Nan A Lucha cu Sumpiña den Carni

“A wordo duna na mi un sumpiña den carni, un mensahero di Satanas pa bofta mi.”—2 CORINTIONAN 12:7.

1. Kico ta algun problema cu hende ta enfrenta awe?

BO TA luchando cu un of otro prueba continuo? Si ta asina, bo no ta bo so. Den e “temponan trabahoso” aki, Cristiannan fiel ta enfrenta oposicion intenso, problema di famia, enfermedad, ansiedad financiero, angustia emocional, morto di ser keri y otro situacionnan dificil. (2 Timoteo 3:1-5) Den algun pais, guera y scarsedad di cuminda ta menasa di caba cu bida di hopi hende.

2, 3. Ki actitud negativo e problemanan manera sumpiña cu nos ta enfrenta por causa, y con peligroso esei por ta?

² Problemanan asina por kibra un hende completamente, specialmente ora e contratiemponan presenta pareu. Tuma nota di loke Proverbionan 24:10 ta bisa: “Si bo desmaya [desanima, NW] den e dia di angustia, bo forsa ta keda limita.” Si, e desanimacion cu nos pruebanan ta causa por kita hopi di e forsa cu nos tin mester, y debilita nos determinacion pa wanta te na fin. Con asina?

³ Wel, desanimacion por pone nos perde realidadnan for di bista. Por ehempel, ta facil pa nos exagera nos dificultadnan y cuminsa haya duele di nos mes. Algun hende por bai asina leu di asta reclama Dios: “Pakico bo ta laga e cos aki pasa cu mi?” Si tal actitud negativo saca raiz den curason di un persona, esei por caba cu su goso y confiansa. Un sirbido di Dios por bira asina desanima cu e por asta stop di lucha “e bon lucha di fe.”—1 Timoteo 6:12.

4, 5. Den algun caso, kico Satanas tin di aber cu nos problemanan, y toch ki confiansa nos por tin?

⁴ Yehova Dios sigur no ta e causante di nos pruebanan. (Santiago 1:13) Algun prueba por presenta simplemente pasobra nos ta purba di ta fiel na dje. De echo, tur hende cu ta sirbi Yehova ta bira un blanco di su enemigo principal, Satanas e Diabel. Den e poco tempo cu a ked’e, “e dios [malbado] di e mundo aki” ta purba stroba ken cu ta stima Yehova di haci Su boluntad. (2 Corintionan 4:4) Satanas ta causa mas tanto sufrimento posibel pa henter e asociacion di nos rumannan rond mundo. (1 Pedro 5:9) Ta berdad cu no ta Satanas ta e causante di tur nos problemanan directamente, pero e por probecha si di e problemanan cu nos ta enfrenta pa debilita nos asta mas.

⁵ Pero maske con poderoso Satanas of su armanan por ta, nos por venc’e! Con nos por ta sigur di esei? Esei ta pasobra Yehova Dios ta bringa na nos fabor. El a percura pa su sirbidonan ta na haltura di Satanas su trikinan. (2 Corintionan 2:11) En realidad, e Palabra di Dios ta conta nos hopi tocante e pruebanan cu ta causa problema pa Cristiannan berdadero. Den e caso di apostel Pablo, Bijbel a uza e expresion “sumpiña den carni.” Pakico? Laga nos wak con e Palabra di Dios ta splica e frase ei. Despues nos lo mira cu berdad no ta nos so mester di Yehova su yudansa pa vence prueba.

Pakico Test di Fe Ta Manera Sumpiña

6. Kico Pablo tawata kier men cu “un sumpiña den carni”, y kico e sumpiña ei por tawata?

⁶ Despues cu Pablo mes a pasa den pruebanan extremo, el a skirbi bou di inspiracion: “A wordo duna na mi un sumpiña den carni, un mensahero di Satanas pa [sigui, NW] bofta mi—pa warda mi di no halsa mi mes!” (2 Corintionan 12:7) Kico Pablo tawata kier men cu e sumpiña den carni aki? Wel, un sumpiña hinca hundo bou di cuero sigur ta haci dolo. Pues e comparacion ta indica algo cu a causa Pablo dolo; sea dolo fisico, emocional, of ambos. Podise Pablo tawatin problema cu bista of un ke otro enfermedad. Tambe e sumpiña por tawatin di aber cu e personanan cu a cuestiona Pablo su credencialnan como apostel y cu no a duna mucho balor na su trabou di predica y siña. (2 Corintionan 10:10-12; 11:5, 6, 13) Loke sea tawata e caso, Pablo a keda cu e sumpiña sin por a libra su mes di dje.

7, 8. (a) Kico e expresion ‘sigui bofta’ ta indica? (b) Pakico ta vital pa nos lucha cu cualkier sumpiña cu ta molestia nos awor?

⁷ Ripara cu e sumpiña a sigui bofta Pablo. Ta interesante pa nota cu e verbo Griego cu Pablo a uza aki ta deriva for di e palabra pa “conoshi di dede.” E palabra ei ta ser uza literalmente na Mateo 26:67 y figurativamente na 1 Corintionan 4:11. Den e versiculonan ei, e ta transmiti e idea di ser bati cu mokete. En bista di Satanas su odio intenso contra Yehova y Su sirbidonan, nos por ta sigur cu Diabel a gosa masha cu un sumpiña a sigui bofta Pablo. Awe tambe Satanas ta gosa masha ora un sumpiña den carni ta molestia nos.

⁸ Pesei, mescos cu Pablo, nos tin cu sa con pa lucha cu e sumpiñanan ei. Nos bida ta depende di esei! Corda, Yehova kier pa nos biba pa semper den su mundo nobo, caminda problemanan cu ta hinca manera sumpiña lo no molestia nos mas. Pa yuda nos gana e premio maravioso aki, Dios a duna nos hopi ehempel den su Palabra santo, Bijbel, cu ta mustra con su fiel sirbidonan a hiba un lucha exitoso cu sumpiña den carni. Nan tawata hende gewoon y imperfecto, mescos cu nos. Ora nos para keto un rato na algun di e personanan aki cu ta forma parti di e ‘nubia grandi di testigonan’, esei por yuda nos ‘core e careda cu ta poni nos dilanti cu perseverancia.’ (Hebreonan 12:1) Ora nos medita riba loke nan a wanta, esei por edifica nos confiansa cu nos tambe por lucha cu cualkier sumpiña cu Satanas uza contra nos.

E Sumpiñanan Cu A Molestia Mefiboset

9, 10. (a) Di ki manera Mefiboset a haya un sumpiña den carni? (b) Ki bondad Rei David a mustra na Mefiboset, y con nos por imita David?

⁹ Tuma por ehempel Mefiboset, yiu di David su amigo Jonatan. Tempo cu Mefiboset tawatin cinco aña di edad, nan a haya noticia cu su tata, Jonatan, y su welo, Rei Saul, a ser mata. Yaya di e mucha a drenta panico. El “a coh’e y a hui bai cu ne. Y a sosode cu den su pura pa hui e mucha a cai y a bira lam.” (2 Samuel 4:4) E incapacidad aki lo mester tawata un sumpiña basta fastioso pa Mefiboset soporta segun cu e tawata crece.

¹⁰ Algun aña despues, Rei David, pa motibo di su gran amor pa Jonatan, a mustra bondad amoroso na Mefiboset. David a dun’e tur tereno di Saul y a asigna Ziba, asistent di Saul, pa cuida e tereno aki. Tambe David a bisa Mefiboset: “Lo [bo] come na mi mesa regularmente.” (2 Samuel 9:6-10) Sin duda, e bondad amoroso di David tawata un consuelo pa Mefiboset y a yuda calma e dolo di su incapacidad. Un bunita les pa nos! Nos tambe mester mustra bondad na esnan cu ta lucha cu un sumpiña den carni.

11. Kico Ziba a pretende tocante Mefiboset, pero con nos por sa cu su pretencion tawata un mentira? (Mira nota na pia di pagina.)

¹¹ Mas despues, Mefiboset tawatin cu lucha cu un otro sumpiña den carni. Su sirbido Ziba a lanta calumnia contra dje dilanti Rei David, kende tawata huyendo pa Jerusalem pa motibo di e rebelion di Absalom, yiu di David. Ziba a bisa David cu Mefiboset no tawata leal na dje pa motibo cu el a keda atras na Jerusalem cu e speransa di por haya e reinado e mes.a David a kere e calumnia di Ziba y a pasa tur Mefiboset su propiedad pa e mentiroso ei!—2 Samuel 16:1-4.

12. Con Mefiboset a reacciona riba su situacion, y con esaki ta un bon ehempel pa nos?

¹² Sinembargo, ora Mefiboset a topa David finalmente, el a conta e rei kico a sosode realmente. E tawata preparando pa join David ora Ziba a engañ’e y a ofrece pa bai na su luga. David a corigi e eror? Parcialmente. El a parti e tereno entre e dos hombernan ei. Aki atrobe tawatin un otro posibel sumpiña den carni di Mefiboset. El a keda profundamente desapunta? El a protesta contra David su decision, kehando cu esei tawata inhusto? No, humildemente el a bai di acuerdo cu e deseonan di e rei. El a enfoca mas bien riba e aspecto positivo, alegrando cu esun cu tawatin derecho di ta rei di Israel a regresa sano y salvo. En berdad Mefiboset a pone un ehempel excelente door di wanta incapacidad, calumnia y decepcion.—2 Samuel 19:24-30.

Nehemias A Lucha cu Su Pruebanan

13, 14. Ki sumpiñanan Nehemias tawatin cu soporta ora el a regresa pa reconstrui e murayanan di Jerusalem?

¹³ Pensa riba e sumpiñanan figurativo cu Nehemias tawatin cu soporta ora el a regresa e stad sin muraya di Jerusalem den siglo cinco prome cu Era Comun. El a haya un stad practicamente sin defensa, y e Hudiunan cu a repatria tawata desorganisa, desanima y impuro den bista di Yehova. Aunke Rei Artaherhes a autorisa e Hudiunan pa reconstrui e murayanan di Jerusalem, pronto Nehemias a haya sa cu su mision a lanta e repudio di e gobernantenan di e paisnan den bicindario. “A desagrada nan masha cu un hende a bin pa busca e bienestar di e yiunan di Israel.”—Nehemias 2:10.

¹⁴ E opositornan stranhero ei a haci tur loke tawata den nan poder pa para e trabou di Nehemias. Nan menasanan, engañonan, calumnia, intimidacion—inclusivo spion manda pa descurasha Nehemias—lo mester tawata manera sumpiña persistente den carni. El a sucumbi na e intriga di su enemigonan? No! El a pone pleno confiansa den Dios. E no a hala atras. Pues ora nan a caba di reconstrui e murayanan di Jerusalem finalmente, esakinan a duna un testimonio duradero di e sosten amoroso cu Yehova a duna Nehemias.—Nehemias 4:1-12; 6:1-19.

15. Ki problemanan entre e Hudiunan a aflihi Nehemias profundamente?

¹⁵ Como gobernante tambe Nehemias tawatin cu lucha cu hopi problema entre e pueblo di Dios. E dificultadnan aki tawata manera sumpiña cu a hinc’e profundamente pasobra nan a afecta e pueblo su relacion cu Yehova. Hende rico tawata exigi interes halto, y pa nan rumannan mas pober por a paga debe y tambe e belasting di Persia, nan tawatin cu entrega nan tera y asta bende nan yiunan den sclabitud. (Nehemias 5:1-10) Hopi Hudiu no tawata warda sabat ni no tawata sostene e Levitanan ni e tempel. Tambe, algun a casa cu “mohenan di Asdot, Amon y Moab.” Esei lo a causa Nehemias hopi dolo! Pero ningun di e sumpiñanan aki a pon’e entrega. Bes tras bes el a demostra di ta un apoyado celoso di e leinan husto di Dios. Mescos cu Nehemias, laga nos no permiti e conducta infiel di otro hende stroba nos di rindi sirbishi leal na Yehova.—Nehemias 13:10-13, 23-27.

Hopi Otro Personanan Fiel A Lucha

16-18. Con problema di famia a cansa Isaac, Rebeca, Hana, David y Oseas?

¹⁶ Bijbel ta contene hopi otro ehempel di hende cu a lucha cu situacionnan dificil cu tawata manera sumpiña. Un sumpiña comun tawata problemanan di famia. Esau su dos esposanan “a trece amargura den bida di Isaac y Rebeca”, mayornan di Esau. Rebeca a bisa asta cu e tawata fada cu e dos esposanan ei. (Genesis 26:34, 35; 27:46) Pensa tambe riba Hana y con su rival Penina, e otro esposa di su casa, “tawata proboc’e sin misericordia” door cu Hana tawata steril. Kisas Penina a tormenta Hana basta biaha ora nan tawata so na cas. Tambe Penina a proboc’e publicamente—sin duda den presencia di famia y amigo—ora e famia tawata asisti na e fiesta na Silo. Na moda di papia, esaki a manda e sumpiña mas hundo den carni di Hana.—1 Samuel 1:4-7.

¹⁷ Mira kico David a pasa aden pa motibo di e yalursheid absurdo di su suegro, Rei Saul. Pa scapa su bida, David a hay’e forsa ta bai biba den cueba den e desierto di Engedi, caminda e tawatin cu subi pasa riba barancanan stijl y peligroso. E inhusticia lo mester a molesti’e bastante pasobra e no a haci Saul nada malo. Toch, pa añanan largo David tawatin cu biba na careda. Y tur esei pa motibo cu Saul tawata yalurs.—1 Samuel 24:14, 15; Proverbionan 27:4.

¹⁸ Imagina e problemanan di famia cu a cansa profeta Oseas. Su esposa tawata un mohe adultero. Esaki su inmoralidad lo mester tawata manera sumpiña hinca den su curason. Y cuanto mas angustia lo e mester a sufri ora su esposa a haya dos yiu ilegitimo como resultado di su fornicacion!—Oseas 1:2-9.

19. Ki persecucion profeta Micaya tawatin cu soporta?

¹⁹ Un otro sumpiña den carni ta persecucion. Tuma por ehempel e experencia di profeta Micaya. Ora Micaya a mira e rei malbado Acab rondona su mes cu profeta falso y kere nan mentiranan flagrante, esei lo mester a tormenta su alma husto. Anto, ora Micaya a bisa Acab cu tur e profetanan ei tawata papia pa medio di “un spirito di mentira”, kico e lider di e gañadonan ei a haci? Imagina bo, el a “dal Micaya na su banda di cara”! Ora Yehova a spierta Acab cu e campaña pa recobra Ramot-galad tawata destina pa fracasa, Acab su reaccion tawata piyo ainda. El a laga cera Micaya den prizon y a dun’e masha poco di come. (1 Reinan 22:6, 9, 15-17, 23-28) Corda tambe riba Jeremias y e manera cu su persiguidonan asesino a trat’e.—Jeremias 20:1-9.

20. Ki sumpiñanan Noemi tawatin cu wanta, y den ki manera el a ser recompensa?

²⁰ Morto di un ser keri ta otro situacion dificil cu por ta manera un sumpiña den carni. Noemi tawatin cu wanta e perdida penoso di su casa y su dos yiu hombernan. Ora el a regresa Betlehem, ainda e golpinan devastador ei tawata haci dolo. El a bisa su amigonan pa no yam’e Noemi sino Mara, un nomber cu a refleha e amargura di su experencianan. Pero finalmente, Yehova a recompens’e pa su aguante cu un nieto cu a bira parti di e liña di desendencia cu a hiba na Mesias.—Rut 1:3-5, 19-21; 4:13-17; Mateo 1:1, 5.

21, 22. Cuanto perdida Job a sufri, y con el a reacciona?

²¹ Pensa con geshock Job lo mester a keda ora el a tende di e morto repentino y violento di su dies yiunan stima, y riba dje, e perdida di tur su crio di bestia y su sirbidonan. Di un ora pa otro, henter su mundo a parce di basha den otro! Anto, mientras Job tawata zonza ainda di e golpinan aki, Satanas a dal e cu enfermedad. Casi sigur Job a pensa cu e enfermedad maligno aki lo a mat’e. Su dolo a bira asina insoportabel cu el a pensa cu morto lo tawata un alivio.—Job 1:13-20; 2:7, 8.

²² Como si fuera tur esaki no tawata basta, su esposa, den su tristesa y angustia, a bini cerca dje y grit’e: “Maldiciona Dios y muri!” Esei si tawata un sumpiña den su carni yen di dolo! Despues, en bes di Job su tres compañeronan consol’e, nan a atac’e cu rasonamento falso, acusand’e di a comete pica den secreto y insinuando cu esei tawata e motibo di su calamidad. Nan argumentonan eroneo a manda e sumpiñanan, na manera di papia, mas y mas hundo den su carni. Corda tambe cu Job no tawata sa pakico e tawata pasa den e cosnan teribel aki; ni e no tawata sa si lo el a keda na bida of no. Toch, “den tur esaki Job no a peca ni e no a culpa Dios.” (Job 1:22; 2:9, 10; 3:3; 14:13; 30:17) Aunke hopi sumpiña a hinc’e pareu, nunca el a bandona su caminda di integridad. Ki un animacion pa nos!

23. Con bin e personanan fiel cu nos a caba di considera por a soporta varios sumpiña den carni?

²³ Esakinan tawata djis algun ehempel. Bijbel ta contene hopi mas ehempel. Cada un di e fiel sirbidonan aki tawatin cu lucha cu nan propio sumpiñanan figurativo. Y ta un gran variedad di problema nan a enfrenta! Toch, nan tawatin algo en comun. Ningun di nan a bandona nan sirbishi na Yehova. Apesar di nan pruebanan angustioso, nan a vence Satanas cu e forsa cu Yehova a duna nan. Con asina? E siguiente articulo lo contesta e pregunta aki y mustra con nos tambe por enfrenta tur loke ta manera un sumpiña den nos carni.

[Nota]

Con Lo Bo Contesta?

• Pakico nos por compara e problemanan cu nos ta enfrenta cu sumpiña den carni?

• Kico tawata algun di e sumpiñanan cu Mefiboset y Nehemias mester a wanta?

• Den e ehempelnan biblico di homber- y mohenan cu a wanta varios sumpiña den carni, cua di nan bo ta haya specialmente conmovedor y pakico?

[Plachi na pagina 15]

Mefiboset tawatin cu lucha cu incapacidad, calumnia y decepcion

[Plachi na pagina 16]

Nehemias a persevera apesar di oposicion