Informe di Proclamadonan di Reino
Yudansa pa Sigui Trata Sanger Como Algo Sagrado
ROND mundo sirbidonan di Yehova a demostra nan lealtad na Dios relaciona cu e santidad di sanger. (Echonan 15:28, 29) E clase di esclabo fiel y prudente a percura yudansa pa e hermandad cristian. (Mateo 24:45-47) Laga nos wak kico tawata e resultadonan na Filipinas.
E sucursal di Filipinas ta informa: “Na 1990 nos a ser informa cu representantenan di Betel Brooklyn lo tene un seminario aki na Filipinas. Rumannan for di varios sucursal di Asia a ser invita, entre cua tawatin Corea, Taiwan y Hong Kong. E proposito tawata pa yuda nan cuminsa cu un Servicio di Informacion di Hospital na nan respectivo sucursalnan y tambe forma Comitenan di Contacto cu Hospital. Aki na Filipinas, na prome instante nos a forma comite den e cuater ciudadnan principal.” E comitenan lo a haci esfuerso pa localisa docternan cu ta dispuesto pa coopera cu nos relaciona cu nos posicion como cristian encuanto sanger. Tambe nan lo a yuda rumannan ora cu surgi dificultad relaciona cu sanger.
Un di e rumannan cu a ser selecta pa sirbi den e Comite di Contacto cu Hospital na Baguio tawata Remegio. Segun cu tempo tawata pasa, docternan a cuminsa mira importancia di e servicio aki. Remegio ta corda un ocasion cu un cantidad di docter a reuni cu un Comite di Contacto cu Hospital pa haya sa con pa trata cu pashentnan Testigo cu a nenga sanger. Remegio a bisa: “E docternan a cuminsa haci pregunta, pero mi a sinti mi frustra pasobra nan preguntanan tawata masha tecnico.” El a haci oracion pidi Yehova yud’e trata cu e problema aki. Remegio a sigui bisa: “Despues di cada pregunta, otro docternan a hisa man y conta con nan a trata cu un situacion similar.” Remegio a keda contento cu e yudansa, specialmente pasobra e sesion di pregunta y contesta a dura dos ora largo.
Awor tin 21 comite den henter e pais, y tin un total di 77 ruman ta sirbi den nan. Danilo, un Testigo cu ta docter a bisa: “Docternan ta realisa cu nan pashentnan Testigo tin apoyo di un organisacion cu ta percura amorosamente pa nan.” Tawatin un docter cu na principio a basila pa opera un ruman homber sin transfusion di sanger. Sinembargo, e ruman a para firme. E operacion a tuma luga y e tawata un exito. Servicio di Informacion di Hospital ta informa: “E docter a keda asombra pa e manera cu e ruman homber a recupera. El a bisa: ‘Basa riba loke a sosode aki, si cualkier di boso miembronan tin cu haci e tipo di operacion aki sin uza sanger, gustosamente lo mi hacie.’”