“Un di e Mihor Dianan di Mi Bida”

“DEPRESION ta e problema di salud mental cu mas ta ser registra, y posiblemente esun cu mas ta resalta serca hobennan”, segun Beyondblue, un organisacion subsidia pa gobierno na Australia. Estudionan ta revela cu pa aña mas o menos 100.000 Australiano hoben ta sufri di depresion.

Hobennan cristian tambe por sufri di depresion. Sinembargo, fe den Yehova a yuda hopi di nan vence sintimentonan negativo y probecha bon di nan hubentud. Door di esei, nan ta causa bon impresion riba otro hende. Con asina?

Tuma por ehempel e experencia di Claire di 18 aña di edad. E cu su mama ta asisti na un congregacion di Testigonan di Yehova na Melbourne. Tempo Claire su tata a bai laga e famia, Claire a cai den depresion. Pero su fe den su Tata celestial, Yehova, a keda fuerte. Riba un dia e docter di cas, Lydia, a haci un bishita na cas di Claire pa wak con a sigui cu e mama kende tawata malo. Anto el a ofrece bondadosamente pa hiba Claire na un centro comercial pa e haci compras. Na caminda el a puntra Claire si e tin mucha homber. Claire a splic’e cu como Testigo di Yehova, e no sa date mucha homber. Esaki a sorprende e docter. Despues Claire a splic’e con Bijbel a yud’e tuma decisionnan sabi den bida. Finalmente, Claire a ofrece pa trece pa e docter un publicacion basa riba Bijbel cu a yuda e mes masha hopi. Esei tawata e buki Loke hovenan sa puntra—Contesta práctica.

Tres dia despues cu Lydia a ricibi e buki, el a yama Claire su mama na telefon pa bis’e cuanto el a disfruta di e buki ora el a les’e. Anto el a pidi seis buki mas pa su coleganan. Ora Claire a entrega e bukinan, e docter a splic’e con impresiona el a keda cu su fe. Claire a ofrece pa studia Bijbel cu ne, y e docter a acepta.

Pa varios luna, Claire a conduci e estudio durante e docter su pauze di merdia. Despues Lydia a puntra Claire si e kier a papia na un seminario riba e topico di depresion serca hobennan. Aunke Claire tawatin poco miedo, el a bai di acuerdo. Mas cu 60 persona a asisti na e seminario. Cuater profesional di salud mental—tur tawata adulto—a papia cu esnan presente. Despues tawata Claire su beurt di papia. El a resalta con importante ta pa hobennan tin un amistad cu Dios. El a splica cu Yehova Dios tin interes profundo den hobennan y ta yuda tur cu ta acudi na dje en busca di sosten y consuelo. Ademas, el a expresa su conviccion cu pronto Yehova lo elimina tur tipo di enfermedad fisico y mental. (Isaias 33:24) Kico tawata e resultado di e bunita testimonio aki?

Claire a bisa: “Despues di e sesion hopi hende a acerca mi pa bisa mi con impresiona nan a keda pa tende un hoben papia tocante Dios. . . . Mi a laga 23 ehemplar di e buki Loke hovenan sa puntra. Tres hobensita den e auditorio a duna mi nan number di telefon. Aworaki un di e mucha mohenan aki ta studiando Bijbel. Tawata un di e mihor dianan di mi bida.”