E Punto di Bista Biblico

Pakico Mira Matrimonio Como Algo Sagrado?

MAYORIA hende awe probablemente lo pretende cu nan ta kere cu matrimonio ta algo sagrado. Pero dicon anto tin asina tanto pareha ta diborcia? Pa algun hende, matrimonio ta djis un promesa basa riba amor romantico y un contract legal. Pero segun nan, bo por keda sin cumpli cu e promesa ei tambe. Pa hende cu tin tal punto di bista di matrimonio, ta masha facil pa nan kibra matrimonio ora cu cosnan no ta bai manera nan a spera.

Kico ta Dios su punto di bista di e areglo di matrimonio? Nos por haya e contesta den su Palabra, Bijbel, na Hebreonan 13:4: “Laga matrimonio wordo honra pa tur hende.” E palabra Griego traduci como “honra” ta transmiti e idea di duna algo hopi balor y consider’e como precioso. Ora nos ta balora algo, nos ta haci nos best pa conserv’e, ya nos no ta perd’e ni pa casualidad. Ta asina nos mester considera e areglo di matrimonio tambe. Cristiannan mester mira matrimonio como algo honorabel, algo di hopi balor cu nan kier proteha.

Ta obvio cu Yehova a institui matrimonio como un areglo sagrado entre esposo y esposa. Pero con nos por mustra cu nos tambe tin Yehova su punto di bista encuanto matrimonio?

Amor y Respet

Pa mustra honor na e areglo di matrimonio, esposo y esposa mester mustra honor na otro. (Romanonan 12:10) Apostel Pablo a skirbi e cristiannan di prome siglo: “Laga cada un di boso tambe stima su esposa manera su mes; y e esposa percura pa e respeta su esposo.”—Efesionan 5:33.

Ta cierto cu sa sosode cu un di e partnernan no ta actua na e manera di mas amoroso ni di mas respetuoso. Toch, cristiannan mester mustra e amor y respet ei. Pablo a skirbi: “Boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci.”—Colosensenan 3:13.

Tempo y Atencion

Parehanan casa cu ta mira nan matrimonio como algo sagrado ta tuma tempo pa satisface necesidadnan fisico y emocional di nan partner. Esaki ta conta tambe pa loke ta trata intimidad sexual. Bijbel ta bisa: “Laga e esposo cumpli cu su deber di matrimonio pa cu su esposa, y mescos tambe e esposa pa cu su esposo.”—1 Corintionan 7:3.

Sinembargo, algun pareha casa a haya cu ta necesario pa e esposo bai biba temporalmente den un otro area pa e por gana mas placa. Tin biaha e separacion aki a dura hopi mas tanto cu nan a verwacht. Hopi bes e tipo di separacionnan aki a pone e matrimonio bou di asina tanto tension cu tin bes esaki a hiba na adulterio y diborcio. (1 Corintionan 7:2, 5) Pesei, hopi pareha cristian ta prefera di keda sin cierto beneficionan material, pa no pone nan matrimonio na peliger. Pasobra pa nan, e ta algo sagrado.

Ora Surgi Problema

Ora surgi problema, cristiannan cu ta honra nan matrimonio, no ta core separa ni diborcia. (Malakias 2:16; 1 Corintionan 7:10, 11) Hesus a declara: “Ken cu diborcia su esposa, si no ta pa motibo di inmoralidad, ta haci e mohe comete adulterio; y ken cu casa cu un mohe diborcia ta comete adulterio.” (Mateo 5:32) Parehanan cu dicidi di diborcia of separa for di otro sin cu nan tin base biblico, no ta mustra honor pa matrimonio.

E conseho cu nos ta duna personanan cu tin problemanan serio den nan matrimonio tambe ta mustra kico nos ta pensa di matrimonio. Nos ta cla pa recomenda hende pa separa of diborcia? Ta cierto cu tin bes tin motibonan valido pa separacion, manera den caso di maltrato fisico severo of cu e homber ta nenga obstinadamente di sostene su famia.a Ademas, manera e articulo ta bisa mas prome, Bijbel ta permiti diborcio solamente si un di e partnernan a comete inmoralidad, esta, fornicacion. Pero apesar di esei, cristiannan no mester forsa otronan pa tuma cierto decision den casonan asina. Al fin y al cabo, ta e persona cu tin e problema den su matrimonio lo tin cu biba cu e consecuencianan di su decision, y no esun cu ta duna conseho.—Galationan 6:5, 7.

Evita un Punto di Bista Indiferente

Den algun area a bira masha normal pa hende uza matrimonio como un medio pa nan por keda legalmente na un otro pais. Por lo general un persona asina ta drenta un areglo cu un ciudadano di e pais ei y ta pag’e pa casa cu ne. Hopi bes aunke e parehanan aki ta casa, nan no ta biba hunto. Podise nan no tin ni sikiera amistad cu otro. Asina cu nan haya e permit cu nan tawata kier, nan ta diborcia. Nan ta mira nan matrimonio unicamente como un combenio di negoshi.

Bijbel no ta aproba e punto di bista indiferente ei. Sin importa e motibo pakico hende ta casa, ora nan casa nan ta drenta un areglo sagrado cu den bista di Dios mester dura henter nan bida. Den e areglo ei nan ta keda uni como esposo y esposa, y nan no tin mag di diborcia y kisas bolbe casa, sin cu nan tin e base biblico pa diborcio.—Mateo 19:5, 6, 9.

Mescos cu den caso di cualkier otro proyecto cu ta bale la pena, pa logra un matrimonio exitoso, bo tin cu haci esfuerso y persevera. Hende cu no ta reconoce matrimonio como algo sagrado, ta cla pa core pone un fin na e matrimonio. Of nan ta djis conforma nan mes numa cu un matrimonio infelis. Di otro banda, esnan cu ta reconoce cu matrimonio ta algo sagrado, si sa cu Dios ta spera pa nan keda hunto. (Genesis 2:24) Tambe nan ta realisa cu ta door di haci esfuerso pa tin harmonia den nan matrimonio, nan ta duna honor na Yehova como Esun cu a diseña e areglo di matrimonio. (1 Corintionan 10:31) E punto di bista aki ta duna nan e motivacion pa persevera y traha pa nan matrimonio por ta un exito.

[Nota]