Matrimonio Mester Ta un Union Permanente

BASA riba e final di hopi pelicula, matrimonio ta un meta deseabel. Hopi bes, e homber y e mohe al final ta haya otro, ta casa y biba “felis pa semper.” Den pelicula, esei por lo general ta fin di e storia.

Pero den bida real, casamento no ta fin di e storia, sino mas bien e comienso di un bida nobo hunto. Y ta di spera cu manera Eclesiastes 7:8 ta bisa, “fin di un asunto ta miho cu su principio.”

Un Union Permanente

Un Cristian tin mester di sano huicio y e habilidad pa mira mas aleu. Pa un matrimonio por dura y ser un union satisfaciente, e mester tin un base solido. Si no ta asina, e tension despues di casamento lo por ta hopi mas grandi cu e tension prome cu ne. Un Cristian no por drenta matrimonio cu e pensamento: ‘Si e cos aki no resulta, mi por diborcia.’ Mester considera matrimonio como un union permanente.

Hesus a mustra bon cla cu matrimonio mester ta permanente ora el a contesta un pregunta cu nan a hacie tocante si ta corecto pa diborcia. El a declara: “Boso no a lesa cu [Dios] cu a crea hende for di principio ‘a traha nan homber y mohe’, y a bisa: ‘Pa e motibo aki un homber lo bandona su tata y mama y lo uni cu su esposa; y nan dos lo bira un carni’? Asina anto nan no ta dos mas, sino un carni. Pesei loke Dios a uni, no laga ningun hende separa.”—Mateo 19:4-6.

Despues di e Dia di Casamento

Hende a yega di bisa corectamente cu den bida di un Cristian, e unico cos mas importante cu su matrimonio ta su dedicacion na Dios. Dedicacion ta mara bo pa semper na e Creador, y bautismo ta demostra esei publicamente. Matrimonio ta e declaracion publico di cu pa semper lo bo keda fiel na e persona. No ta ningun tiki bon pa dedica bo mes na Dios of drenta den un union matrimonial si bo tin dudanan serio. Pesei, esnan cu tin pensa di casa tin cu analisa cuidadosamente e creencianan, metanan, actitudnan y caracter di nan prospectivo casa.

Ora e pareha ta haciendo e preparacionnan pa e casamento, bondad, consideracion y e spirito di coperacion ta cualidadnan importante. Despues, pa e matrimonio por ta exitoso e cualidadnan ei ta bira asta mas importante. E pareha resien casa ta loco namora, pero despues di casamento nan tin cu corda tur dia, cu amor “no ta busca su propio interes.” Si consistentemente nan demostra amor aña tras aña, “amor nunca no ta faya.” (1 Corintionan 13:5, 8) Teniendo amor duradero pa otro, lo ta mas facil pa demostra Dios su fruta di spirito, esta, cualidadnan manera: pasenshi, cariño, bondad, suavidad y dominio propio. E cualidadnan aki ta necesario pa un matrimonio exitoso.—Galationan 5:22, 23.

E parti dificil ta pa sigui demostra e cualidadnan ei despues di e dia di casamento. Sinembargo, e clave pa bo tin exito den desplega e bon cualidadnan ei ta esaki: Stima e persona cu bo a casa cu ne, y sea dispuesto pa haci sacrificio.

Hesus a bisa cu e mandamento mas grandi pa hende ta pa stima Yehova, y el a bisa cu e di dos mas grandi ta: “Stima bo prohimo manera bo mes.” (Mateo 22:39) Un persona casa su prohimo mas pega ta su casa, pasobra nada na mundo por uni dos persona manera matrimonio.

Sinembargo, union fisico so riba su mes no ta garantisa harmonia emocional. Union di dos curpa no ta resulta semper den union di pensamento. Pa e union sexual por duna e maximo satisfaccion, mester tin un di dos union: union emocional y di intencion. Den mayoria caso, haci sacrificio ta e prijs cu un hende tin cu paga pa haci e matrimonio un exito. Ken mester haci sacrificio? E esposo? E esposa?

Con pa Demostra Amor y Honor

E Palabra di Dios ta manda: “Duna preferencia na otro den honor.” (Romanonan 12:10) Si ta posibel, haci e sacrificio prome cu bo casa pidi bo. Bo mes sa cu si bo haya algo despues di hopi pidimento, ya caba el a perde un parti di su balor. Mas bien, cada partner den un matrimonio mester cultiva e custumber di tuma e iniciativa pa demostra honor na otro.

Por ehempel, Bijbel ta manda esposonan: “Biba cu boso esposanan cu comprension, manera cu un vas mas delicado, como cu e ta hende mohe; y dun’e honor . . . pa boso oracionnan no wordo stroba.” (1 Pedro 3:7) Si un esposo no ta duna su esposa honor, esei lo afecta asta su oracionnan na Dios. Pero kico duna honor na bo esposa ta nifica? Esei ta nifica tene cuenta semper cu ne, scucha su opinion, mayoria bes lag’e scohe prome den varios asunto. Y e esposa por honra su casa den mesun manera, door di haci esfuerso pa ta un ayudante coperativo.—Genesis 21:12; Proverbionan 31:10-31.

E Palabra di Dios ta bisa: “Esposonan . . . mester stima nan esposa manera nan mes curpa. Esun cu ta stima su esposa ta stima su mes; pasobra nunca ni un hende no a odia su mes carni, ma ta aliment’e y ta cuid’e, mescos cu Cristo tambe ta haci cu e iglesia.” Cuanto Cristo a stima su siguidonan? E tawata dispuesto na muri pa nan. Tambe Bijbel ta bisa: “Laga cada un di boso [esposonan] stima su esposa manera su mes.” (Efesionan 5:28-33) Y e Palabra di Dios ta bisa esposanan “pa stima nan esposo, . . . siendo sumiso na nan mes esposo, pa e palabra di Dios no wordo deshonra.”—Tito 2:4, 5.

Tolera Eror

Siendo cu tur hende ta nace imperfecto, nan lo comete eror. (Romanonan 3:23; 5:12; 1 Juan 1:8-10) Pero en bes di haci un pieu bira un baca, tuma na pecho e conseho biblico: “Riba tur cos, keda ferviente den boso amor pa otro, pasobra amor ta cubri un multitud di pica.” (1 Pedro 4:8) E miho manera pa atende erornan chikito ta door di pasa nan por halto, no keda pensa riba nan. Y esei por conta tambe pa erornan mas serio. Colosencenan 3:12-14 ta declara: “Bisti un curason di compasion, cariño, humildad, mansedumbre y pasenshi. Y boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci. Y ademas di tur e cosnan aki bisti amor, cual ta e laso perfecto di unidad.”

Cuanto bes nos mester pordona e eror y fayonan comun y coriente di nos casa? Pedro a puntra Hesus: “‘Señor, cuanto bes mi ruman lo peca contra mi, y ami mester pordon’e? Te shete bes?’ Hesus a contest’e: ‘Mi ta bisa bo, no te shete bes, sino te setenta bes shete.’” (Mateo 18:21, 22) Ya cu aki Hesus tawata papia di hende pafo di e union matrimonial, cuanto mas parehanan casa mester pordona otro!

Aunke e areglo matrimonial a ser ataca den ultimo añanan, matrimonio lo sigui existi den futuro pasobra ta Dios a institu’e y tur cos cu e decreta ta “masha bon.” (Genesis 1:31) Matrimonio lo no bai fo’i moda. Y e por ta exitoso, specialmente entre esnan cu ta respeta y apoya Dios su mandamentonan. Pero e reto ta esaki: E dos personanan lo cumpli cu e promesa cu nan a haci riba e dia di casamento, esta, di stima y cuida otro? Esei sigur por ta un reto y kisas bo tin cu lucha pa sali victorioso. Pero e resultadonan lo ta bale la pena!

[Cuadro na pagina 10]

Diborcio Y Separacion

Dios, Esun cu a origina matrimonio, a diseñ’e pa ta un union permanente. Pero tin motibo biblico pa un persona diborcia di su casa, y tin cu ta permitie bolbe casa? Hesus a trata e asunto ei ora el a declara: “Mi ta bisa boso, ken cu diborcia su esposa, si no ta pa motibo di inmoralidad sexual, y casa cu otro mohe, ta comete adulterio.” (Mateo 19:9) Infieldad sexual di un casa ta e unico base pa un diborcio cu lo permiti e casa inocente bolbe casa.

Fuera di esei, aunke e palabranan di Bijbel na 1 Corintionan 7:10-16 ta anima casanan pa keda hunto, nan ta permiti separacion. Tin hende cu despues di a haci hopi esfuerso pa conserva nan matrimonio, ta sinti cu nan no tin otro opcion sino di separa. Kico por ta base biblico aceptabel pa dal e paso ei?

Un base ta si un persona deliberadamente ta keda sin mantene e famia. Ora un esposo casa, e ta asumi e responsabilidad di percura pa su esposa y yiunan. Un homber cu deliberadamente no ta percura pa e necesidadnan material di bida “a nenga e fe y ta piyo cu un incredulo.” (1 Timoteo 5:8) Pues, ta posibel separa for di dje.

Un otro motibo ta abuso fisico extremo. Pues anto, si un homber ta abusa fisicamente di su casa, e victima por separa. (Galationan 5:19-21; Tito 1:7) “Esun cu ta gusta violencia [Dios] su alma ta odia.”—Salmo 11:5.

Un otro base pa separacion ta ora un persona creyente su spiritualidad (su relacion cu Dios) ta completamente na peliger. Ora e oposicion di un casa, podise inclusivo restriccion fisico, ta haci cu ta imposibel pa e creyente practica adoracion berdadero y ta pone su spiritualidad na peliger, algun creyente e ora ei a haya cu ta necesario separa.a—Mateo 22:37; Echonan 5:27-32.

Sinembargo, si un persona diborcia bou di tal sircunstancia, lo e no ta liber pa bolbe casa. Segun Bijbel, e unico base legitimo pa diborcio cu ta permiti un persona bolbe casa ta adulterio of “inmoralidad sexual.”—Mateo 5:32.

[Nota]

[Plachi na pagina 9]

Mester considera matrimonio como un areglo permanente

[Plachi na pagina 10]

Hesus a bisa cu nos mester pordona “setenta bes shete”