Kico Bijbel Ta Bisa di Divorcio y Separacion?

Jehova ta spera di hende casa cu nan lo keda fiel na e promesa cu nan a haci otro dia nan a casa. Ora el a uni e prome pareha den matrimonio, el a bisa: “Un homber . . . lo uni cu su esposa. Y nan lo bira un carni.” Mas despues, Hesus a ­ripiti e palabranan ey y a agrega: “No laga ningun hende separa loke Dios a uni bou di un yugo.” (Genesis 2:24; Mateo 19:​3-6) Pues, Jehova y Hesus ta considera matrimonio un union pa bida largo cu ta termina solamente ora un di nan muri. (1 Corintionan 7:39) Ya cu matrimonio ta sagrado, nos no mester mira divorcio como un asunto di poco importancia. De echo, Jehova ta odia divorcio cu no tin un base biblico.​—Malakias 2:​15, 16.

Segun Bijbel, kico ta un motibo valido pa divorcia? Wel, Jehova ta odia adulterio y fornicacion. (Genesis 39:9; 2 Samuel 11:​26, 27; Salmo 51:4) E ta haya fornicacion asina baho cu e ta permiti un hende divorcia pa e motibo ey. (Na Capitulo 9, paragraf 7, tin un splicacion tocante kico fornicacion ta.) Jehova ta duna e casa cu a keda fiel e derecho di dicidi si e kier keda casa of si e kier divorcia. (Mateo 19:9) Pues, si e dicidi di busca su divorcio, e no ta haciendo algo cu Jehova ta odia. Pero un cos si, ningun miembro di e congregacion cristian no mester anim’e pa divorcia. De echo, tin cierto circunstancia cu por pone cu e casa inocente ta dicidi di keda cerca esun culpabel, principalmente si el a arepenti di curason. En todo caso, ta esun cu tin un base biblico pa busca divorcio tin cu dicidi kico e kier haci, y acepta e consecuencianan di su decision.​—Galationan 6:5.

Di otro banda, algun cristian den cierto situacion extremo a dicidi di separa of hasta divorcia for di nan casa, sin cu el a comete fornicacion. Den casonan asina, Bijbel ta stipula cu esun cu dicidi di bay mester “keda sin casa, of sino, lag’e haci bon” cu su casa. (1 Corintionan 7:11) Un cristian den e situacion ey no ta liber pa busca un otro hende pa casa cu ne. (Mateo 5:32) Laga nos wak algun situacion extremo cu algun hende a considera como un base pa separacion.

Ora cu un homber deliberadamente ta keda sin mantene su famia. Tin esposo no ta percura pa e necesidadnan basico di nan famia, pero no pasobra nan no por, sino pasobra nan no kier. Como resultado, e famia ta pasa miseria. Bijbel ta bisa: “Si un hende no ta percura pa . . . e hendenan di su cas, el a nenga e fe y ta pio cu un persona sin fe.” (1 Timoteo 5:8) Si un homber asina nenga di cambia su comportacion, e esposa lo tin cu dicidi si un separacion legal lo yud’e proteha su mes bienestar y e bienestar di su yiunan. Claro cu e ancianonan di congregacion mester investiga e acusacion aki a fondo, ya cu ora un hende nenga di cuida su famia, esey por ta un motibo pa expuls’e.

Maltrato fisico grave. Tin hende ta bira asina agresivo cu nan ta pone salud, y hasta bida, di nan casa na peliger. Si e casa abusado ta un cristian, e ancianonan mester investiga e caso pa wak si e acusacionnan ta berdad, ya cu “atake di rabia” y un conducta violento ta base pa expulsion.​—Galationan 5:​19-21.

Ora e bienestar spiritual di un casa ta den peliger grave. Tin casa ta haci tur nan posibel pa stroba e otro di sirbi Jehova, of hasta nan ta purba di oblig’e di kibra e leynan di Dios. Den tal caso, e casa cu ta den peliger lo por dicidi cu e unico manera pa e “obedece Dios na prome luga” ta si e haya un separacion legal.​—Echonan 5:29.

Den e situacionnan extremo ey cu nos a caba di trata, ningun hende no mester anima e casa inocente pa separa ni pa keda cu su casa. Aunke anciano y otro ruman maduro por duna apoyo y conseho biblico, nan no sa tur detaye di loke ta pasa entre un esposo y esposa. Ta Jehova so sa. Si un ­esposo of esposa cristian ta exagera e gravedad di su problemanan matrimonial djis pa e por bay laga su casa, lo e no ta honrando Dios ni e areglo matrimonial. Ademas, Jehova sa ta ken ta uzando astucia pa logra un separacion, maske con bon e persona purba di sconde esey. De echo, “tur cos ta sunu y habri dilanti di wowo di esun na ken nos tin cu duna cuenta.” (Hebreonan 4:13) Pero si ta existi un situacion sumamente peligroso y un ruman cristian, como ultimo recurso, ta ­dicidi di separa, ningun hende no mester critic’e. Al fin y al cabo, “nos tur lo para dilanti di e stoel di huicio di Dios.”​—Romanonan 14:​10-12.