Material pa Predica Produciendo Literatura pa Henter Mundo

1, 2. (a) Den e prome siglo, kico a yuda e discipelnan predica e bon noticia den e Imperio Romano? (b) Ki prueba nos tin cu Jehova ta apoya nos trabou di predica den e tempo aki? (Wak tambe e cuadro “Bon Noticia na Mas cu 670 Idioma.”)

DURANTE Pentecoste di aña 33, e bishitantenan di Jerusalem a keda impresiona. Dicon? Pasobra hende di Galilea tabata papia diferente idioma sin dificultad, y e mensahe cu nan tabata transmiti a fascina nan oyentenan. E Galileonan tabata discipel di Hesus, y mediante un milager, e discipelnan aki a ricibi e don di papia den varios idioma. Esaki tabata un prueba convencente cu Dios tabata apoya nan. (Lesa Echonan 2:1-8, 12, 15-17.) Riba e dia ey, nan a predica e bon noticia na tur tipo di hende, y despues nan a predica e bon noticia den henter e Imperio Romano.—Col. 1:23.

² Awe, e sirbidornan di Dios no ta cuminsa papia milagrosamente den varios idioma. Pero asina mes, nan ta logra predica den hopi mas idioma cu den e prome siglo, ya cu ta traduci e mensahe di Reino na mas cu 670 idioma. (Echo. 2:9-11) E pueblo di Dios a produci un cantidad asina grandi di literatura, y na asina hopi idioma, cu e mensahe di Reino a yega den tur skina di nos planeta.a Esaki tambe ta un prueba convencente cu Jehova ta uzando Hesucristo, e Rey cu el a nombra, pa dirigi nos trabou di predica. (Mat. 28:19, 20) Den e capitulo aki nos lo repasa djis algun di e materialnan cu nos a uza pa logra efectua e trabou aki durante e ultimo 100 añanan. Ta bon pa nos tuma nota con e Rey a entrena nos gradualmente pa mustra interes den personanan individual y tambe a anima nos pa ta maestro di e Palabra di Dios.—2 Tim. 2:2.

E Rey Ta Duna Su Sirbidornan Material pa Planta Simia di e Berdad

3. Dicon nos ta uza varios material den nos trabou di predica?

³ Hesus a compara e “palabra di Reino” cu simia, y e curason di un persona cu tera. (Mat. 13:18, 19) Mescos cu un cunukero ta uza varios herment pa haci e tera moli y pa prepar’e pa planta e simia, asina e pueblo di Jehova a uza varios herment of material cu a yuda nan prepara e curason di miyones di hende pa acepta e mensahe di Reino. Algun di e materialnan ey tabata util pa solamente un tempo cortico. Otro materialnan, manera buki y revista, te ainda tin hopi balor. Den e capitulo anterior nos a considera metodonan pa comunica cu hende masalmente. Pero den e capitulo aki nos lo bay papia tocante e materialnan cu a yuda e publicadornan di Reino comunica personalmente cu hende.—Echo. 5:42; 17:2, 3.

4, 5. Con e rumannan tabata uza tocadisco, pero kico tabata falta?

⁴ Discurso graba. Den e decadanan di 1930 y 1940, e publicadornan tabata uza tocadisco portatil pa toca grabacionnan di discursonan biblico. Un grabacion tabata dura menos cu 5 minuut. Tin biaha e grabacionnan tabatin tema cortico, manera “Trinidad”, “Purgatorio” y “Reino.” Con nan tabata uza e disconan ey? Ruman Clayton Woodworth, Jr., kende a batisa na 1930 na Merca, a conta: “Mi tabata cana cu un tocadisco chikito den un maletin. Mester a dun’e cuerde, despues pone e hangua precies riba e rand di e disco pa e por a toca bon. Ora mi yega na un porta, mi tabata habri e maletin, prepara e tocadisco y primi bel. Ora e doño di cas habri porta, mi tabata bisa: ‘Mi tin un mensahe importante cu mi tin gana pa bo tende.’” Con e hendenan tabata reacciona? Segun Ruman Woodworth: “Hopi biaha e reaccion tabata masha positivo. Pero tabatin hende cu tabata gewoon dal e porta cera. Tin biaha nan tabata kere cu ta tocadisco mi ta bende.”

⁵ Na 1940, tabatin mas cu 90 discurso riba disco y e rumannan a traha mas cu 1 miyon disco. John E. Barr, kende despues a sirbi como un miembro di Cuerpo Gobernante, tabata traha pionero na Gran Britania e tempo ey. El a conta: “Den e periodo di 1936 pa 1945, semper mi tabatin un tocadisco cu mi. Pa ta honesto, e tempo ey mi tabata sinti mi incomodo sin dje. Tabata un gran animacion pa tende e stem di Ruman Rutherford ora bo tabata para na porta; ta comosifuera e tabata eynan hunto cu bo. Naturalmente, predicacion cu tocadisco tabata falta algo: Bo no tabata haya chens di siña hende y touch nan curason.”

6, 7. (a) Kico tabata e bentaha y desbentaha di uza carchi di testimonio? (b) Den ki sentido Jehova “a pone palabra den nos boca”?

⁶ Carchi di testimonio. Cuminsando na 1933, e publicadornan a haya animacion pa uza carchi di testimonio den sirbishi di cas pa cas. E carchi di testimonio tabata casi tamaño di e papel di rapport di sirbishi di veld cu nos ta uza awe. Tabatin un mensahe biblico cortico riba dje y tambe un descripcion di e literatura biblico cu e doño di cas por a haya. E publicador mester a djis duna e doño di cas e carchi y pidie pa les’e. Lilian Kammerud, kende despues a sirbi como misionero na Puerto Rico y Argentina, a conta: “Mi tabata gusta predica cu carchi di testimonio.” Dicon? E di: “No ta nos tur tabatin e capacidad pa duna un bon presentacion. Pero, di e manera ey mi a custumbra di acerca hende.”

⁷ Ruman David Reusch, kende a batisa na 1918, a comenta: “Carchi di testimonio a yuda e rumannan, pasobra masha poco di nan tabata sinti cu nan por a papia bon.” Pero e metodo aki tabatin su desbentaha tambe. Segun Ruman Reusch, “tin biaha nos a topa hende cu a kere cu ta papia nos no por a papia. Den un sentido, hopi di nos en berdad no por a papia. Pero Jehova tabata preparando nos pa despues nos por a presenta e mensahe di Bijbel na un manera mas personal. No a tarda hopi cu el a cuminsa pone palabra den nos boca door di siña nos con pa uza Bijbel na porta di e hendenan. Esey a sosode via e Scol di Ministerio Teocratico cu a cuminsa den decada di 1940.”—Lesa Jeremias 1:6-9.

8. Si nos kier pa Cristo entrena nos, kico nos tin cu haci?

⁸ Buki. Di 1914 te cu awor, e pueblo di Jehova a produci mas cu 100 buki cu ta analisa temanan di Bijbel. Algun di e bukinan aki tabata specificamente pa entrena publicadornan pa predica na un manera efectivo. Anna Larsen, na Dinamarca, kende tin rond di 70 aña como publicador, a conta: “Jehova a uza e Scol di Ministerio Teocratico y tambe e bukinan cu a ser uza na e scol ey pa yuda nos bira publicadornan mas efectivo. Mi ta corda cu e prome buki tabata Theocratic Aid to Kingdom Publishers, cu a sali na 1945. Despues a sigui ‘Equipped for Every Good Work’, publica na 1946. Awe nos tin e buki Benefisiá di e Skol di Ministerio Teokrátiko, publica na 2001.” Sin duda, Jehova a “capacita nos adecuadamente pa ta [Su] sirbidor”, principalmente pa medio di e Scol di Ministerio Teocratico y e bukinan cu ta ser uza na e scol. (2 Cor. 3:5, 6) Abo a skirbi bo nomber caba den e Scol di Ministerio Teocratico? Bo ta bin tur siman cu bo buki Skol di Ministerio y ta sigui e superintendente di scol den bo buki ora e ta referi na dje? Si esey ta e caso, bo ta dunando Cristo e oportunidad pa entrena bo pa bira un mihor maestro.—2 Cor. 9:6; 2 Tim. 2:15.

9, 10. Ki papel buki a hunga den planta y muha e simianan di e berdad?

⁹ Un otro manera cu Jehova a duna su pueblo yudansa den e trabou di predica tabata door di laga su organisacion publica buki pa yuda e publicadornan splica siñansanan basico di Bijbel. E berdad cu ta hiba na bida eterna tabata un di e bukinan cu tabata hopi efectivo. Nan a public’e na Ingles na 1968 (na Papiamento, na 1969), y di biaha el a causa un impacto. Nos Ministerio di Reino di november 1968 a bisa: “E demanda pa e buki Berdad tabata asina grandi cu na september e drukkerij di Sociedad na Brooklyn a laga e rumannan traha un extra shift anochi.” E articulo a sigui splica: “Dado momento, na augustus, e pedido pa e buki Berdad tabata 1,5 miyon mas cu loke tabatin den stock.” For di 1968 te cu 1982, nos a publica mas cu 100 miyon ehemplar di e buki ey na 116 idioma. Durante e periodo di 14 aña ey, e cantidad di publicador a aumenta cu mas cu 1 miyon publicador di Reino.b

¹⁰ Na 2005 a sali un otro buki cu tabata sumamente efectivo pa studia Bijbel, esta e buki Kico Bijbel Ta Siña Realmente? Ya caba a publica rond di 200 miyon ehemplar di dje na 256 idioma. Cu ki resultado? Den apenas 7 aña—di 2005 pa 2012—rond di 1,2 miyon hende a bira publicador di e bon noticia. Den e mesun periodo ey, e cantidad di persona cu tabata studia Bijbel cu nos a aumenta di 6 miyon pa mas cu 8,7 miyon. Sin duda, Jehova a bendiciona nos esfuerso pa planta y muha e simianan di e berdad di Reino.—Lesa 1 Corintionan 3:6, 7.

11, 12. Na harmonia cu e textonan menciona, nos revistanan ta pa cua tres grupo di hende?

¹¹ Revista. Originalmente, E Toren di Vigilancia tabata principalmente pa e “tou chikito”, esta, pa cristiannan cu “e yamada celestial.” (Luc. 12:32; Heb. 3:1) Dia 1 di october 1919, e organisacion di Jehova a cuminsa publica un otro revista. E tabata pa atrae publico en general.Tanto e Studiantenan di Bijbel como e publico a gusta e revista ey asina hopi cu pa basta aña su circulacion tabata hopi mas grandi cu esun di E Toren di Vigilancia. Na principio, e revista ey tabata yama The Golden Age. Na 1937, nan a cambia e nomber pa Consolation. Anto na 1946, el a bira conoci como Awake! (na Papiamento a publica Spierta!, na 1995).

¹² A traves di decadanan, e estilo y formato di E Toren di Vigilancia y Spierta! a cambia, pero nan proposito a keda mescos: anuncia e Reino di Dios y fortalece hende su fe den Bijbel. Awe, E Toren di Vigilancia ta sali den un edicion di estudio y un edicion pa publico. E edicion di estudio ta pa e “sirbidornan di cas”, es decir, e “tou chikito” y e “otro carne[nan].”c (Mat. 24:45; Juan 10:16) E edicion pa publico ta ser prepara specialmente pa hende cu ainda no conoce e berdad pero cu tin respet pa Bijbel y pa Dios. (Echo. 13:16) Spierta! ta enfoca riba hende cu no sa hopi di Bijbel y di Jehova, e Dios berdadero.—Echo. 17:22, 23.

13. Kico bo ta haya sobresaliente di nos revistanan? (Analisa e diagram “Publicacionnan Cu Ta Kibra Record.”)

¹³ Na cuminsamento di aña 2014, nos tabata imprimi tur luna mas cu 44 miyon ehemplar di Spierta! y un 46 miyon ehemplar di E Toren di Vigilancia. Spierta! tabata ser traduci na mas o menos 100 idioma y E Toren di Vigilancia na mas cu 200 idioma. Pues, e dos revistanan aki ta esunnan mas traduci y mas distribui na mundo. E logronan ey en berdad ta sobresaliente, pero esey no ta sorprende nos. Pakico no? Pasobra e revistanan aki ta contene e mensahe cu Hesus a bisa lo ser predica den henter e Tera habita.—Mat. 24:14.

14. (a) Dicon e cambio di nomber di e corporacion tabata na su luga? (b) Di acuerdo cu e nomber nobo, kico e sirbidornan di Dios a haci yen di entusiasmo?

¹⁴ Bijbel. Na 1896, Ruman Russell cu su colaboradornan a cambia nomber di e corporacion cu nan tabata uza pa publica literatura. Nan kier a inclui e palabra Bijbel aden; e nomber a bira Watch Tower Bible and Tract Society. E cambio ey tabata na su luga pasobra Bijbel semper tabata e herment principal pa predica e bon noticia tocante e Reino. (Luc. 24:27) Pesey, yen di entusiasmo, e sirbidornan di Dios a distribui Bijbel y anima hende pa les’e. Por ehempel, na 1926, nos a imprimi The Emphatic Diaglott, un traduccion di e Scritura Griego Cristian, uzando nos propio imprentanan. Benjamin Wilson a traduci e obra aki. Cuminsando na 1942, nos a imprimi y distribui rond di 700.000 ehemplar di henter e King James Version. Apenas 2 aña despues, nos a cuminsa imprimi e American Standard Version, cu ta uza e nomber di Jehova 6.823 biaha. Te cu 1950, nos a distribui mas cu 250.000 ehemplar.

15, 16. (a) Kico bo ta aprecia di e New World Translation? (Considera e cuadro “Ta Traduci e New World Translation na Mas y Mas Idioma.”) (b) Con bo por laga Jehova touch bo curason?

¹⁵ Na 1950, nos a publica e New World Translation of the Christian Greek Scriptures. (E traduccion na Papiamentu a sali na 2011). E Bijbel completo, New World Translation of the Holy Scriptures, a sali den un solo volumen na 1961. E traduccion aki ta honra Jehova, ya cu nan a pone su nomber na tur e luganan cu e ta aparece den e texto original na Hebreo. E nomber di Dios ta aparece tambe 237 biaha den e texto original di e Scritura Griego Cristian. Pa haci sigur cu e New World Translation ta mas exacto posibel y mas facil pa lesa, el a ser revisa varios biaha, esun mas recien na 2013. Te cu 2013 a imprimi mas cu 201 miyon ehemplar di e New World Translation, sea completo of un parti di dje, na 121 idioma.

¹⁶ Con algun hende a reacciona ora nan a lesa e New World Translation den nan propio idioma? Un homber di Nepal a bisa: “Hopi hende tabatin dificultad pa compronde e traduccion bieu cu nos tabatin na Nepales pasobra e tabata uza palabra anticua. Pero awor nos por compronde Bijbel hopi mas mihor, ya cu e traduccion aki ta uza e idioma di tur dia.” Ora un señora na Republica di Africa Central a cuminsa lesa e traduccion na idioma Sango, awa a basha for di su wowo y el a bisa: “Esaki ta e idioma cu ta touch mi curason.” Mescos cu e señora ey, cada un di nos por laga e Palabra di Jehova touch nos curason door di les’e tur dia.—Sal. 1:2; Mat. 22:36, 37.

Agradecido pa e Materialnan y pa e Entrenamento

17. Con bo por mustra aprecio pa e materialnan y pa e entrenamento cu bo ta ricibi, y kico lo ta e resultado si bo haci esey?

¹⁷ Bo ta aprecia e materialnan y e entrenamento cu Hesucristo, nos Rey, ta duna nos continuamente? Bo ta saca tempo pa lesa e literatura cu e organisacion di Dios ta produci, y bo ta uza nan pa yuda otro hende? Si ta asina, lo bo ta di acuerdo cu e comentario di un ruman muher cu yama Opal Betler, kende a batisa dia 4 di october 1914. Opal a bisa: “A traves di añanan, ami cu mi esposo [Edward] a uza tocadisco y carchi di testimonio. Nos a predica di cas pa cas cu buki, foyeto y revista. Nos a participa den campaña y marcha y tambe a distribui tratado. Despues nos a siña haci rebishita y dirigi estudio di Bijbel na cas di personanan interesa. Nos tabatin un bida ocupa y feliz.” Hesus a priminti cu su siguidornan lo ta ocupa cu e trabou di sembra y di cosecha y cu nan lo ta hopi contento. Miyones di ruman manera Opal por confirma cu Hesus a cumpli cu e promesa ey.—Lesa Juan 4:35, 36.

18. Ki privilegio grandi nos tin?

¹⁸ Kisas hopi hende cu ainda no ta sirbidor di e Rey ta pensa cu e pueblo di Dios ta consisti di “hende gewoon cu no [tin] mucho educacion.” (Echo. 4:13) Pero pensa un rato. E Rey a percura pa su pueblo cu ta consisti di hende comun bira un organisacion cu ta produci literatura cu tin un impacto grandi. E pueblo di Dios a publica algun di e publicacionnan mas traduci y distribui den historia. Y mas importante ainda, e Rey a entrena nos y motiva nos pa uza e materialnan aki pa predica e bon noticia na hende di tur nacion. Esta un privilegio nos tin di por traha hunto cu Cristo den e trabou di planta simia di e berdad y haci discipel!