Plamando Bon Noticia na e Pais Colorido di Haiti

HAITI y Republica Dominicana hunto ta forma e isla tropical di Hispañola, cu tin e seronan di mas halto den Caribe. Varios di nan ta mas cu 2.400 meter halto. Durante e lunanan cu ta “friu”, capa fini di ijs por forma riba e damnan chikito cu tin den e seronan.

E sero- y vayenan den parti zuid di Haiti ta tapa cu un selva tropical berde berde. Na otro partinan di Haiti, mayoria di sero ta bashi, sin vegetacion, hopi bes cu puntanan skerpi, victima di kapmento di palo na gran escala. Sea bo bai noord of zuid, lo bo ripara cu Haiti su paisahenan ta bunita. Riba algun di e camindanan smal y yen di bocht den sero, lo bo mira paisahenan espectacular di tera y lama cu ta cambia constantemente. Tur caminda bo ta mira gran variedad di flor y na colornan briyante.

E 8,3 miyon hendenan cu ta biba den e pais colorido aki ta consisti principalmente di hende di cunucu di origen Africano. Aunke mayoria ta pober, nan ta bondadoso y hospitalario. Testigonan di Jehova tin mas o menos 60 aña ta disfruta di e oportunidad di por hiba e bon noticia di e Reino di Dios pa nan y ta ser ricibi calurosamente.—Mateo 24:14.

Predicando na un Pueblo den Cunucu

E experencia di un ruman muher misionero cu a bai predica pa prome biaha na un pueblo den cunucu ta algo tipico. El a skirbi:

“Un dia na maart 2003, nos a bai predica na Casale, un pueblito cu ta keda un mei ora asina for di Cabaret, caminda nos cas di misionero ta, un 30 kilometer noord di e capital, Port-au-Prince. Na aña 1999 tabata e ultimo biaha cu Testigonan a predica na Casale, pues nos tabata yen di expectativa ora nos a cuminsa nos biahe shet’or di mainta. Casi henter nos congregacion—22 persona—a keda gepak den dos van four-wheel-drive. Tur hende tabata papia y hari yen di entusiasmo segun cu nos a core riba camindanan di tera masha steil y a yega na un vaye cu hopi palo grandi. Un riu a pasa dor di e vaye, y e pueblo di Casale tabata keda na ambos banda di e riu.

E historia di e pueblo trankil aki ta data for di principio di añanan 1800. E tempo ei algun solda Polaco cu a bin Haiti pa yuda excatibonan haya nan independencia a establece nan mes den e vaye fertil aki hunto cu nan esposanan Haitiano. Esaki a produci un bunita mescla di hende. Ta fascinante pa mira hende di cunucu color blanco, color di mispel, color mas scur, wowo berde, wowo maron scur, etcetera.

Na e prome porta cu nos a bati, e persona cu a sali no tabata interesa. Segun cu nos a bira pa bai, un homber a cana bin contra cu nos. E kier a sa si nos ta kere cu tin un diferencia entre Hesus y Dios. Riba nos peticion, el a bai coi su Bijbel, y e combersacion biblico cu a sigui a combenc’e cu Hesus ta e Yiu di Dios y cu Jehova ta ‘e unico Dios berdadero.’ (Juan 17:3) Hopi hende a invita nos pa cai sinta y papia cu nan. Algun di nan a puntra: ‘Ki dia boso ta bin bek y studia Bijbel cu nos?’

Merdia, nos a haya un dushi luga cu bon sombra y a prepara pa come. Tabatin un weya grandi di pisca cu dos ruman muher a cushna. E tabata sabroso! Segun cu nos a keda un poco mas einan, comiendo y papiando, nos a predica tambe na e personanan cu tabata cana pasa. Caba nos a crusa e riu y a bai na e otro banda di e pueblo. Tabata un placer pa papia cu e hendenan amabel aki cu tabata sinta bou di palo pega cu nan casnan modesto. Tabata masha dushi pa tende e zonido di muchanan ta hunga, hende muher ta laba paña den riu y mamachinan ta mula cofi!

Un poco despues tabata cuat’or, y nos grupo contento a coi rumbo pa e vannan pa regresa Cabaret. Ami cu mi casa realmente a disfruta di nos prome bishita na Casale, caminda tin hende amabel y hospitalario.”

For di tempo cu e prome misioneronan Testigo a yega Haiti na aña 1945, e cantidad di proclamado di Reino den e pais aki a sigui aumenta continuamente, di manera cu awor tin alrededor di 14.000 persona ta participa den e predicacion y nan ta conduci mas cu 22.000 estudio di Bijbel. Nan a influencia e bida di e 59.372 personanan cu a asisti na Memorial na maart 2005 y publicamente a declara e bon noticia di e Reino di Dios. Considera e varios maneranan den cua e trabou di Testigonan di Jehova a influencia hende.

E Bon Noticia den Obranan di Arte Colorido

Mayoria di Haitiano gusta color bibo. Nan ta refleha esaki na nan paña, na e color cu nan ta verf nan casnan, na e variedad di flor den nan hardinnan y na nan obranan di arte. Tur caminda riba caya den Port-au-Prince bo ta mira e cuadronan pinta segun e estilo local conoci como L’Art Haitien. Cumpradonan ta bin di hopi parti di mundo.

No ta den cuadro so bo ta mira colornan bibo. E cayanan di Port-au-Prince ta yen di bus chikito cu nan ta yama ‘camionette’, of tap-taps, cu tin pinturanan masha creativo. Hopi biaha bo ta mira escenanan basa riba Bijbel.

Segun cu bo ta cana riba caya, bo bista por cai riba un escena conoci, por ehempel di Adam cu Eva den Eden. Bo ta mir’e ta pasa riba e glas patras di e camionette. Hopi biaha bo ta mira tambe versiculonan of lemanan biblico cu ta contene e nomber Jehova, skirbi riba e vehiculonan aki of nan ta forma parti di e nomber di empresanan comercial.

Compartiendo e Bon Noticia na Scol

Hobennan Testigo na Haiti tin bon oportunidad pa yuda nan compañeronan di scol siña tocante Bijbel. E siguiente informe di un mucha muher Testigo di 17 aña ta un ehempel di esei.

“Un compañero di klas a acerca mi un dia y puntra mi kico kiermen ‘fornicacion.’ Pensando cu ta coi fresco e kier a haci cu mi, mi a ignor’e. Pero ora cu el a haci un mucha homber e mesun pregunta, henter e klas su interes a lanta. P’esei su siguiente siman, despues cu mi a haci algun investigacion riba e topico, mi a duna un presentacion na e klas, y a splica nan dicon Testigonan di Jehova ta haci esfuerso pa ta limpi den sentido moral, spiritual y fisico.

E muchanan den klas a haci hopi pregunta y a acepta e contestanan cu mi a duna for di Bijbel. Asta e cabes di scol, cu na prome instante a basila, a haci hopi pregunta y a haci areglo pa mi papia cu otro klasnan. Mi a mustra nan e buki Loke hovenan sa puntra—Contesta práctica,a y hopi mucha a interesa den e buki. E siguiente dia, mi a laga 45 buki cu mi compañeronan di scol. Hopi di nan a lesa e buki y cab’e rapidamente, y algun di nan awor ta studia Bijbel cu Testigonan cu ta biba pega cu nan. Un mucha cu ta biba den mi bario, awor ta asisti na tur reunion.”

Uzando e Idioma Creol

E hendenan y e pais ta colorido y interesante. Pero esei ta conta tambe pa e idioma Patois of Creol di Haiti, cu ta combina palabranan Frances cu e gramatica di West Africa. Esaki ta e lenga materno di e Haitianonan, e idioma cu ta touch nan curason. Testigonan di Jehova ta efectua nan ministerio principalmente den e idioma aki, y nan tin e facilidadnan pa produci mas literatura biblico na Creol.

Na 1987 a traduci e foyeto Disfruta di bida riba tera pa semper! na Creol, despues a sigui e buki Conocimentu cu Ta Hiba na Bida Eterno y e foyeto Kico Dios Ta Rekerí di Nos? E publicacionnan aki tabata di gran yudansa pa studiantenan nobo di Bijbel cu kier haya un comprondemento basico di e Palabra di Dios. For di 1 di september 2002, E Toren di Vigilancia tambe ta sali na Creol. Te ainda e rumannan ta uza literatura na idioma Frances, pero hopi di nan ta prefera di lesa e publicacionnan na nan mes idioma.

Hibando e Bon Noticia na Hende den Prizon

Recientemente, Testigonan di Jehova a cuminsa hiba e bon nobo na homber- y muhernan encarsela den prizon. E Testigonan cu ta haci esaki ta contento cu nan por hiba un mensahe di consuelo pa esnan den e situacion hopi tristo aki. Un ruman homber a conta lo siguiente:

“Na nos prome bishita na un prizon, nan a trece e presonan den un sala grandi pa topa cu nos. Nos tabata puntra nos mes con nan lo a reacciona. Ora nos a splica nan cu nos proposito ta pa yuda nan compronde Bijbel, tur 50 preso a ricibi nos bon. Nos a presenta e edicionnan na Creol di e foyeto Aplica Bo Mes na Lesamento y Skirbimento y Disfruta di bida riba tera pa semper!, y a cuminsa un estudio di Bijbel cu 26 di nan. Dies di esnan presente no por a lesa ni skirbi, pero nan a mustra interes ora cu nos a mustra nan con pa uza e plachinan den e foyetonan como yudansa pa compronde e palabranan.”

Ora cu e Testigonan a bin bek, un homber a bisa: “Mi a lesa y bolbe lesa e foyeto. Constantemente mi ta pensa riba loke e ta bisa, y mi tabata spera ansiosamente riba boso bishita.” Un homber cu a ser aresta pa atraco arma a bisa cu e kier cambia, y el a pidi pa manda un hende bai studia Bijbel cu su casa. Un tata di dos yiu cu ta den prizon a haci e mesun peticion, ya asina su casa por a mira e diferencia entre creencianan berdadero y esnan falso. Un domi protestant condena pasobra el a estafa un suma grandi di placa for di miembronan di su iglesia, a bisa cu awor el a haya e berdad y cu despues di sinta su castigo, lo e yuda e miembronan di su iglesia bira Testigo di Jehova.

Un otro preso cu no tabatin su propio ehemplar di e foyeto Rekerí na Creol, a fia esun di un compañero di cel y a copia henter e foyeto na man y a siñ’e for di cabes. Un preso femenino a cuminsa comparti loke e tabata siña cu nuebe compañera di cel, y asta a studia cu nan. Un preso masculino cu a termina di studia e foyeto ei y cu a sigui den e buki Conocimentu, a cuminsa predica na e otro presonan. Poco despues e tabata conduci estudio di Bijbel cu cuater preso.

Merconyb a yega di studia Bijbel y tin famia cu ta Testigo di Jehova. El a anima otro presonan pa lesa e literatura biblico cu su famia tabata trece p’e. El a bisa: “Ora mi ofrece e literatura na e otro presonan, nan ta yama mi Testigo di Jehova. Mi ta bisa nan cu mi no ta, ya cu mi sa kico ser un Testigo ta nifica. Awor mi kier ta serio den e asunto aki, y studia y batisa. Tempo mi tabata mas jong, si mi a sigui e rumbo cu mi rumannan a scohe, lo mi no tabata aki den prizon awor.”

Un di e presonan cu a haya literatura cerca Mercony a bisa e Testigo cu a bishit’e: “Prome cu boso a bin dialuna siman pasa, mi tabata deprimi y a punto di mata curpa. Pero despues di a lesa e revistanan, mi a haci oracion pidi Dios pordona mi pa e cosnan malo cu mi a haci y pa manda un hende pa mustra mi e caminda corecto. Esta un goso mi a sinti ora cu boso a bin e siguiente dia y a ofrece pa studia Bijbel cu e presonan! Mi tin gana pa boso siña mi con pa sirbi Jehova.”

Spierta! Ta Hiba e Bon Noticia na Hopi Hende

E edicion di 8 di november 2000 di Spierta! tabatin articulo tocante e profesion di enfermeria. Un señora a busca 2.000 ehemplar, y a parti nan pa e verpleegsternan cu a asisti na un seminario na Port-au-Prince. E Spierta! di 8 di juli 2002, cu tabatin articulonan tocante polis y nan trabou, a keda ampliamente distribui entre e polisnan na Port-au-Prince. Nan a gusta e revista aki masha, y te awe, tin di nan ta para e Testigonan riba caya y pidi nan mas ehemplar di e revista ei.

Recientemente, un funcionario di Organisacion Mundial di Salud a organisa un programa pa educa hende tocante e problema di AIDS. El a haya invitacion pa bishita e sucursal di Testigonan di Jehova, caminda nan a mustr’e informacion cu a sali den Spierta! encuanto e topico ei. El a keda impresiona pa mira articulonan cu ta trata a base di Bijbel cua ta e mihor manera pa preveni AIDS y con pa yuda personanan infecta trata cu nan situacion. El a remarca cu Spierta! ta lider den percura tal informacion encuanto e topico.

Si, den hopi manera Testigonan di Jehova ta plamando e bon noticia di Reino den e pais colorido di Haiti, mescos cu nan ta haciendo den 234 pais rond mundo. Hopi hende ta reaccionando faborablemente riba e mensahe di speransa aki y ta haya yudansa pa no consentra riba e dificultadnan actual di bida, sino pa wak padilanti na un mundo nobo, caminda tur cu ta adora e Dios berdadero, Jehova, lo disfruta di bida perfecto y eterno.—Revelacion 21:4.

[Nota]

[Reconocemento pa Potret na pagina 9]

Trasfondo: ©Adalberto Rios Szalay/photodisc/age fotostock