidonan di Dios den otro pais cu a bira victima di tormenta severo, temblor of disturbionan civil. Kisas urgentemente nan tin mester di cuminda, paña y otro articulonan. No ta importa si nan ta di un otro rasa of grupo etnico. Nos “stima henter e asociacion di rumannan.” (1 Pedro 2:17, NW) Pues anto, mescos cu e congregacionnan di prome siglo, nos ta ansioso pa sostene trabounan di ausilio cu keda organisa pa duna un man. (Echonan 11:27-30; Romanonan 15:26) Ora nos ta mustra amor den tur e maneranan ei, nos ta haci e laso cu ta uni nos den e ultimo dianan aki mas fuerte.—Colosensenan 3:14.

¹⁷ Amor ta motiva nos pa comparti e bon nobo di e Reino di Dios cu otro hende. Considera e ehempel di Hesus. Dicon el a predica y siña hende? “El a sinti compasion” pa e multitudnan debi na e condicion spiritual lamentabel cu nan tawata aden. (Marco 6:34) Nan a ser neglisha y engaña door di wardadonan religioso falso cu eigenlijk lo mester a siña nan berdadnan spiritual y duna nan speransa. Pesei, motiva pa amor profundo y sinsero y tambe compasion, Hesus a consola e hendenan cu e evangelio of ‘bon nobo di e reino di Dios.’—Lucas 4:16-21, 43.

¹⁸ Awe tambe tin hopi hende cu spiritualmente a ser neglisha y engaña y cu ta sin speransa. Si nos, mescos cu Hesus, ta conciente y pendiente di e necesidadnan spiritual di e hendenan cu ainda no conoce e Dios berdadero, e ora ei amor y compasion lo motiva nos pa comparti e bon nobo di e Reino di Dios cu nan. (Mateo 6:9, 10; 24:14) En bista di e tempo cortico cu a resta, ta mas urgente cu nunca pa predica e mensahe aki cu por salba bida.—1 Timoteo 4:16.

“Fin di Tur Cos Ta Serca”

¹⁹ Corda cu Pedro a introduci su conseho pa stima otro cu e palabranan: “Fin di tur cos ta serca.” (1 Pedro 4:7) Pronto Dios su husto mundo nobo lo remplasa e mundo malbado aki. (2 Pedro 3:13) Pues anto, awe no ta tempo pa ta desprecupa y satisfecho cu nos mes. Hesus a spierta nos: “Tene cuidou pa boso curason no ta carga pa causa di paranda y buracheria y e precupacionnan di bida, y e dia ei no bin diripiente riba boso manera un trampa.”—Lucas 21:34, 35.

²⁰ Di tur manera anto, laga nos keda vigila y “sea alerta” pa sa na unda nos ta den e coriente di tempo. (Mateo 24:42) Laga nos ta alerta pa cualkier tentacion di Satanas cu lo por distrai nos. No permiti nunca pa e mundo friu y sin amor aki stroba nos di demostra amor pa otro hende. Mas cu tur cos, laga nos hala mas y mas serca di e Dios berdadero, Yehova, kende su Reino Mesianico pronto lo cumpli cu e proposito glorioso cu e tin pa e tera aki.—Revelacion 21:4, 5.

[Nota]

PREGUNTANAN DI STUDIO

• Ki conseho di despedida Hesus tawatin pa su disipelnan, y kico ta mustra cu Pedro a compronde e importancia di esei? (Par. 1-2)

• Kico ta nifica ‘keda ferviente den amor’? (Par. 3-5)

• Dicon nos mester stima otro? (Par. 6-8)

• Con bo por demostra cu bo ta stima otro hende? (Par. 9-18)

• Dicon awor no ta tempo pa ta desprecupa y satisfecho cu nos mes, y kico nos mester ta determina pa haci? (Par. 19-20)

[Plachi na pagina 29]

Un famia hopi uni ta miho prepara pa resisti e presionnan di e ultimo dianan aki

[Plachi na pagina 30]

Amor ta motiva nos pa yuda esnan cu ta den berdadero necesidad

[Plachi na pagina 31]

Comparti e bon nobo di e Reino di Dios cu otro hende ta un acto di amor