Un Relato Cu Ta Inspira Fe y Curashi—Testigonan di Yehova na Ucrania

MESCOS cu cristiannan di prome siglo, awe tambe e pueblo di Dios ta haya nan cu persecucion. (Mateo 10:22; Huan 15:20) Den masha poco pais e rumannan a haya nan cu persecucion asina tanto tempo of asina intenso manera na Ucrania, caminda e trabou di predica e Reino tawata prohibi pa 52 aña largo.

E Anuario 2002 di Testigonan di Yehova ta conta e relato di e pueblo di Dios den e pais ei. E ta un relato di fe, curashi y fortalesa apesar di condicionnan sumamente dificil. Aki ta sigui algun comentario di elogio y gratitud cu e oficina di sucursal di Testigonan di Yehova na Ucrania a ricibi:

“Mi a caba di lesa e Anuario 2002. Mi wowo a yena cu awa ora mi tawata lesa tocante boso actividad na Ucrania. Mi kier pa boso sa cu boso ehempel di celo y fe fuerte a anima mi masha. Mi ta orguyoso di por ta parti di e mesun famia spiritual cu boso. Mi ta gradici boso di henter mi curason!”—Andrée, Francia.

“No tin palabra pa describi con gradicido mi ta na boso y na Yehova pa e Anuario 2002. Segun cu mi tawata lesa e experencianan di rumannan cu a pasa añanan balioso di bida den prizon y den camponan di consentracion, awa tawata basha for di mi wowo. Mi ta admira nan curashi. Aunke mi tin 27 aña caba como Testigo, ainda mi por siña hopi for di e rumannan aki. Nan a fortalece mi fe den nos Tata celestial, Yehova.”—Vera, ex Yugoslavia.

“Mi ta skirbi e carta aki cu goso pa motibo di boso bon ehempel di perseverancia y fieldad durante tur e añanan ei di oposicion. Boso pleno confiansa den Yehova y boso determinacion pa keda fiel ta trece honor pa boso. Ademas, boso humildad durante prueba ta duna mi mas conviccion ainda cu Yehova no ta bandona su pueblo. Debi na boso bon ehempel di curashi, firmesa y perseverancia, nos por acepta nos problemanan menor mas facil.”—Tuteirihia, Polinesia Frances.

“Despues cu mi a caba di lesa e Anuario, mi mester a skirbi boso. Tur e bunita experencianan aki a conmove mi profundamente. Mi a sinti mi orguyoso di por ta parti di un organisacion asina leal y uni, cu ta ser guia pa un Tata amoroso. E ta duna nos fortalesa na e momento cu nos tin mas mester di dje. A duel mi cu hopi sirbido di Yehova balente a sufri asina tanto y a asta perde nan bida. Pero tambe mi a sinti goso pasobra debi na nan curashi y celo, hopi hende a siña e berdad y a siña conoce nos Tata amoroso.”—Collete, Hulanda.

“Tur loke ami cu mi casa por a haci ta di skirbi boso pa nos bisa boso cu nos a keda masha emociona ora nos a lesa e relato tocante Ucrania den e Anuario. Boso, rumannan fiel, a pone un excelente ehempel di perseverancia durante dificultad severo cu a dura hopi tempo. Na harmonia cu Proverbionan 27:11, Yehova lo mester a keda masha contento pa sa cu asina tanto ruman fiel na Ucrania a mantene nan integridad inkebrantabel apesar di Diabel su echonan malbado.”—Alan, Australia.

“Mi wowo a yena cu awa ora mi a lesa tocante e rumannan na Ucrania. Nan a soporta hopi cos: añanan den prizon, tortura, opresion, y separacion for di nan famia. Mi kier bisa tur e rumannan cu ainda ta sirbi den boso congregacionnan cu mi ta stima y respeta nan masha hopi. Mi a keda encanta cu e curashi y firmesa cu nan a demostra. Mi sa cu ta Yehova su spirito a duna nan e poder ei. Yehova ta serca nos y e kier yuda nos.”—Sergei, Rusia.

“Mi a yora ora mi a lesa e Anuario 2002. Hopi ruman den mi congregacion a papia di boso. Boso ta un berdadero tesoro. Mi ta masha contento cu mi ta parti di un famia spiritual asina grandi.”—Yeunhee, Sur Corea.

“E relato di boso fe, perseverancia y amor inkebrantabel pa Yehova y su Reino a conmove mi masha. Tin bes nos ta lubida di mustra aprecio pa e libertad cu nos ta disfruta di dje y pa e abundancia di cuminda spiritual cu Yehova ta percura pa nos. Sinembargo, boso si no a lubida. Boso ehempel di fe ta yuda nos compronde cu si nos tin un relacion intimo cu nos Dios, lo e duna nos forsa pa trata cu tur clase di prueba.”—Paulo, Brazil.

“Mi tawatin e privilegio di lesa boso experencianan den e Anuario 2002. Nan a conmove mi masha, specialmente e experencia conmovedor di ruman Lydia Kurdas. Mi a sinti mi estrechamente liga cu e ruman mohe aki.”—Nidia, Costa Rica.

“Awe mi a caba di lesa e Anuario 2002. Segun cu mi tawata les’e, mi fe den Yehova a bira mas fuerte. Algo cu nunca lo mi lubida ta e relato tocante ora surgi duda relaciona cu esnan cu ta hiba delantera. El a siña mi pa nunca duda den e ruman hombernan cu ta hiba delantera. Masha, masha danki! E alimento spiritual aki ta bon pa curason, y e ta prepara nos pa e tempo cu nos lo por haya nos cu pruebanan di fe.”—Leticia, Merca.

“Nos ta masha gradicido pa e excelente Anuario. Pa hopi publicado ta e prome bes cu nan a lesa tocante e actividad di nos rumannan na Ucrania. El a fortalece nos rumannan akinan. Hopi di nan, specialmente hobennan, a aumenta nan actividad di sirbishi. Algun a cuminsa sirbi como pionero regular of ausiliar. E relatonan di e rumannan cu a sirbi Yehova durante e prohibicion a anima nan tur.”—Comite di sirbishi di un congregacion, Ucrania.

E fieldad di nos rumannan na Ucrania en berdad tawata un fuente di animacion pa e pueblo di Yehova rond mundo. De echo, ora nos ta lesa e relatonan emocionante cu ta aparece den e Anuario tur aña, esei ta un excelente manera pa fortalece nos fe y perseverancia den e tempo crucial aki.—Hebreonan 12:1.