Con Nos Por Adkiri Conocemento di Dios?

TIN HENDE TA DUDA CU DIOS TA REALMENTE INTERESA DEN REVELA SU MES NA HENDE. PERO SI E TA REVELANDO SU MES, CON E TA HACIE?

E REFORMADOR protestant di siglo 16, Johannes Calvijn, corectamente a conclui cu hende riba su mes no por conoce Dios si Dios no revela su mes na humanidad. Sinembargo, tin hende ta puntra nan mes si Dios ta realmente interesa den revela su mes na hende. Y si e ta interesa, con e ta revelando su mes?

Jehova, e Magnifico “Creador”, tin un motibo pa tur cos cu e ta haci. Tambe, como “Dios Todopoderoso”, e ta plenamente capasita pa cumpli cu su proposito. (Eclesiastes 12:1; Exodo 6:3) Nos por tin sigur cu e tabata dispuesto pa revela su proposito na hende, pasobra su profeta Amos a ser inspira pa skirbi: “SEÑOR Dios no ta haci nada, sin cu e revela su conseho secreto na su sirbidornan, e profetanan.” Pero tuma nota cu Bijbel ta bisa cu Dios ta revela su proposito solamente na su sirbidornan, esnan cu sinceramente ta stim’e. Esei ta logico, no? Na ken abo ta revela bo asuntonan confidencial? Na ken cu ta of na bo amistadnan di mas intimo?—Amos 3:7; Isaias 40:13, 25, 26.

Dios su sabiduria y conocemento ta yena personanan humilde cu respet profundo y admiracion, y esei ta na su luga. Sinembargo, pa nos beneficia personalmente di sabiduria y conocemento divino nos mester di mas cu djis un sintimento di respet profundo y admiracion. Bijbel ta enfatisa cu pa siña conoce e pensamentonan di Dios, nos mester tin un curason humilde: ‘Warda mi mandamentonan den bo. Haci bo horea atento na sabiduria. Inclina bo curason na comprondemento. Sclama pa discernimento y halsa bo bos pa comprondemento. Sigui busc’e manera plata.’—Proverbionan 2:1-4.

Un persona humilde cu ta haci e tipo di esfuerso aki, sigur lo por siña conoce Dios. E pasashi ei den e buki di Proverbionan ta sigui bisa: “[Jehova] ta duna sabiduria; for di su boca ta sali conocemento y comprondemento.” Si, personanan cu sinceramente ta busca e berdad por compronde of “discerni husticia y huicio, y rectitud, si, tur bon caminda.”—Proverbionan 2:6-9.

En Busca di e Berdad

The Encyclopedia of Religion ta declara: “Bida humano ta ser caracterisa pa e necesidad di distingui entre loke ta real y ireal, poderoso y impotente, berdadero y engañoso, puro y contamina, bon cla y confuso, y tambe di distingui asuntonan cu no ta claramente defini riba tereno di etica.” Pa satisface e necesidad aki, hende tin hopi tempo ta busca e berdad. Te na e grado cu cada persona a acudi na Jehova—kende e salmista ta yama e “Dios di berdad”—den nan buskeda, te na e grado ei nan a haci progreso den haya e berdad.—Salmo 31:5, BPK.

E nomber Jehova literalmente ta nifica “E Ta Causa pa Bira.” (Genesis 2:4, NW, nota na pia di pagina) Pues, asta e nificacion di Dios su nomber ta dirigi atencion na su posicion como Creador y na su proposito. De echo, un di e caracteristicanan di e religion berdadero ta cu su miembronan conoce e nomber Jehova y ta uz’e. Hesus claramente a reconoce e echo aki. Referiendo na su siguidonan, el a bisa Dios den oracion: “Mi a haci bo nomber conoci na nan y lo mi hacie conoci, pa e amor cu cual bo a stima mi por ta den nan y ami den nan.”—Juan 17:26.

Ora cu Jose [Jozef], un Hebreo di antiguedad, a hay’e confronta cu e tarea di revela e nificacion di soñonan, el a depende riba su amistad cu Dios y a bisa cu confiansa: “Interpretacion no ta Dios su asunto?”—Genesis 40:8; 41:15, 16.

Varios siglo despues, Rei Nabucodonosor di Babilonia a soña algo cu su hombernan sabi no por a interpreta. Profeta Daniel a bisa e Rei: “Tin un Dios den shelo cu ta revela misterio, y el a haci conoci na Rei Nabucodonosor kico lo sosode den e ultimo dianan.”—Daniel 2:28.

E ehempel di Jose y di Daniel ta mustra cu e sabiduria y conocemento di Dios ta disponibel solamente pa esnan cu ta sirbi Jehova Dios. Claro cu pa nos gana Dios su aprobacion, esei kisas ta ensera cu nos mester laga puntonan di bista cu nos tabatin anteriormente. Hudiunan di prome siglo cu a bira cristian mester a haci netamente esei. Como cu for di chikito nan a siña respeta y obedece e leinan estableci bou dje sistema di cosnan Hudiu, nan tabatin mester di tempo pa acepta Hesus como e Mesias. El a bin pa cumpli cu e Lei di Moises, un Lei cu a sirbi como “un sombra di e bon cosnan cu ta bin.” (Hebreonan 10:1; Mateo 5:17; Lucas 24:44, 45) E Lei di Moises ei a ser remplasa pa “e lei di Cristo”, cu ta hopi mas superior.—Galationan 6:2; Romanonan 13:10; Santiago 2:8.

Nos tur a nace den un mundo aleha for di Dios. Debi na pica cu nos a hereda di e prome pareha humano, nos a nace den enemistad cu Dios, y sin un conocemento exacto di su proposito. Tambe nos a hereda un curason engañoso. (Jeremias 17:9; Efesionan 2:12; 4:18; Colosensenan 1:21) Pa nos haya e amistad di Dios, nos tin cu siña imita Dios su manera di pensa. Esei no ta nada facil.

Kisas ta dificil pa laga ideanan of practicanan religioso falso, specialmente si esakinan a ser inculca den nos for di infancia. Pero ta sabi pa sigui den e caminda robes? Claro cu no! Definitivamente ta mas sabi pa cambia bo manera di pensa y asina haya e aprobacion di Dios.

Con pa Identifica Dios Su Canal di Instruccion

Unda nos por haya yudansa pa compronde e Palabra di e berdad y pa despues biba di acuerdo cu ne? Den Israel di pasado, Dios a pone personanan leal y di confiansa den puestonan di responsabilidad pa dirigi e nacion. Cristo, e Cabes di e congregacion cristian djawe, di igual manera ta guia esnan cu sinceramente ta busca e berdad. E ta haci esei mediante su siguidonan leal y di confiansa, kendenan ta forma e canal cu ta responsabel pa dirigi y proteha buscadonan sincero di e berdad. (Mateo 24:45-47; Colosensenan 1:18) Pero con bo por identifica Dios su canal di instruccion?

Berdadero siguidonan di Hesucristo ta haci esfuerso pa refleha e mesun cualidadnan cu el a desplega como hende. Den un mundo cu ta birando mas y mas malbado, ta facil pa identifica e siguidonan aki segun cu nan ta desplega cualidadnan spiritual unico. (Wak e cuadro na pagina 6.) Abo ta mira e cualidadnan aki den e religion na cua bo ta afilia of den e religionnan di bo bisiñanan? Lo ta bale la pena pa investiga e asunto aki cu yudansa di Bijbel.

Nos ta invita bo, nos lector, pa haci esei mediante un estudio di Bijbel. Aña pasa, un promedio di mas cu 6.000.000 persona den 235 pais a probecha di e areglo aki pa studia Bijbel cu Testigonan di Jehova. Adkiri sabiduria y conocemento di Dios ta un actividad continuo, recompensador y cu ta duna satisfaccion. Pakico no cuminsa cu e trayecto di adkiri e sabiduria y conocemento di Dios? Ta un trayecto cu nunca lo bo lamenta di a cuminsa cu ne. Si, nos realmente por siña conoce Dios!

[Cuadro na pagina 6]

HENDE CU TA TRAHA NA HARMONIA CU DIOS . . .

ta keda neutral den conflictonan politico.—Isaias 2:4.

ta produci bon fruta haciendo e boluntad di Dios.—Mateo 7:13-23.

ta desplega berdadero amor entre nan mes.—Juan 13:35; 1 Juan 4:20.

ta papia di un acuerdo tur caminda. —1 Corintionan 1:10.

no ta imita mal actitud y conducta di e mundo rond di nan.—Juan 17:16.

ta duna testimonio di e berdad y ta haci discipel.—Mateo 24:14; 28:19, 20.

ta gusta reuni hunto regularmente pa encurasha otro.—Hebreonan 10:25.

ta alaba Dios como un grupo internacional.—Revelacion 7:9, 10.

[Plachi na pagina 7]

Nos por adkiri conocemento di Dios individualmente, como famia y como congregacion