Con pa Resolve Desacuerdo di Negoshi

Na 1 Corintionan 6:​1-8, apostel Pablo a trata e asunto di casonan den corte entre rumannan den fe. El a keda masha desapunta cu algun cristian na Corinto a “tribi di bay corte dilanti di hende inhusto.” (Versiculo 1) Pablo a duna algun motibo solido pakico cristiannan no mester hiba otro corte, sino mas bien, trata di resolve desacuerdo siguiendo instruccion cu e congregacion a ricibi. Prome, laga nos analisa algun motibo pakico el a duna e conseho inspira aki y despues nos lo considera algun situacion den cua talbes e instruccionnan aki di e apostel no ta aplica.

Na prome luga, ora surgi un problema di negoshi entre nos y un ruman, nos lo kier atende e asunto na Jehova su manera y no manera nos kier. (Proverbionan 14:12) Hesus a mustra bon cla cu ta mihor nos resolve un desacuerdo di biaha, prome cu e bira pio. (Mateo 5:​23-26) Pero lamentablemente, algun cristian tin un actitud di bringa nan caso te na final y pesey nan ta bay te corte. Pablo a bisa: “E solo echo cu boso tin caso hudicial contra otro ya caba ta un derota completo pa boso.” Dicon? Mas cu tur cos, pasobra esey por afecta e bon nomber di nos Dios y e reputacion di e congregacion. Pa esey no sosode, nos tin cu tuma na pecho loke Pablo a bisa: “Pakico boso no ta dispuesto pa soporta ora hende estafa boso?”​—Versiculo 7.

Pablo a rasona tambe cu Dios a duna e congregacion un bon medio pa yuda resolve hopi desacuerdo. E ancianonan ta hombernan cu a adkiri sabiduria pa medio di nan estudio di e Scritura, y segun Pablo, nan ta capacita pa “husga entre [nan] rumannan” pa loke ta trata “e asuntonan di e bida aki.” (Versiculo 3-5) Hesus a splica cu pa resolve desacuerdo tocante asuntonan grave, manera calumnia of fraude, nos mester sigui tres paso: (1) Purba resolve e asunto entre abo cu e otro persona so; (2) si e prome paso fracasa, bolbe reuni cu e persona den presencia di un of dos testigo y (3) si esey tampoco no funciona, bay cerca e representantenan di e congregacion, e ancianonan.​—Mateo 18:​15-17.

Claro cu e ancianonan no tin nodo di ta abogado of hende di negoshi, ni mester actua como tal. Tampoco nan no ta stipula e condicionnan pa resolve desacuerdo di negoshi entre rumannan. Mas bien, nan ta trata di yuda tur esnan envolvi pa pone na practica e principionan di Bijbel y pa yega na un solucion amical. Den casonan complica, nan por dicidi di consulta cu e superintendente di circuito of cu e sucursal di Testigonan di Jehova. Pero tin situacion den cua e conseho di Pablo no ta aplica. Laga nos considera algun.

Den algun caso, un demanda den corte por ta un simpel formalidad of un paso huridico necesario—no un medida egoista—pa logra un solucion pacifico. Por ehempel, kisas esey ta e unico manera pa obtene un divorcio, pa haya custodia di un yiu, pa establece e montante di alimentacion, pa cobra un seguro, pa bin riba lista di creditor den un caso di bancarota y pa confirma cu un testament ta autentico. Tambe por sosode cu un ruman ta dicidi di bin cu un contrademanda pa proteha su mes den un caso.a

Si un cristian recori na corte den e tipo di casonan ey, basta e no ta hacie cu un actitud di rivalidad, lo e no ta violando e spirito di e conseho inspira di Pablo.b Sinembargo, nos mester keda corda kico ta nos prioridad: santifica e nomber di Jehova y mantene paz y union den e congregacion. Loke mas ta distingui e siguidornan di Cristo ta nan amor, y “amor . . . no ta busca su mes interes.”​—1 Corintionan 13:​4, 5; Juan 13:​34, 35.