Bo Kier Biba pa Semper?

“MI NO tin miedo di muri”, un señora di edad na Japon a bisa. “Pero mi ta sinti masha tristo cu mi tin cu bai laga e flornan aki.” Un ruman mohe cristian cu tawata di bishita a compronde e comentario aki pasobra e señora tawatin un bunita hardin na su cas. Hopi hende cu ta bisa cu nan no tin miedo di muri ta disfruta masha di e maraviyanan di creacion y eigenlijk lo ta desea di biba pa semper.

Biba pa semper? Hopi hende lo descarta e idea ei. Algun asta por bisa cu nan no ta interesa mes den biba pa semper. Pakico un hende lo pensa asina?

Bida Eterno Lo Ta Laf?

Tin hende ta pensa cu bida eterno lo ta laf. Kisas nan ta mustra riba e bida monotono di hopi hende pensiona cu no ta haci nada otro cu sinta wak television henter dia. Si ta asina bo ta pensa, wak kico e astronomo Robert Jastrow a bisa ora a puntr’e si bida eterno lo ta un bendicion of un maldicion. E di: “Lo e ta un bendicion pa hende cu tin un mente curioso y un hamber insasiabel pa siña cosnan. E idea cu nan lo por sigui haya conocemento pa eternidad lo ta un gran consuelo pa nan. Pero pa otronan cu ta kere cu ya nan a siña caba tur loke tin di siña y cu tin un mente sera, lo e ta un maldicion spantoso. Nan lo no sa kico pa haci cu nan tempo.”

Pues ta depende hopi di bo actitud si lo bo haya bida eterno laf of no. Si bo tin “un mente curioso y un hamber insasiabel pa siña cosnan”, pensa cuanto cos lo bo por logra riba tereno di arte, musica, arkitectura, hardineria of cualkier actividad cu ta bale la pena y cu ta interesa bo. Bida eterno riba tera lo duna bo e speransa maraviyoso pa desaroya bo potencial riba varios tereno di interes special pa bo.

Otro cos cu lo duna nos hopi satisfaccion den bida eterno ta e echo cu nos lo por mustra y experencia amor pa semper. Dios a crea nos cu e capasidad pa mustra amor, y ora nos ta sinti cu hende stima nos, nos ta sinti nos hopi bon. Ora nos ta comparti berdadero amor cu otro hende nos ta haya un satisfaccion profundo cu, ni maske cuanto tempo pasa, no ta caba na nada. Bida eterno lo ofrece un oportunidad sin fin pa cultiva amor no solamente pa nos prohimo sino specialmente pa Dios. Apostel Pablo a bisa: “Si un hende ta stima Dios, e ta conoci pa Dios.” (1 Corintionan 8:3) Esta un perspectiva maraviyoso—conoce y bira conoci pa e Soberano di universo! Ademas, nos no ta caba di siña tocante nos Creador amoroso. Con anto bida eterno por ta laf y sin nada di ofrece?

Bida Ta Precioso Djis Pasobra E Ta Cortico?

Tin hende ta pensa cu ta pasobra bida ta cortico e ta asina precioso. Talbes nan ta compara bida cu oro, locual ta masha scars. Segun nan, si bo por a haya oro tur caminda, lo e no tin mucho balor. Pero esei no ta kita si cu oro ta keda bunita. Y mescos ta conta pa bida.

Nos por compara bida eterno cu un abundancia di aire. Nabegantenan den un submarino cu a daña bou di awa lo considera aire como algo di hopi balor. Despues cu nan ser rescata, bo ta kere cu nan ta asina malagradecido di keha cu nan tin un abundancia di aire atrobe? No, toch!

Mescos cu e nabegantenan ei, nos por wordo rescata pero cu un perspectiva asta mas grandi ainda, esta di haya bida eterno. Apostel Pablo a skirbi: “Pago di pica ta morto, ma e don di gracia di Dios ta bida eterno den Cristo Hesus, nos Señor.” (Romanonan 6:23) Pa medio di Hesus su sacrificio di rescate, Dios lo elimina imperfeccion humano y morto, y lo drama riba humanidad obediente e don di bida eterno. Nos mester ta hopi gradicido pa un areglo amoroso asina!

Kico di Nos Sernan Keri?

Algun hende por pensa: ‘Kico di mi sernan keri? Si nan no ta hunto cu mi, bida eterno riba tera lo no tin mucho sentido pa mi.’ Talbes bo a haya conocemento di Bijbel y bo a siña tocante e posibilidad di disfruta di bida eterno den un paradijs riba tera. (Lucas 23:43; Huan 3:16; 17:3) Claro cu bo kier pa bo famia pega, otro sernan keri y amigonan stima tambe t’ei, pa nan haya e mesun goso cu bo ta spera di haya den e mundo nobo di husticia cu Dios a priminti.—2 Pedro 3:13.

Pero ke tal si bo amigonan y sernan keri no ta mustrando interes pa biba pa semper den un paradijs riba tera? No laga esei desanima bo. Sigui gana conocemento exacto di Bijbel y actua na harmonia cu e conocemento ei. Apostel Pablo a skirbi: “Con bo sa, esposa, cu kisas lo bo salba bo esposo? Of con bo sa, esposo, cu kisas lo bo salba bo esposa?” (1 Corintionan 7:16) Hende por cambia. Por ehempel, un homber cu un tempo tawata opone cristianismo a cambia y despues a bira anciano den e congregacion cristian. El a bisa: “Mi ta masha gradicido cu mi famia stima a para fielmente riba nan principionan di Bijbel durante tur mi oposicion.”

Dios ta hopi interesa den bo bida y e bida di bo sernan keri. De echo, Yehova “no kier pa ningun hende bai perdi, ma pa tur bin na repentimento.” (2 Pedro 3:9) Yehova Dios kier pa abo y bo sernan keri biba pa semper. Su amor ta mas grandi cu esun di hende imperfecto. (Isaias 49:15) Pues pakico no cultiva un bon relacion cu Dios? E ora ei lo bo por yuda bo sernan keri haci mescos. Maske aworaki nan no tin e speransa di biba pa semper, nan actitud por cambia ora nan mira bo actua na harmonia cu conocemento exacto di Bijbel.

Kico di bo sernan keri cu no t’ei mas? Pa miyones di hende cu a muri, Bijbel ta ofrece e speransa maraviyoso di un resureccion. Nan lo lanta for di morto y biba den Paradijs riba tera. Hesucristo a priminti: “E ora lo yega den cua tur cu ta den graf lo . . . sali.” (Huan 5:28, 29) Asta esnan cu a muri sin conoce Dios lo bini bek na bida, pasobra Bijbel ta declara: “Lo tin un resureccion di tanto e hustonan como e malbadonan.” (Echonan 24:15) Esta un goso di por ricibi e hendenan ei bek na bida!

Bida Eterno—Un Perspectiva Gososo

Si bo por ta felis y contento aworaki apesar di tur dificultad den e mundo actual, sigur lo bo por disfruta di bida eterno den un paradijs riba tera. Sinembargo, ora un Testigo di Yehova a papia cu un señora di e bendicionnan cu bida eterno lo trece cu ne, e señora a bis’e: “Mi no kier biba pa semper. E bida aki di 70 of 80 aña ta suficiente pa mi.” Un anciano cristian cu pa casualidad tawata einan a puntr’e: “Bo a yega di puntra bo mes con bo morto lo por afecta bo yiunan?” Ora e señora a pensa con tristo nan lo keda si nan mester perde nan mama, awa a basha for di su wowo. El a admiti: “Pa prome biaha, mi a realisa con egoista mi tawata, y mi por a mira cu bida eterno no ta un speransa egoista sino cu e ta encera biba pa otro hende.”

Kisas algun hende ta pensa cu ningun hende no tin cu nes si nan biba of nan muri. Pero Esun cu a duna nos bida si ta interesa pasobra el a bisa: “Manera mi ta biba . . . mi no tin placer den e morto di e malbado, ma mas bien cu e malbado bira for di su caminda y biba.” (Ezekiel 33:11) Siendo cu Dios tin tanto interes den bida di asta e malbadonan, siguramente lo e mester ta profundamente interesa den hende cu ta stim’e.

Rei David di Israel di antiguedad tawatin confiansa den e cuido amoroso di Yehova. David a bisa un biaha: “Maske mi tata y mi mama bandona mi, SEÑOR lo recohe mi.” (Salmo 27:10) Probablemente David tawatin sigur cu su mayornan a stim’e. Pero asta si su mayornan—e personanan mas pega na dje—lo a bandon’e, e tawata sa cu Dios si lo no a lag’e na caya. Pa motibo di su amor y interes den nos, Yehova ta ofrece nos bida eterno y su amistad pa semper. (Santiago 2:23) Nos no mester acepta e regalonan maraviyoso aki cu un curason gradicido?

[Plachi na pagina 7]

Amor pa Dios y pa prohimo lo haci bida eterno algo cu ta bale la pena