Kico Ta e Reino di Dios?

KI UN desaster teribel a asota humanidad na principio di historia humano! Un angel a rebela contra e autoridad di Esun cu a trah’e. E rebelde aki a tenta e prome muher, Eva, pa come di e fruta prohibi. Referiendo na Eva cu su casa, Adam, e angel a bisa: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.” (Genesis 2:16, 17; 3:1-5) E angel rebelde despues a haya e nombernan Diabel y Satanas.—Revelacion 12:9.

Acaso Eva a presta atencion na e palabranan di Satanas? Bijbel ta conta nos: “Ora cu e muher a mira cu e palo tabata bon pa cuminda, y cu e tabata un delicia pa bista, y cu e palo tabata deseabel pa haci hende bira sabi, el a cohe di su fruta y a come; y el a duna su esposo tambe cu tabata hunto cu ne, y el a come.” (Genesis 3:6) Si, e prome pareha, Adam cu Eva, a join Satanas den su rebelion. Como consecuencia, nan a perde e Paradijs tanto pa nan mes como pa nan descendiente. Nan yiunan cu lo mester a nace perfecto cu bida eterno nan dilanti, awor lo a hereda pica y morto.—Romanonan 5:12.

Con Jehova Dios, e Gobernante Soberano di universo, a reacciona? El a fiha como su proposito pa bin cu un areglo pa pordona pica. (Romanonan 5:8) Tambe Jehova Dios a establece un sistema di gobierno pa maneha e crisis. E areglo aki ta ser yama “e reino di Dios.” (Lucas 21:31) E Reino aki tin un proposito specifico, y Dios a establec’e como un parti secundario di su gobernacion universal.

Kico ta e proposito di e Reino di Dios? Kico ta algun di su aspectonan, y con nan ta na comparacion cu gobernacion humano? Na ki tempo e Reino mester a cuminsa goberna? Nos lo trata e preguntanan aki den e siguiente articulo.