Mantene Bo Entusiasmo den e Trabou di Predica

COMO sirbidor di Jehova, nos tin e honor di participa den e trabou di mas importante cu ta tumando luga awe riba Tera, esta, e actividad di predica y di haci discipel. Pero, sea cu nos ta pionero of publicador, tin biaha no ta facil pa nos mantene nos entusiasmo den sirbishi.

Por ehempel, algun publicador casi no ta haya hende pa papia cu ne ora nan ta predica di cas pa cas. Pasobra, mayoria di hende no ta na cas, y ora nan ta na cas, nan no kier scucha e mensahe di Reino of hasta nan ta rabia cu nos. Otro publicadornan tin teritorio asina grandi y productivo cu nan ta sinti cu nunca nan lo logra predica na tur hende den dje. Y algun ruman den congregacion a bira desanima pasobra nan tin añanan ta predica, pero ainda e fin no a yega.

Acaso ta un sorpresa cu tin biaha nos tin cu lucha pa no perde nos entusiasmo pa e trabou di predica? No. Nos ta biba den un mundo cu “ta den poder di e Malbado”, Satanas e Diabel. Pues, lo no ta facil pa proclama e mensahe di e Palabra di Dios den e mundo aki.—1 Juan 5:19.

Pero un cos ta sigur: No ta importa ki obstaculo bo ta confronta den sirbishi, Jehova por yuda bo vence nan. Pero kico por duna bo mas entusiasmo pa sirbishi? Laga nos considera algun sugerencia.

YUDA PUBLICADORNAN NOBO

Tur aña, miles di hende ta batisa como testigo di Jehova. Si recientemente bo a simbolisa bo dedicacion na Dios door di bautismo, sin duda lo bo kier siña di rumannan cu tin hopi mas tempo ta predica. Y si bo ta un publicador di Reino pa hopi aña caba, bo no ta kere cu lo ta bon pa bo train esnan mas nobo? Esey sigur lo duna bo gran satisfaccion.

Hesus tabata sa cu su discipelnan mester a haya guia pa nan por a bira bon maestro, y pesey el a mustra nan con nan mester predica. (Luc. 8:1) Awe tambe publicadornan nobo tin mester di yudansa pa nan bira bon maestro.

Nos no mester kere cu djis pasobra un publicador nobo ta sali den sirbishi, lo e bira un maestro capaz pa siña otro hende. E tin mester di guia personal di un maestro amabel y cariñoso. Entre e cosnan cu e publicador cu experencia tin cu siñ’e ta: (1) con pa prepara y train un presentacion, (2) con pa tene un combersacion cu un doño di cas of cu un hende riba caya, (3) con pa ofrece literatura, (4) con pa rebishita hende cu a mustra interes y (5) con pa cuminsa un estudio di Bijbel. Un publicador nobo lo por bira un bon maestro si e observa y imita e manera di siña di e publicador cu experencia. (Luc. 6:40) Ademas, e publicador cu menos experencia sin duda lo sinti su mes mas sigur si e sa cu e tin un hende banda di dje cu ta cla pa yud’e si ta necesario. Lo e beneficia tambe si bo dun’e palabranan di elogio y sugerencianan practico.—Ecl. 4:9, 10.

COMBERSA CU BO COMPAÑERO

Claro cu nos ta haci esfuerso pa papia cu e doñonan di cas, pero tin biaha e mihor combersacion cu nos tin ta cu nos compañero den sirbishi. Corda cu Hesus a manda su discipelnan bay predica “dos dos.” (Luc. 10:1) Asina nan por a anima y motiva otro. Pues, e tempo cu nos ta pasa den sirbishi di veld cu un otro ruman ta un bon chens pa nos tin “un intercambio di estimulo.”—Rom. 1:12.

Riba kico asina boso por papia? Por ehempel, bo por cont’e un bon experencia cu bo tabatin den sirbishi di veld recientemente of bo por comparti un punto interesante cu bo a siña durante bo estudio personal of estudio di famia. Bo a tende algo na reunion cu a anima bo? Papia tocante esey. Y si bo ta predicando cu un publicador cu bo no tin custumber di traha cu ne, puntr’e con el a bin den e berdad, kico a convenc’e cu esaki ta e organisacion di Jehova, ki privilegionan el a yega di tin den congregacion of ki experencianan el a pasa aden. Podise bo tambe por cont’e algun di e cosnan bunita cu bo a experencia den e berdad. Sea cual sea e reaccion di e hendenan den teritorio, ora nos ta predica hunto cu nos rumannan, nos ta haya bon chens di “sigui ... fortalece otro.”—1 Tes. 5:11.

TENE UN BON PROGRAMA DI ESTUDIO PERSONAL

Pa nos por mantene nos entusiasmo den sirbishi, nos mester tin un bon programa di estudio personal. “E esclavo fiel y prudente” ta publica informacion riba masha hopi topico. (Mat. 24:45) Pues, bo por scoge for di un gran variedad di tema. Por ehempel, un bon tema cu nos por analisa den nos estudio personal ta: Dicon e trabou di predica ta asina importante? Den e cuadro na pagina 16 nos ta haya algun motibo.

Analisa e puntonan menciona den e cuadro, ya cu nan por motiva bo pa sigui predica cu entusiasmo. Un bon proyecto di estudio personal lo ta pa busca mas motibo pakico nos mester predica. Despues, medita riba e motibonan aki y riba e textonan biblico cu ta apoya nan. Esaki sigur lo duna bo mas aprecio y entusiasmo pa e trabou di predica.

SIGUI E SUGERENCIANAN CU NOS TA HAYA

Regularmente nos ta haya sugerencia for di e organisacion di Jehova cu por yuda nos mehora nos predicacion y alcansa mas hende. Por ehempel, fuera di e trabou di cas pa cas, nos por predica via carta, telefon, riba caya of den luganan publico. Tambe nos por comparti e bon noticia cu hende informalmente of den teritorio di negoshi. Podise nos lo por haci cambio den nos bida pa nos por bay predica den teritorionan cu tin masha tiki testigo di Jehova.

Abo ta dispuesto pa purba diferente manera di predica? Bo a yega di haci esey? Hopi ruman cu a purba e sugerencianan aki a keda masha contento cu e resultadonan. Laga nos wak tres ehempel.

E prome ehempel ta tocante con pa cuminsa estudio di Bijbel. Un ruman cu yama April a dicidi di purba un sugerencia cu a sali den Nos Ministerio di Reino y a ofrece tres colega di trabou un estudio di Bijbel. Pa su sorpresa, tur tres a acepta pa studia y tambe a cuminsa asisti na e reunionnan di congregacion.

E di dos ehempel tin di haber cu lagamento di revista. Nos a ser anima pa busca personanan cu lo ta interesa den articulonan specifico cu ta sali den nos revistanan. Un superintendente di circuito na Merca a dicidi di ofrece un articulo di ¡Despertad! tocante tire di auto na e managernan di tur negoshi di tire den un cierto area. Na un otro ocasion, e cu su casa a ofrece e articulo di portada “Compronde pa Bo Dokter” na mas cu 100 oficina di dokter. E superintendente di circuito a bisa: “E bishitanan ey tabata un bon manera pa yuda hende cera conoci cu nos trabou di predica y cu nos literatura. Unabes nan a siña conoce nos un tiki, nos por a bishita nan mas biaha.”

E di tres ehempel ta trata predicacion via telefon. Un ruman cu yama Judy a manda un carta pa nos oficina principal pa gradici e rumannan pa e sugerencianan cu nan a duna pa predica via telefon. Su mama di 86 aña ta participa regularmente den e forma aki di sirbishi sagrado a pesar cu e mama tin hopi problema di salud. E mama ta masha contento pasobra el a logra haya un estudio di Bijbel na telefon cu un señora di 92 aña.

E sugerencianan cu ta sali den nos publicacionnan realmente ta duna resultado. Purba di uza nan. Nan por yuda bo mantene bo goso y entusiasmo pa sirbishi.

PONE METANAN RASONABEL

Con nos por determina si nos ta exitoso den nos trabou di predica? Wel, esey no ta depende di cuanto publicacion nos a laga, cuanto estudio nos tin ni cuanto hende nos a yuda bira un testigo di Jehova. Pensa riba Noe. Cuanto hende, fuera di su famia, el a yuda pa bira sirbidor di Jehova? Ni un. Pero esey no kiermen cu el a haci su trabou malo. Loke realmente ta conta ta pa nos ta fiel y cumpli cu e encargo cu Jehova a duna nos.—1 Cor. 4:2.

Hopi publicador di Reino ta ripara cu nan tin cu pone metanan rasonabel pa nan no perde nan entusiasmo den e trabou di predica. Kico por ta algun di e metanan aki? Den e cuadro “Pone Metanan Rasonabel” nos ta haya algun idea.

Pidi Jehova yuda bo haya maneranan pa disfruta mas di e trabou di predica y pa bo por predica cada dia mas mihor. Ora bo alcansa bo metanan, lo bo tin e goso di a logra algo y e satisfaccion di sa cu bo ta haciendo tur loke bo por pa predica e bon noticia.

Ta berdad cu predicacion di e bon noticia por ta un reto. Pero tin cosnan cu por yuda bo disfruta di bo sirbishi. Por ehempel, gosa di un intercambio di estimulo cu bo compañero di sirbishi, tene un bon programa di estudio personal, sigui e sugerencianan di e esclavo fiel y pone metanan rasonabel. Mas cu tur cos, corda cu Jehova Dios a duna bo e gran privilegio di predica e bon noticia como un di su Testigonan. (Isa. 43:10) Pues, disfruta di sirbishi y predica cu entusiasmo.