Con pa Mehora Nos Sirbishi: Train Studiantenan di Bijbel

Dicon Esey Ta Importante: Discipelnan nobo di Hesus mester siña cumpli cu “tur loke” Hesus a manda nos haci, incluso siña otro hende e berdad. (Mat. 28:19, 20) Hopi studiante di Bijbel ya ta participa den e Scol di Ministerio Teocratico y kisas ta predica informalmente na miembronan di nan famia y amigonan. Pero, segun cu nan ta haya mas aprecio pa loke nan ta siña y ta compronde cu Jehova kier pa tur hende scucha e bon noticia, kisas nan ta expresa nan deseo pa sali den sirbishi di veld. (Rom. 10:13, 14) Despues cu nan bira publicador no batisa, un bon training lo yuda nan haya confianza pa sigui progresa den sentido spiritual.—Luc. 6:40.

Con pa Haci Esaki:

Yuda e publicador nobo busca e publicacionnan cu e mester pa e trabou di predica y haci discipel. Mustr’e con abo ta organisa bo tas di sirbishi y ki publicacion bo tin den bo tas, y despues splic’e pakico nan ta den bo tas.
Hunto boso por scoge un presentacion di Nos Ministerio di Reino y practic’e. Anima e studiante pa haci e presentacion cu su mes palabra. Train algun marco di circunstancia for di e buki Skol di Ministerio, pagina 82, cu ta comun den boso teritorio. Cord’e con importante ta pa nos ta modesto den nos manera di bisti y pa nos apariencia ta representabel.—2 Cor. 6:3, 4.
Sigui train e studiante gradualmente. Mustr’e un carchi di teritorio y siñ’e con pa uza un registro di cas pa cas. Lag’e wak con bo ta haci anotacion di datonan di hende cu mustra interes. Siñ’e con pa uza tanto jw.org como e foyeto chikito Buenas nuevas para gente de todas las naciones den sirbishi. Yud’e haci rebishita.—1 Cor. 3:6.
Tene pasenshi y elogia e studiante pa e progreso cu e ta haci. (Prov. 25:11) Sea un bon ehempel. E publicador nobo lo no lubida e interes cu bo a mustra den dje ni bo celo pa sirbishi.

Purba di Haci Esaki Durante e Luna Aki:

Si bo tin un studiante cu a bira publicador, traha di cas pa cas cu ne y lag’e bay cu bo na un rebishita of un estudio di Bijbel. Si bo no tin un studiante cu ta un publicador nobo, invita un publicador cu no tin hopi experencia pa traha cu bo.