Predicacion di Reino​—E Pueblo di Dios Ta Predica e Bon Noticia Rond Mundo

TA BO dia liber y bo ta preparando mainta trempan pa bay sirbishi. Bo ta sinti bo un poco cansa y ta duda un rato si bo mester bay. Esta dushi lo ta si bo keda cas sosega awe mainta! Pero bo ta haci oracion y ta dicidi di bay toch. Bo ta traha den sirbishi cu un ruman muher di edad, y su fieldad, perseverancia y bondad ta touch bo curason. Segun cu bo ta comparti e mensahe di e berdad di cas pa cas, bo ta realisa cu bo rumannan rond mundo ta compartiendo e mesun mensahe aki y ta uza e mesun literatura. Boso tur ta beneficia di e mesun entrenamento. Bo ta yega cas bek yen di animo y contento cu bo no a keda cas.

Actualmente, e trabou di predica ta e obra principal di e Reino di Dios. Hesus a profetisa cu e bon noticia lo a yega na tur parti di mundo den e ultimo dianan. (Mat. 24:14) Con e profecia ey a cumpli? Den e seccion aki, nos lo analisa ken ta participa den e trabou aki, ki metodo nan ta uza pa haci e trabou y ki materialnan nan ta uza pa predica. E trabou aki ta yuda miyones di persona rond mundo mira e Reino di Dios como un gobierno real.