Unda Nos Por Haya Berdadero Consuelo?
“E Dios y Tata di nos Señor Hesucristo . . . ta consola nos den tur nos afliccion.”—2 CORINTIONAN 1:3, 4.
1. Ki circunstancianan por pone hende sinti un gran necesidad pa consuelo?
ENFERMEDAD debilitante por pone un hende sinti cu tur cos a caba p’e. Temblor, tormenta y hamber ta laga hende den miseria. Guera por resulta den morto di miembro di famia, por destrui cas of obliga e habitantenan pa bandona nan propiedad y hui bai otro caminda. Inhusticia por pone hende sinti cu no tin ningun caminda cu nan por bai busca alivio. Victimanan di e calamidadnan ei mester di hopi consuelo. Unda nan por haya esei?
2. Pakico e consuelo di Yehova ta algo unico?
2 Algun persona individual y tambe organisacion ta trata na ofrece consuelo. Un palabra bondadoso ta cos di aprecia. Esfuersonan pa duna alivio material ta satisface e necesidadnan di termino cortico. Pero ta Yehova so, e Dios berdadero, por drecha tur daño y duna e clase di yudansa cu ta necesario pa e calamidadnan ei no sosode nunca mas. Bijbel ta bisa di Dios: “Bendiciona sea e Dios y Tata di nos Señor Hesucristo, e Tata di misericordianan y Dios di tur consuelo, kende ta consola nos den tur nos afliccion, pa asina nos tambe por consola esnan cu ta den cualke afliccion cu e mesun consuelo cu Dios a consola nos cu ne.” (2 Corintionan 1:3, 4) Con Yehova ta consola nos?
E Causa Fundamental di Nos Problemanan
3. Con e consuelo cu Dios ta duna ta yega na raiz di e problemanan di humanidad?
3 Henter e famia humano a hereda imperfeccion como resultado di e pica di Adam, y esei ta causa cantidad di problema cu finalmente ta hiba na morto. (Romanonan 5:12) E echo cu Satanas e Diabel ta “e prins di e mundo aki” ta haci e situacion piyo. (Huan 12:31; 1 Huan 5:19) Yehova no a limita su mes na djis expresa duele pa e condicion desafortuna di humanidad. El a manda su Yiu unigenito como rescate pa libra nos, y El a bisa nos cu nos por haya alivio for di e efectonan di e pica di Adam si nos kere den Su Yiu. (Huan 3:16; 1 Huan 4:10) Tambe Dios a profetisa cu Hesucristo, kende a ser confia cu tur autoridad den shelo y riba tera, lo destrui Satanas y henter su mundo malbado.—Mateo 28:18; 1 Huan 3:8; Revelacion 6:2; 20:10.
4. (a) Kico Yehova a percura pa fortalece nos confiansa den su promesanan di trece alivio? (b) Con Yehova ta yuda nos saca afo ki tempo e alivio lo yega?
4 Pa fortalece nos confiansa den su promesanan, Dios a laga skirbi masha hopi prueba di cu tur loke E profetisa ta tuma luga. (Hosue 23:14) El a inclui den Bijbel un registro di loke El a haci pa libra su sirbidonan di situacionnan cu for di un punto di bista humano tawata imposibel pa sali for di dje. (Exodo 14:4-31; 2 Reinan 18:13–19:37) Y mediante Hesucristo, Yehova a demostra cu su proposito ta pa, entre otro, cura hende di “tur sorto di enfermedad” y asta resusita e mortonan. (Mateo 9:35; 11:3-6) Ki tempo tur esaki lo tuma luga? Bijbel ta contesta esei dunando un descripcion di e ultimo dianan di e sistema bieu aki, cu lo habri caminda pa e shelo nobo y tera nobo di Dios. Hesus su descripcion ta cuadra cu e tempo den cua nos ta biba.—Mateo 24:3-14; 2 Timoteo 3:1-5.
Consuelo pa un Pueblo den Angustia
5. Ora Yehova a consola Israel di pasado, na kico El a dirigi nan atencion?
5 Na e manera cu Yehova a trata cu e nacion di Israel di pasado, nos ta siña con El a consola nan den tempo di angustia. El a recorda nan ki clase di Dios E ta. Esaki a fortalece nan confiansa den su promesanan. Yehova a laga su profetanan presenta e contrastenan skerpi cu tin entre E como e Dios bibo y berdadero y e imagennan di diosnan falso, cu no por a yuda ni nan mes ni esnan cu ta adora nan. (Isaias 41:10; 46:1; Yeremias 10:2-15) Ora Yehova a bisa Isaias, “Consola, o consola mi pueblo”, El a inspira su profeta pa uza ilustracion y descripcion di Su obranan di creacion pa por a enfatisa con grandi E ta como e unico Dios berdadero.—Isaias 40:1-31.
6. Ki indicacionnan Yehova a yega di duna encuanto e tempo cu lo El a trece liberacion?
6 Na algun ocasion, Yehova a consola su pueblo door di indica e tempo cu lo El a libra nan, sea riba un termino hopi cortico of riba un termino mas largo. Segun cu e liberacion for di Egipto a yega serca, El a bisa e Israelitanan oprimi: “Un plaga mas lo Mi trece riba Farao y riba Egipto; despues di esei e lo laga boso bai for di akinan.” (Exodo 11:1) Ora un aliansa di tres nacion a invadi Huda den e dianan di Rei Josafat, Yehova a bis’e cu “mañan” lo E interveni na fabor di nan. (2 Cronicanan 20:1-4, 14-17) Di otro banda, Isaias a skirbi casi 200 aña di antemano di nan liberacion for di Babilonia, y Yehova a duna mas detaye mediante Yeremias, casi shen aña prome cu e liberacion a tuma luga. E profecianan ei tawata un gran animacion pa sirbidonan di Dios segun cu e tempo pa nan liberacion tawata acercando!—Isaias 44:26–45:3; Yeremias 25:11-14.
7. Kico e promesanan di liberacion a contene hopi bes, y con esaki a influencia hende fiel den Israel?
7 Ta notabel cu e promesanan cu a consola e pueblo di Dios hopi bes a contene informacion tocante e Mesias. (Isaias 53:1-12) Di generacion pa generacion esaki a trece speransa pa hende fiel segun cu nan a enfrenta varios prueba. Na Lucas 2:25 nos ta lesa: “Mira, tawatin un homber na Herusalem cu yama Simeon; y e homber aki tawata husto y deboto y tawata spera e consolacion di Israel [of, consuelo; realmente, e binida di e Mesias]; y spirito santo tawata riba dje.” Simeon tawata sa di e speransa di un Mesias cu e Scritura a trece dilanti, y henter su bida el a biba den espectativa di su cumplimento. E no a compronde con tur cos lo a cumpli, y e mes no a biba pa mira e salbacion profetisa bira realidad, pero el a alegra si ora el a identifica Esun cu Dios lo a trece como “salbacion.”—Lucas 2:30.
Consuelo Mediante Cristo
8. Con nos por compara e yudansa cu Hesus a duna cu loke hopi hende a pensa cu nan tawatin mester?
8 Tempo cu Hesucristo a cumpli cu su ministerio aki riba tera, no ta semper el a duna e yudansa cu e hendenan a pensa cu nan tawatin mester. Algun a anhela un Mesias cu lo a libra nan for di e dominacion di Roma cu nan a odia. Pero Hesus no a boga pa revolucion; el a bisa nan pa “duna Cesar loke ta di Cesar.” (Mateo 22:21) E proposito di Dios a encera mucho mas cu libra hende for di dominio di un regimen politico. E pueblo kier a haci Hesus rei, pero Hesus a bisa cu lo e duna “su bida como prijs di rescate pa hopi.” (Mateo 20:28; Huan 6:15) Ainda no tawata tempo pa e bira rei, y ta Yehova mester a pasa e autoridad di goberna p’e, no un grupo di hende malcontento.
9. (a) Kico tawata e mensahe di consuelo cu Hesus a proclama? (b) Con Hesus a demostra e importancia di e mensahe pa e situacionnan cu e hendenan tawata enfrenta personalmente? (c) Hesus su ministerio a pone un base pa kico?
9 E consuelo cu Hesus a trece tawata parti di “e bon nobo di e reino di Dios.” Esaki tawata e mensahe cu Hesus a proclama unda cu el a bai. (Lucas 4:43, NW) El a enfatisa con importante e mensahe ei ta pa e problemanan diario di hende door di demostra kico e como e Gobernante Mesianico lo haci pa humanidad. Hesus a duna su compatriotanan cu tawata sufri, gana di biba atrobe door di cura esnan cu tawata ciego y mudo (Mateo 12:22; Marco 10:51, 52), cura esnan mancaron (Marco 2:3-12), purificando nan di malesanan repugnante (Lucas 5:12, 13) y aliviando nan di otro enfermedadnan grave. (Marco 5:25-29) El a trece gran alivio pa mayornan tristo door di lanta nan yiunan for di morto. (Lucas 7:11-15; 8:49-56) El a demostra cu e tin e poder pa domina tormentanan peligroso y pa satisface e necesidad di cuminda pa grupo grandi di hende. (Marco 4:37-41; 8:2-9) Ademas, Hesus a siña nan e principionan di bida cu por a yuda nan trata di un manera eficas cu problemanan existente y cu lo a yena curason di hende cu speransa pa un gobernacion husto bou di e Mesias. Pues, segun cu Hesus a cumpli cu su ministerio, no solamente el a consola esnan cu a scucha cu fe sino tambe el a pone un base pa anima hende durante dos mil aña mas.
10. Kico a bira posibel como resultado di e sacrificio di Hesus?
10 Mas cu 60 aña despues cu Hesus a sacrifica su bida humano y resusita pa bida celestial, Dios a inspira apostel Huan pa e skirbi: “Mi yiu chikitonan, mi ta skirbi boso e cosnan aki pa boso no haci pica. Y si un hende haci pica, nos tin un abogado serca e Tata, Hesucristo, e husto; y e mes ta e propiciacion pa nos picanan, y no pa di nos so, ma tambe pa esnan di henter mundo.” (1 Huan 2:1, 2) E beneficionan di e sacrificio humano perfecto di Hesus ta duna nos gran consuelo. Nos sa cu nos por haya pordon pa pica, un consenshi limpi, un relacion aproba cu Dios y e chens di biba pa semper.—Huan 14:6; Romanonan 6:23; Hebreonan 9:24-28; 1 Pedro 3:21.
Spirito Santo Como Consolador
11. Ki otro percuracion pa consuelo Hesus a priminti prome cu su morto?
11 E ultimo anochi cu Hesus a pasa cu su apostelnan prome cu su morto como sacrificio, el a papia tocante un cos mas cu su Tata celestial a percura pa consola nan. Hesus a bisa: “Lo mi pidi e Tata, y E lo duna boso un otro consolador [Griego, pa·rá·kle·tos], pa e keda serca boso pa semper, esta, e spirito di berdad.” Hesus a garantisa nan: “E consolador, spirito santo, . . . lo siña boso tur cos y haci boso recorda tur loke mi a bisa boso.” (Huan 14:16, 17, 26) Con realmente spirito santo a consola nan?
12. Con e papel di spirito santo como yudansa pa e memoria di Hesus su disipelnan a yuda trece consuelo pa hopi hende?
12 Hesus a siña su apostelnan masha hopi cos. Hamas nan lo a lubida e experencia ei, pero realmente nan lo a corda tur loke el a bisa? Instruccionnan importante lo a bai perdi pa motibo di nan memoria imperfecto? Hesus a sigura nan cu spirito santo lo ‘haci nan recorda tur loke el a bisa nan.’ Di manera cu rond di ocho aña despues di e morto di Hesus, Mateo por a skirbi e prome Evangelio, den cua el a registra Hesus su Sermon Riba Sero (un discurso masha conmovedor), su hopi ilustracionnan relaciona cu e Reino, y su splicacion detaya di e señal di su presencia. Mas cu 50 aña despues, apostel Huan por a skirbi un relato confiabel cu detayenan extenso tocante e ultimo dianan di Hesus su bida riba tera. E registronan inspira aki a resulta di ta un tremendo animacion te den nos tempo!
13. Con spirito santo a sirbi como maestro pa e prome cristiannan?
13 Fuera di simplemente yuda nan recorda e palabranan di Hesus, spirito santo a siña e disipelnan y guia nan na un miho comprondemento di e proposito di Dios. Mientras cu Hesus tawata cu su disipelnan ainda, el a bisa nan cosnan cu e tempo ei nan no a compronde mucho bon. Sinembargo, mas despues, bou di guia di spirito santo Huan, Pedro, Santiago, Hudas y Pablo a skirbi cartanan pa splica con e proposito di Dios a desaroya mas aleu. Den e forma ei spirito santo a sirbi como un maestro, dunando e garantia balioso di cu ta Dios a dirigi nan.
14. Den ki maneranan spirito santo a yuda e pueblo di Yehova?
14 E donnan milagroso di spirito tambe a yuda mustra bon cla cu Dios a transferi su fabor for di Israel carnal pa e congregacion cristian. (Hebreonan 2:4) Manifestacion di fruta di e spirito ei den bida di hende tambe tawata un factor importante pa identifica esnan cu di berdad tawata disipel di Hesus. (Huan 13:35; Galationan 5:22-24) Y tambe e spirito a fortalece e miembronan di e congregacion ei pa nan bira testigonan yen di curashi y sin miedo.—Echonan 4:31.
Yudansa na Momento di Presion Severo
15. (a) Ki presion cristiannan tanto di pasado como presente a enfrenta? (b) Pakico tin biaha esnan cu ta duna animacion mes tin mester di dje?
15 Tur persona cu ta dedica na Yehova y cu ta leal na dje ta haya nan cu un of otro clase di persecucion. (2 Timoteo 3:12) Sinembargo, hopi cristian a haya nan bou di presion sumamente severo. Den tempo moderno, gruponan violento a persigui algun cristian y sera nan bou di condicionnan inhumano den campo di consentracion, prizon y campo di trabou forsa. Gobiernonan mes a cuminsa persigui nan, of a laga elementonan sin escrupulo comete barbaridadnan contra nan sin haya castigo. Ademas, cristiannan a enfrenta problemanan grave di salu of crisis serio den famia. Tambe un cristian maduro cu ta yuda hopi di su rumannan den fe trata cu situacionnan dificil, por haya su mes bou di basta presion. Den e tipo di casonan ei, kisas esun cu ta duna animacion tambe tin mester di animacion.
16. Ora David tawata bou di gran presion, ki yudansa el a ricibi?
16 Ora Rei Saul tawata persigui David pa mat’e, David a acudi na Dios como su Ayudante: “O Dios, tende mi oracion”, el a roga. “Den e sombra di bo halanan lo mi tuma refugio.” (Salmo 54:2, 4; 57:1) David a ricibi yudansa? Si, por cierto. Durante e periodo ei, Yehova a uza profeta Gad y sacerdote Abiatar pa duna guia na David, y El a uza Yonatan yiu di Saul pa encurasha e mucha homber aki. (1 Samuel 22:1, 5; 23:9-13, 16-18) Tambe Yehova a permiti e Filisteonan invadi e tera, y esei a stroba Saul di sigui persigui David.—1 Samuel 23:27, 28.
17. Ora Hesus tawata bou di presion intenso, na unda el a acudi pa yudansa?
17 Hesucristo mes tawata bou di gran presion ora e fin di su bida riba tera tawata yegando serca. E tawata plenamente conciente di e manera cu su conducta por a afecta e nomber di su Tata celestial y kico esei lo por a nifica pa e futuro di henter humanidad. El a haci oracion sinsero, y asta a drenta un “ansha.” Dios a haci sigur cu Hesus a ricibi e sosten cu e tawatin mester durante e tempo dificil ei.—Lucas 22:41-44.
18. Ki consuelo Dios a duna e prome cristiannan cu a ser persigui severamente?
18 E persecucion di cristiannan despues cu e congregacion di prome siglo a ser funda tawata asina feros cu tur e disipelnan di Hesus, cu excepcion di e apostelnan, a ser plama for di Herusalem. Homber y mohe a ser lastra literalmente for di nan cas. Ki consuelo Dios a duna nan? Esei tawata e siguransa di su Palabra cu nan tawatin “un miho pocesion y un cu ta permanece”, un herencia garantisa den shelo hunto cu Cristo. (Hebreonan 10:34; Efesionan 1:18-20) Segun cu nan a sigui predica, nan a mira evidencia cu e spirito di Dios tawata cu nan, y nan experencianan a duna nan mas motibo pa alegra.—Mateo 5:11, 12; Echonan 8:1-40.
19. Aunke Pablo a sufri persecucion severo, con el a sinti tocante e consuelo cu Dios ta duna?
19 Cu tempo, Saul (Pablo), kende anteriormente tawata un persiguido violento, a bira e blanco di persecucion pa motibo cu el a bira un cristian. Riba e isla di Cyprus tawatin un hacido di bruha cu a purba stroba Pablo su ministerio uzando engaño y malicia. Na Galacia, nan a piedra Pablo te ora nan a kere cu el a muri. (Echonan 13:8-10; 14:19) Na Macedonia nan a sut’e cu bara. (Echonan 16:22, 23) Despues di a soporta maltrato violento na man di un multitud na Efeso, el a skirbi: “Nos tawatin un carga masha pisa mes, mas cu nos por a soporta, asina cu asta nos tawata desespera di nos bida; si, nos tawatin e sentencia di morto den nos mes.” (2 Corintionan 1:8, 9) Pero den e mesun carta ei, Pablo a skirbi e palabranan di consuelo menciona den paragraf 2 di e articulo aki.—2 Corintionan 1:3, 4.
20. Kico nos ta bai considera den e siguiente articulo?
20 Con abo tambe por consola otro hende? Tin hopi ruman den nos tempo cu mester di consuelo ora nan ta sinti nan tristo, sea pa motibo di un calamidad cu ta afecta miles di hende of pa motibo di tribulacion cu ta aflihi solamente nan. Den e siguiente articulo, nos lo considera con nos por duna consuelo den ambos caso.
Bo Ta Corda?
• Pakico e consuelo di Dios ta miho cu esun di cualkier otro fuente?
• Ki consuelo nos ta haya mediante Cristo?
• Con e spirito santo a resulta di ta un consolador?
• Duna ehempel di e consuelo cu Dios ta percura ora su sirbidonan ta pasa den prueba severo.
[Plachi na pagina 15]
Bijbel ta mustra nos cu Yehova a consola su pueblo door di libra nan
[Plachi na pagina 16]
Hesus a duna consuelo door di siña otronan, door di cura hende y door di resusita e mortonan
[Plachi na pagina 18]
Hesus a ricibi yudansa for di ariba