Informe di Proclamadonan di Reino

“Esaki Si Ta Nobo pa Mi!”

DOROTA, un predicado di tempo completo di Testigonan di Yehova na Polonia, a compaña su yiu homber di 14 aña na un chekeo rutinario na e clinica di scol. Durante e examinacion, e docter, Janina,a a puntra Dorota con ta bai cu e yiu su tareanan di cas.

“Ora mi no por, mi yiu ta prepara cena pa nos tur seis den cas”, Dorota a contesta. “Tambe e ta limpia cas y yuda drecha cos rond di cas. E ta gusta lesa y e ta un bon studiante.”

“Esaki ta increibel”, Janina a contesta. “Mi tin 12 aña ta traha aki, y nunca mi a yega di tende un cos asin’aki.”

Mirando cu esaki tawata un oportunidad pa duna testimonio, Dorota a splic’e: “Awe hopi mayor no ta dunando nan yiunan e educacion adecua. Pesei hopi bes nan yiunan tin masha poco balor propio.”

“Con bo por sa tur e cosnan aki?” Janina a puntra. “Mayoria mayor no tin ningun idea di e cosnan aki.”

“Bijbel ta un fuente precioso di e tipo di informacion ei”, Dorota a contest’e. “Por ehempel, di acuerdo cu Deuteronomio 6:6-9, educacion di nos yiunan ta cuminsa cu educacion di nos mes. E balornan cu nos kier inculca den nos yiunan no mester ta den nos mes mente y curason prome?”

“Esaki ta increibel”, Janina a remarca. “Esaki ta increibel!” Anto el a puntra Dorota con Bijbel a yud’e lanta su yiunan y educa nan.

“Nos ta studia Bijbel tur siman cu nos yunan”, Dorota a splic’e. “Nos ta uza un buki cu yama Loke hovenan sa puntra—Contesta práctica.”b Anto Dorota a sigui cont’e di e buki y a menciona algun di e temanan cu e ta trata.

“Esaki si ta nobo pa mi!” Janina a sclama. “Mi por a wak e buki ei?”

Un ora despues, Dorota a regresa cu e buki.

“Ki religion boso ta?” Janina a puntra, segun cu e tawata tira un bista den e buki.

“Ami ta un Testigo di Yehova.”

“Con Testigonan di Yehova ta trata hende di otro religion?”

“Mescos cu ami ta trata docter—cu respet”, Dorota a contest’e, anto el a agrega: “Di mes, nos tin gana pa nan haya sa e berdad di Bijbel.”

“Ya caba mi ta sinti mi mucho mas miho”, Janina a confesa.

Na fin di su bishita, Dorota a anima Janina masha pa lesa Bijbel. “Bo bida lo haya nificacion y esei lo yuda bo den bo trabou.”

“Bo a echt duna mi smak pa haci esei”, Janina a admiti.

Cu tacto y determinacion, Dorota a probecha bon di un bishita di rutina na oficina di docter pa duna un tremendo testimonio.—1 Pedro 3:15.

[Nota]