Pregunta di Lector

Ki guia Bijbel ta duna tocante educacion di yiu ora un mayor ta Testigo di Yehova y e otro no?

Tin dos principio biblico basico cu ta duna guia tocante educacion di yiu na un mayor Testigo cu ta casa cu un persona cu no ta Testigo. Uno ta: “Nos mester obedece Dios mas cu hende.” (Echonan 5:⁠29) E otro ta: “E esposo ta cabes di e esposa, mescos cu Cristo tambe ta cabes di e iglesia.” (Efesionan 5:23) E ultimo principio ei no ta conta solamente pa esposanan cu tin un esposo Testigo, sino tambe pa esnan cu nan casa no ta Testigo. (1 Pedro 3:1) Con un mayor Testigo por cumpli cu tur e dos principionan aki na un manera balansa ora e ta educa su yiunan?

Si e esposo ta un Testigo di Yehova, e ta responsabel pa percura tanto spiritualmente como materialmente pa su famia. (1 Timoteo 5:8) Aunke e mama cu no ta Testigo ta pasa mas tanto tempo cu nan yiunan, e tata Testigo mester siña su yiunan door di duna nan educacion religioso na cas y door di hiba nan reunionnan cristian, caminda nan lo beneficia di instruccion moral y bon asociacion.

Kico si e esposa cu no ta Testigo ta insisti pa hiba nan yiunan na su misa of siña nan su creencianan? Kisas e lei di e pais ta dun’e e derecho di haci esei. Si e tata ta duna e muchanan bon educacion spiritual, e chens ta grandi cu nan no ta sinti nan inclina pa participa den actonan di adoracion den luganan asina. Segun cu e muchanan ta bira mas grandi, e educacion biblico di nan tata mester yuda nan sigui e berdad di e Palabra di Dios. E tata Testigo lo keda hopi contento si su yiunan dicidi di tuma nan posicion na fabor di e berdad!

Si ta e mama ta un Testigo di Yehova, e tin cu respeta e principio cu ta e tata ta cabes di famia mientras e como un Testigo mester ta interesa den e bienestar eterno di su yiunan. (1 Corintionan 11:3) Den hopi caso, e esposo lo no tin nada contra si su esposa Testigo ta duna nan yiunan educacion moral y spiritual, y e reunionnan di e pueblo di Yehova ta yuda nan ricibi mas di e tipo di educacion aki. E mama por yuda su casa mira cua ta e beneficionan di e educacion constructivo cu nan yiunan ta ricibi mediante e organisacion di Yehova. Uzando tacto, e por enfatisa e balor di inculca e principionan moral di Bijbel den nan yiunan, ya cu e muchanan ta confronta un mundo cu cada bes ta bai mas patras den sentido moral.

Sinembargo, e esposo cu no ta Testigo kisas ta insisti pa su yiunan sigui su religion, y ta hiba nan na su misa y ta duna nan educacion religioso segun su fe. Of un esposo por ta contra tur religion y no kier mes pa su yiunan ricibi ningun educacion religioso. Como cabes di e famia, e ta esun principalmente responsabel pa tuma e decision ei.a

Aunke un esposa creyente ta respeta su casa como cabes di famia, como un cristian dedica e mester corda riba e actitud cu apostel Pedro y Huan tawatin, kendenan a bisa: “Nos no por laga di papia loke nos a mira y tende.” (Echonan 4:​19, 20) Como muestra di su interes den e bienestar spiritual di e muchanan, un mama Testigo lo busca oportunidad pa duna nan guia moral. E tin un responsabilidad dilanti Yehova pa siña otro hende loke e sa di e berdad, y esei ta inclui su yiunan. (Proverbionan 1:⁠8; Mateo 28:​19, 20) Con e mama Testigo por trata cu e dilema aki?

Tuma por ehempel e asunto di kere den Dios. E esposa Testigo kisas no por tin un studio di Bijbel formal cu su yiunan pasobra su casa ta prohibi esei. Esaki kiermen cu e tin cu evita di papia cu su yiunan tocante Yehova? No. Su palabranan y su accionnan di mes lo refleha cu e ta kere den e ­Creador. Su yiunan sin duda lo tin pregunta riba e topico ei. E mester sintie liber pa eherce su libertad di religion door di expresa su creencia den e Creador, incluso na su yiunan. Asta si e no por conduci un studio di Bijbel cu e muchanan of hiba nan reunion cu regularidad, e por siña nan conoce Yehova Dios.​—⁠Deuteronomio 6:⁠7.

Apostel Pablo a skirbi lo siguiente tocante e relacion entre un Testigo y su casa incredulo: “E esposo cu no ta un creyente ta santifica door di su esposa, y e esposa cu no ta un creyente ta santifica door di su esposo cu ta un creyente; pasobra di otro manera boso yiunan ta impuro, ma awor nan ta santo.” (1 Corintionan 7:14) Yehova ta considera e union matrimonial como santo debi na e casa creyente, y e yiunan ta ser considera santo den bista di Yehova. E esposa Testigo mester haci tur loke ta posibel bou dje sircunstancianan ei pa yuda su yiunan comprende e berdad, lagando e resultado final den man di Yehova.

Segun cu e muchanan ta bira grandi, nan tin cu dicidi ki posicion nan lo tuma basa riba e informacion cu nan a ricibi for di nan mayornan. Nan por dicidi di actua di acuerdo cu e palabranan di Hesus: “Esun cu stima tata of mama mas cu mi, no ta digno di mi.” (Mateo 10:⁠37) Tambe Bijbel ta manda nan: “Yiunan, obedece boso mayornan den Señor.” (Efesionan 6:⁠1) Hopi hoben a dicidi di “obedece Dios” en bes di un mayor cu no ta Testigo, apesar di cu esaki a pone nan sufri dificultad na man di e mayor ei. Ki un gran recompensa pa e mayor Testigo ora e mira su yiunan dicidi di sirbi Yehova apesar di oposicion!

[Nota]